كورچاگين – سىعاناق، سيمفەرەپولسكي – جەلتوقسان، پريگورودنىي – جىبەك جولى، رەچنايا – قۇلاگەر، دزەرجينسكي – كونستيتۋتسيا، بەرەجنوي – جۇمباقتاس، اۆانگاردنايا – اتامەكەن، ۆەسەننيايا – قازانات، كراسنوگۆاردەيسكي – الاش بولىپ وزگەرتىلدى. بۇل تۋرالى قالالىق ونوماستيكالىق كوميسسيانىڭ وتىرىسىندا ايتىلدى، دەپ حابارلايدى BNews.kz.

ونوماستيكالىق كوميسسيا مۇشەلەرى تالداۋ جۇرگىزىپ، توپونيميكالىق ماڭىزى جوق كوشەلەردىڭ كوپ ەكەنىن انىقتاعان.

ۇكىمەت تاپسىرماسىمەن ونوماستيكا سالاسىنداعى جۇمىستاردى جۇيەلەندىرۋ ماقساتىندا بيىلعى جىلعا دەيىن كوشەلەرگە اتاۋ بەرۋ جانە قايتا اتاۋ ماسەلەلەرىن قاراۋ ۋاقىتشا توقتاتىلعان بولاتىن. ال بيىل ەل تاۋەلسىزدىگىنىڭ 25 جىلدىعىنا وراي ەلىمىزدىڭ تۇكپىر-تۇكپىرىندە ونوماستيكا سالاسىندا بىرقاتار شارالار قولعا الىنۋدا.

بۇعان دەيىن كوكشەتاۋ قالاسى اكىمدىگىندە بىرقاتار كوشەلەرگە ەل مادەنيەتى، ادەبيەتىنە زور ۇلەس قوسقان اقىن-جازۋشىلاردىڭ ەسىمىن بەرۋ جونىندەگى ۇسىنىستار تالقىلانعان قوعامدىق تىڭداۋ وتكەنى بەلگىلى. وندا اتاعى تانىمال تۇلعالار ەسىمىمەن تىم شاعىن كوشەلەردى اتاۋدىڭ قولايسىزدىعى ەسكەرىلىپ، تۇرعىندار ۇسىنىسىمەن باسقا كوشەلەرگە بەرۋ دە قاپەرگە الىندى. جاڭا قۇرىلىستارعا بايلانىستى قالانىڭ باس جوباسىنان ءتۇسىپ قالعالى وتىرعان شاعىن كوشەلەردى ارداقتىلار ەسىمىمەن اتاعاننان گورى، قولايلى ۋاقىتتى كۇتىپ، ورنىقتى كوشەلەرگە بەكىتكەن ءجون دەلىندى.

وبلىس ورتالىعىنداعى پروەزد 1, 2, 3 اتاۋلارى ءوز كەزەگىندە بالبىراۋىن، ايدىن، شۇعىلا بولىپ وزگەردى. كورچاگين – سىعاناق، سيمفەرەپولسكي – جەلتوقسان، پريگورودنىي – جىبەك جولى، رەچنايا – قۇلاگەر، دزەرجينسكي – كونستيتۋتسيا، بەرەجنوي – جۇمباقتاس، اۆانگاردنايا – اتامەكەن، ۆەسەننيايا – قازانات، كراسنوگۆاردەيسكي – الاش بولىپ وزگەرتىلدى. كوشەلەردىڭ جاڭا اتاۋلارى قالالىق ءماسليحاتتا بەكىتىلدى.

قالانىڭ ورتالىعى مەن سونىڭ ماڭىنداعى كوشەلەردىڭ عانا اتاۋلارى جاڭارتىلدى. شەتكەرەكتەگى شاعىن اۋداندارداعى كوشەلەردىڭ اراسىندا ءالى دە ورىسشا اتاۋ كوپ دەگەن سىن پىكىرلەر ايتىلىپ جۇرگەنى جاسىرىن ەمەس.

«كەڭەس زامانى تۇسىندا شەكتەن تىس يدەولوگيالاندىرۋ ساياساتى نەگىزىندە اتالعان وكتيابرسكي، نەۆسكي، موروزوۆ، پەرۆوماي، كالينين، كراسنوگۆاردەيسكي جانە باسقا دا كوشەلەر، سونداي-اق ءمان-ماعىناسى مەن توپونيميكالىق جۇكتەمەسى جوق رەچنوي، پولەۆوي، ستەپنوي، سوسنوۆىي، شۆەينىي سەكىلدى كوشەلەرگە ۇلتتىق اتاۋ بەرىلدى. جەرگىلىكتى اكىمدىك تاڭداعان اتاۋلار حالىققا تانىستىرىلىپ، تۇرعىندار پىكىرى تىڭدالدى. قوعامدىق قابىلداۋعا قاتىسقان تۇرعىندار كەلىسىمىمەن تاڭدالعان كوشە اتاۋلارى بەكىتىلدى»، – دەيدى كوكشەتاۋ قالالىق ءماسليحاتىنىڭ دەپۋتاتى ەركىن يسىمباەۆ.