اقش پرەزيدەنتى دونالد ترامپ ءوزىنىڭ اقش-قا كەلەتىن ميگرانتتار اعىنىن تەجەۋ جوسپارى اياسىندا سيريادا بوسقىندارعا ارنالعان “قاۋىپسىز ايماق” قۇرماق نيەتتە ەكەنىن مالىمدەدى. “سيريادا ادامدارعا ارنالعان قاۋىپسىز ايماق قۇرام” دەدى ترامپ ABS News تەلەارناسىنا بەرگەن سۇحباتىندا. ول ەۋروپا وداعىنىڭ (ەو) نەگىزىنەن سيرياداعى ازاماتتىق سوعىستان شىققان بوسقىندار ماسەلەسىمەن كۇرەسىن سارالاپ، وسىنداي شەشىم قابىلداعانىن ايتى.

“ەۋروپا ول ميلليون ادامنىڭ گەرمانيا مەن باسقا دا ەلدەرگە كەلۋىنە رۇقسات بەرىپ، ۇلكەن قاتەلىك جاسادى دەپ سانايمىن” دەدى ترامپ سۇحباتىندا.

اقش پرەزيدەنتى Cيريادا “قاۋىپسىزدىك ايماعىن” قۇرۋدى “مۇسىلمان ەلدەرىنەن شىققان بوسقىندار مەن باسقا دا يمميگرانتتاردان تونەتىن تەرروريزم قاۋپىنە” قارسى تۇرۋ تاسىلدەرىنىڭ ءبىرى دەپ بىلەتىنىن ايتتى. امەريكالىق باق ترامپ ايتقان “قاۋىپسىزدىك ايماعى” تۋرالى وكىم ميگراتسيالىق ساياساتتى كۇشەيتۋ تۋرالى وزگە دە جارلىقتارمەن بىرگە شىعۋى مۇمكىن دەيدى. ترامپ كەشە سيريادان كەلەتىن بوسقىنداردى تەجەۋ جانە سيريا، يراك، يران جانە باسقا دا مۇسىلمان ەلدەرىنەن شىققاندارعا ۆيزا بەرۋدى توقتاتاتىن جارلىقتار شىعارعان.

Reuters اگەنتتىگى “قاۋىپسىزدىك ايماعى” تۋرالى جارلىقتىڭ جوباسىن كورگەنىن حابارلايدى. جوبادا مەملەكەتتىك دەپارتامەنت پەن پەنتاگون 90 كۇن ىشىندە سيريا مەن وعان تەرريتوريادا ەلىن تاستاپ، قاقتىعىستىڭ توقتاۋىن نەمەسە ءۇشىنشى ەلگە اۋىسۋدى كۇتىپ جاتقان سيريالىقتار “قاۋىپسىزدىك ايماعىن” قۇرۋ جوباسىن دايىنداۋى قاجەت دەلىنگەن.

اقش-تىڭ بۇرىنعى پرەزيدەنتى باراك وباما مۇنداي شارالارعا اقش-تىڭ سيرياداعى سوعىسقا بۇرىنعىدان دا كيلىكتىرەدى جانە سيريادا اۋە شابۋىلىن جۇرگىزىپ جاتقان رەسەي اسكەريلەرىمەن قاقتىعىسقا ۇرىندىرۋى مۇمكىن دەگەن قاۋىپپەن قارسىلىق تانىتقان.

ترامپ ەگەر جوسپارلانعان تەرريتوريادا “قاۋىپسىزدىك ايماعىن” قۇرۋعا شەشىم قابىلداسا وباما ويلاعانداي كيكىلجىڭ تۋى مۇمكىن. بۇدان وزگە، “قاۋىپسىزدىك ايماعىنداعى” ازاماتتاردى قورعاۋ ءۇشىن اسكەر كىرگىزۋ قاجەت بولادى. بۇل – سيرياداعى داعدارىسقا كيلىگۋدىڭ قارجىلىق تۇرعىدان دا، ادام رەسۋرسى تۇرعىسىنان دا شىعىنىن ارتتىرادى.