بۇگىن اقوردادا نۇرسۇلتان نازارباەۆ مودەرنيزاتسيا بويىنشا ۇلتتىق كوميسسيانىڭ كەڭەسىندە استانا اتاۋىنا ءوز اتىن كىرىستىرۋ ۇسىنىسىنا قاتىستى پىكىرىن ءبىلدىردى. بۇل تۋرالى پرەزيدەنتتىڭ ءباسپاسوز قىزمەتى حابارلادى.

“قاي نارسە بولسا سوعان “نۇر”، “نۇرلى “دەگەن ءسوزدى قوسادى. ءبارىن مەنىڭ اتىممەن بايلانىستىرادى. مەن بۇل تاقىرىپقا بىرنەشە رەت ءوز ويىمدى ايتتىم. بارلىعى مەن ءبار جەرگە نۇرلى دەپ جازۋعا بۇيرىق بەرىپ جاتىر دەپ ويلايدى. كەشە پارلامەنت استانا اتاۋىن مەنىڭ ەسىمىمەن اتاۋدى ۇسىنىپتى. مەن مۇنداي ويدى ەشكىمگە ايتقان جوقپىن… قازاقستاننىڭ 25 جىلداعى جەتكەن جەتىستىگىن مەن جالعىز جاساعان جوقپىن. سىزدەردىڭ دە (ۇكىمەت مۇشەلەرى – رەد) قوسقان ۇلەستەرىڭىز كوپ. پارلامەنتكە دەكلاراتسيا ءۇشىن راحمەت، ادام رەتىندە ولاردىڭ ايتقاندارى ماعان ۇنادى. پارلامەنت جەكە بيلىك تارماعى رەتىندە ءوز ويلارىن ايتۋعا، شەشۋ شىعارۋعا قۇقىلى. بىراق ەلدى مەكەندەردىڭ اتىن وزگەرتەتىن بولساق تالقىلاپ بارىپ شەشىم شىعارامىز” دەدى ول.

نازارباەۆ ۇكىمەت پەن پارلامەنتكە ناقتى ىستەردى شەشۋمەن اينالىسۋ كەرەكتىگىن دە ايتتى.

23 قاراشادا استانادا پارلامەنتتىڭ بىرىككەن وتىرىسىندا ءماجىلىس دەپۋتاتى قۋانىش سۇلتانوۆ استانا اتاۋىن “نۇرسۇلتان” نەمەسە “نازارباەۆ” دەپ اۋىستىرۋدى ۇسىنعان. ونىڭ ۇسىنىسىن باسقا دا دەپۋتاتتار قولداعان. دەپۋتات ماۋلەن اشىمباەۆ بۇل يدەيانى «دۇرىس ءارى ماڭىزدى» دەپ باعالادى. زاعيپا باليەۆا استانا اتاۋىن «نازارباەۆ» دەپ وزگەرتۋدى، باقىتگۇل حامەنوۆا «ەلباسى» دەگەن اتاۋدى قۇپتايتىنىن ايتتى. سەنات دەپۋتاتى ميحايل بورتنيك «استانا-ەلباسى» دەگەن اتاۋدى ۇسىندى. بۇل ۇسىنىس باسپاسوزدە جاريالانعان سوڭ الەۋمەتتىك جەلىلەردە نارازى سيپاتتاعى ءتۇرلى پىكىرلەر ايتىلعان.

ازات ەۋروپا / ازاتتىق راديوسى