امەريكالىق New York Times باسىلىمى قازاقستاندى 2017 جىلدىڭ الەمدەگى تۋريستىك ماقساتپەن بارۋعا تۇرارلىق ايماقتار مەن ورىندار تىزىمىنە قوستى. 2017 جىلدىڭ تىزىمىنە 52 ايماق پەن ورىن ەنگىزىلگەن.

قازاقستان بۇل تىزىمدە مۇناي ءوندىرۋشى، استاناسىندا EXPO-2017 حالىقارالىق كورمەسى وتەتىن ەل رەتىندە سيپاتتالعان. باسىلىم قازاقستان تەرريتورياسى ارقىلى وتەتىن، بيولوگيالىق ءار الۋان تابيعاتقا باي باتىس تيان-شان تاۋ جۇيەسى يۋنەسكو-نىڭ دۇنيەجۇزىلىك مۇرالارى تىزىمىنە ەنگىزىلگەنىن ايتادى.

New York Times-تىڭ ەسكەرتپەسىندە قازاقستاننىڭ بريتاندىق اكتەر ساشا بارون كوەننىڭ “بورات” فيلمىندەگى ويدان شىعارىلعان پەرسوناج، قازاقستان بيلىگىنىڭ كەرى رەاكتسياسىن تۋدىرعان بورات ساعديەۆتىڭ ارقاسىندا تۋريستىك مارشرۋتتار قاتارىنا ەنگەنى ايتىلادى. استانادا قىمبات قوناقۇيلەردىڭ بارى جانە قازاقستاننىڭ “جىبەك جولى بويىنداعى جولاۋشىلار ايالدايتىن سالتاناتتى جەر” رەتىندە كورىنگىسى كەلەتىنى دە ايتىلعان.

تىزىمدە ءبىرىنشى بولىپ كانادا تۇر. العاشقى بەستىككە چيليدەگى اتاكاما ءشولى، ۇندىستانداعى اگرا قالاسى، شۆەيتسارياداعى تسەرماتتا كۋرورتى مەن بوتسۆانا ەنگەن.

ازات ەۋروپا / ازاتتىق راديوسى