كيەۆكە قىزمەت بابىمەن سوڭعى رەت ساپارلاپ بارعان اقش ۆيتسە-پرەزيدەنتى دجو بايدەن حالىقارالىق قاۋىمداستىقتى رەسەي باسقىنشىلىعىنا قارسى تۇرۋعا، اقش-تىڭ جاڭا پرەزيدەنتى دونالد ترامپ اكىمشىلىگىن ۋكرايناعا بەرىك قولداۋ كورسەتۋگە شاقىردى. بايدەن كيەۆكە اقش پەن ۋكراينا اراسىندا ديپلوماتيالىق بايلانىستىڭ ورناعانىنا 25 جىل تولۋىنا وراي ساپارلاپ وتىر.

بايدەن اقش-تىڭ رەسەيگە قىرىمدى اننەكسيالاپ العانى ءۇشىن سالعان سانكتسيالارى ماسكەۋ 2015 جىلى مينسكىدە جاسالعان بەيبىت كەلىسىم شارتتارىن تولىق ورىندامايىنشا ساقتالۋى ءتيىس ەكەنىن ايتتى. ول رەسەي مينسك كەلىسىمى بويىنشا وزىنە العان مىندەتتەرىن ورىنداۋدان باس تارتىپ جاتقاندا كەلىسىم ورىندالادى دەۋگە سەنۋدىڭ قيىن ەكەنىن، بىراق ۋكراينا ءبىرتۇتاس مەملەكەت رەتىندە العا جىلجۋدان ءۇمىتتى ەكەنىن ءبىلدىردى.

ۋكراينا پرەزيدەنتى پەتر پوروشەنكومەن كەزدەسكەن دجو بايدەن ۋكراينا زاڭ ۇستەمدىگىن ورناتۋ جانە كوررۋپتسيانى جويۋ تۋرالى مىندەتتەمەسىنە ادال بولۋى ءتيىس ەكەنىن ايتتى. ول ۋكرايندىقتاردى اشىقتىققا جانە مەملەكەت قارجىسىن جەكە باسىنىڭ پايداسىنا جىمقىرعان ۇكىمەت شەنەۋنىكتەرىن تەرگەپ، جاۋاپقا تارتۋعا شاقىردى.

پوروشەنكو بايدەنگە ۋكراينانى ۇدايى قولداپ كەلە جاتقانى ءۇشىن، اقش-تىڭ رەسەيگە قارسى سانكتسيالاردى كۇشەيتكەنى ءۇشىن العىس ءبىلدىردى.

بايدەن ۆيتسە-پرەزيدەنت قىزمەتىندە ۋكرايناعا وسىمەن التىنشى رەت ساپارلاپ وتىر. ول كيەۆكە ساپارىنان سوڭ شۆەيتساريانىڭ داۆوس قالاسىنا دۇنيەجۇزىلىك ەكونوميكالىق فورۋمعا قاتىسۋعا بارادى.

ازات ەۋروپا / ازاتتىق راديوسى