كىرىسپە
«1998 جىلدىڭ 12 تامىزىندا گولوۆاتيۋك ۆلاديمير ميحايلوۆيچ ەسىمدى ازامات رەسەي فەدەراتسياسىنىڭ «ازاماتتىق تۋرالى» زاڭىنىڭ 3 بابىنىڭ نەگىزىندە استاناداعى رەسەي ەلشىلىگىنىڭ كونسۋلدىعىندا رەسەي ازاماتتىعىن الادى. تيىسىنشە، تولقۇجات راسىمدەمەگەن، تەك وزگە ەلدىڭ ازاماتتىعىن العان، سويتە تۇرا قازاقستان ازاماتتىعىنان باس تارتپاعان.
ءبىزدىڭ ەلدە مۇنداي جايتتار بار ەكەنى جاسىرىن ەمەس. كوبىنە رەسەيمەن شەكارالاس ايماقتاردىڭ قاراپايىم تۇرعىندارى ەكىجاقتى ازاماتتىق الادى دا ونى جاسىرىپ جۇرەدى» دەلىنگەن حاتتا.
گولوۆاتيۋك دەگەن كىم؟
حاتتا سوراقى مالىمەتتىڭ باسى اشىلىپ وتىر. «رەسەيمەن شەكارالاس ايماقتاردىڭ قاراپايىم تۇرعىندارى ەكىجاقتى ازاماتتىق الىپ العان» دەيدى. بۇل ولارعا نەگە كەرەك؟
ال الگى رەسەي ازاماتتىعىن الىپ العان گولوۆاتيۋك دەگەن كىم؟ سويتسەك قاتارداعى ادام ەمەس ەكەن…
«ول – شىعىس قازاقستان وبلىستىق ءماسليحاتىنىڭ حاتشىسى! ياعني، شەكارالىق ايماقتىڭ وكىلدىك بيلىگىنىڭ جەتەكشىسى! وبلىستىڭ باستى تۇلعالارىنىڭ ءبىرى! ماسەلەن، قىتايداعى ىلە-قازاق اۆتونومياسىنىڭ باسشىسى نەمەسە رەسەيدەگى ورىنبور وبلىستىق دۋماسى جەتەكشىسىنىڭ قازاقستان ازاماتتىعى بولۋى مۇمكىن بە؟ جوق! ال ءبىزدىڭ ەلدە ءبارى مۇمكىن!» دەپ جازىلىپتى حاتتا.
دالەل بار…
جازىلعان جاي دالەلدەلى بولۋ ءۇشىن حاتپەن قوسا رەسەي فەدەراتسياسى فەدەرالدىق ميگراتسيا قىزمەتىنىڭ ەلەكروندى بازاسىنان كوشىرىلگەن قۇجات تا جىبەرىلگەن.
«وندا گولوۆاتيۋكتىڭ 1998 جىلدان باستاپ كورشى ەلگە جىلىنا بىرنەشە رەت باراتىنى كورسەتىلىپتى. ءدال وسى قاعازدا 1998 جىلدىڭ 12 تامىزىندا ۆ.م.گولوۆاتيۋككە رەسەي ازاماتتىعىن بەرۋ تۋرالى شەشىم قابىلدانعانى جازىلعان.
شقو وبلىستىق ءماسليحاتى حاتشىسىنىڭ رەسەي ازاماتى رەتىندەگى جەكە ءىس-قۇجاتىنىڭ ءنومىرى دە انىقتالعان – 170309960» دەپ جازىلىپتى حاتتا.
بۇل ۇلتتىق قاۋىپىزدىككە تونگەن قاۋىپ!
ايتپاقشى، حاتتى سەرىك حاسانوۆ ەسىمدى ارىپتەسىمىز دايىنداپتى.
«قازاقستان مەن رەسەي – كورشىلەر، دوستاس مەملەكەتتەر، بىراق بىلدەي ءبىر ءوڭىردىڭ جاۋاپتى قىزمەتىنىڭ تىزگىنىن وزگە ەل ازاماتىنىڭ ۇستاپ وتىرعانى مەملەكەتتىك قاۋىپسىزدىك قاعيدالارىنا قايشى. ماسەلەن، ەل پرەزيدەنتى وسكەمەنگە جۇمىس ساپارىمەن باردى دەلىك، ونىڭ جول ءجۇرۋ باعىتتارىنان كورشى ەلدىڭ ءتۇرلى قىزمەتتەرى مالىمەت الىپ وتىرمايتىنىنا كىم كەپىلدىك بەرە الادى؟
وبلىس ورتالىعىنىڭ اسكەري بولىمشەلەرىنەن باستاپ ستراتەگيالىق كوممۋنيكاتسيالار جۇيەلەرىنە دەيىن ءتۇرلى مەكەمەلەردىڭ ىشكى اقپاراتتارى مەملەكەتتىك قۇپياعا جاتادى. وزگە ەل ازاماتىنىڭ ولاردى وڭاي ءبىلىپ وتىرۋعا مۇمكىندىگى بار. بۇل ۇلتتىق قاۋىپىزدىككە تونگەن قاۋىپ بولماعاندا نە؟» – دەيدى ول.
رەسەي گولوۆاتيۋكتى «ساتپايدى»
ءيا، ساتپايدى. حات اۆتورىنىڭ ايتۋىنشا، گولوۆاتيۋكتىڭ رەسەي ازاماتتىعى جونىندە سول ەلدىڭ ءتيىستى مەكەمەلەرىنە سۇراۋ سالىپ كورۋگە بولادى. بىراق، ولاردىڭ راستاي قويۋى كۇماندى ەكەن.
P.S. ءازىر بۇعان ءوز تاراپىمىزدان باعا بەرۋ ارتىقتاۋ بولار. ماقالا جارىق كورسىن. شىعىس قازاقستان اكىمدىگى ءۇنسىز قالماس. الايدا گولوۆاتيۋكتىڭ رەسەي ازاماتتىعىن الىپ العانى ءارى كورشى ەلگە ءجيى ساپارلاپ بارىپ تۇراتىنى راس بولسا، بۇل مەملەكەتتىڭ دەڭگەيدەگى داۋ بولارى انىق. ءبىر اۋىز سوزبەن، مۇنى ساتقىندىق دەپ باعالاۋعا بولادى.
kaz.365info.kz
پىكىر قالدىرۋ