ۇلىبريتانيا پرەمەر-ءمينيسترى تەرەزا مەي 26 قاڭتاردا اقش-قا ساپارى بارىسىندا رەسپۋبليكاشىلداردىڭ پارتيالىق كونفەرەنتسياسىندا باتىس ەلدەرىنىڭ رەسەيمەن قارىم-قاتىناسى “ىنتىماقتاسۋ، بىراق ساقتانۋ” فورمۋلاسىندا ءتۇزىلۋى ءتيىس ەكەنىن مالىمدەدى.

“بۇل – رونالد رەيگاننىڭ “سەنىم ءبىلدىر، بىراق تەكسەر” دەگەن ۇرانىن باسقاشا سوزبەن جەتكىزۋ. رەيگاننىڭ رەسەيگە قاتىستى ساياساتى وسى ءسوزدىڭ شەڭبەرىندە جۇرگىزىلدى” دەدى مەي. ونىڭ سوزىنە قاراعاندا، “رەسەيمەن قايشىلىققا كەلمەۋ جانە قىرعي-قاباق سوعىسى كەزەڭىنە قايتا ورالماۋ مۇلدەم مۇمكىن ەمەس”، بىراق ماسكەۋمەن ديالوگتى تاجىكەلەسۋدەن گورى ىنتىماقتاسۋعا بەيىم تۇراتىنداي ەتىپ جۇرگىزۋ قاجەت.

ۇليابريتانيا جەتەكشىسى سونىمەن قاتار بريتان-امەريكا بايلانىسىن نىعايتۋ قاجەتىن دە ايتتى. بىراق ول الەمدىك ءتارتىپتى قايتا ءتۇزۋ ءۇشىن شەتەلدەردە بىرلەسە اسكەري وپەراتسيالار جۇرگىزۋ ءداۋىرى كەلمەسكە كەتكەنىن جەتكىزدى.

“بىراق بۇل ءبىز باتىل اسكەري قادام جاساۋدى تالاپ ەتەتىن شىنايى قاۋىپ-قاتەردىڭ الدىندا ارەكەتسىز بولامىز دەگەندى بىلدىرمەيدى” دەدى مەي.

تەرەزا مەي مەن دونالد ترامپ كەلىسسوزى بۇگىن بولادى. مەي – ترامپتىڭ پرەزيدەنت رەتىندە كەزدەسەتىن العاشقى مەملەكەت باسشىسى.

مەي قاراشاداعى پرەزيدەنت سايلاۋىندا رەسپۋبليكاشىل كانديداتتىڭ جەڭىسكە جەتكەنىنە كوڭىلى تولاتىنىن ءبىلدىردى. “مەن ءۇشىن وسىندا بۇگىن، امەريكانىڭ قايتا تۇلەۋىنىڭ باسىندا سىزدەرمەن بىرگە بولۋ ۇلكەن مارتەبە” دەدى مەي رەسپۋبليكاشىلداردىڭ باسشىلىعىنا قاراتا.

تەرەزا مەي ترامپ اكىمشىلىگىن يرانمەن يادرولىق كەلىسىمنەن شىقپاۋعا، رەسەيمەن كورشىلەس ەلدەردى قورعاۋعا جانە حالىقارالىق ۇيىمداردى، ونىڭ ىشىندە ناتو، دۇنيەجۇزىلىك بانك پەن حالىقارالىق ۆاليۋتا قورىن قولداۋعا شاقىردى.

ازات ەۋروپا / ازاتتىق راديوسى