قانان اتامىزدىڭ ءومىر بايانىنان دەرەك: “قاسيەتتى التايدىڭ تەرىسكەي بەتى بايان-ولگەي ايماعىنىڭ ساقساي اۋىلىندا 1936-جىلى رۋى كەرەي، شەرۋشى، تولەك داۋلەسكەر كۇيشى بايىسقان شالدىڭ شاڭىراعىندا دۇنيەگە كەلگەن. جاستايىنان زەرەك، ەڭبەك قۇمار اتامىز 1945-جىلى مەكتەپ تابالدىرىعىن اتتاپ، 1955-جىلى مەكتەپتى ءبىتىرىپ، ۇلانباتىر قالاسىنا پوليتەكنيكالىق تەحنيكۋمعا جولداما الىپ 1958-جىلى ۇزدىك بىتىرگەن. ۋۆس ايماقتىق “ياۆارى” كومىر شاحتاسىندا تەحنيكشى ماماندىعىمەن ەڭبەك جولىن باستاپ، 1965-جىلى بايان-ولگەي ايماعىندا جول جوندەۋ مەكەمەسىندە اعا تەحنيكشى، 1970-جىلدان باستاپ ايماقتىق جول جوندەۋ جانە قۇرىلىس سالۋ مەكەمەسىنىڭ باستىعى بولىپ 25 جىل قالتقىسىز تابىستى ەڭبەك ەتىپ زەينەتكە شىققان. ايماقتىڭ جول قاتىناسىن سالۋعا ولشەۋسىز ەرەن ەڭبەك ءسىڭىرىپ، باسقارۋ سالاسىندا تىڭ يدەيالارىمەن قۇرمەتكە بولەنگەن شەبەر ۇيىمداستىرۋشى باسشى بولدى. اسىل اعامىزدىڭ ەڭبەگىن مونعوليا مەملەكەتى جوعارى باعالاپ “التىن جۇلدىز” وردەنى، 1989-جىلى مەملەكەتكە “ەڭبەك سىڭىرگەن قايراتكەر” اتاعىن جانە تاعى باسقا وردەن-مەدالدارمەن ماراپاتتالعان. اسىل جار، 7 بالانى ۇلىن ۇياعا، قىزىن قياعا ۇشىرعان ۇلاعاتتى اكە، نەمەرەلەرى ۇلگى تۇتارلىق اتا، اعايىن-تۋىستىڭ اۋىلدىڭ داناگوي اقساقالى بولدى.
2000-جىلدىڭ باسى كەزىندە اتامىز اتامەكەنىمىز قازاقستانعا كوشەر الدىندا اكەم مارقۇم اعا-جەڭگەمدى قوناق قىلام دەپ ۇيگە شاقىرىپ ءدام تاتقىزىپ، شۇيىركەلەسىپ كەلەلى اڭگىمە دۇكەن قۇرعانى ەسىمدە…
اتاجۇرتقا ءۇرىم-بۇتاعىمەن جەر ءجانناتى جەتىسۋعا كونىس اۋدارعان.
ۇرپاقتارى اتامەكەننىڭ ءار سالاسىندا جەمىستى ەڭبەك ەتۋدە.

بار عۇمىرىن ەلدىڭ دامۋ يندۋستريا سالاسىنا سارپ ەتكەن اتامىزدىڭ توپىراعى تورقا، يمانى جولداس بولسىن! ارتىندا قالعان ۇرپاقتارىنا جاسىن دا، باعىن دا بەرسىن! جاراتقان يەمىز اتادان اسىپ تۋاتىن ۇرپاقتار بەرۋدى ءناسىپ ەتسىن!
مارقۇم اتامىزدىڭ جارقىن بەينەسىن، ادامگەرشىل قاسيەتىن ماڭگى ۇمىتپايمىز!
بۇگىن 31-قاڭتار 2017-جىلى ازاندا تالدىقورعان قالاسى جانىنداعى كوكسۋ اۋدانى، بالپىقبي اۋىلىندا جانازا بولاتىنىن الىس-جۋىقتاعى اعايىن-تۋىستارعا حابارلايمىز!

باقىتبول بەرىمبايۇلىنىڭ  facebook پاراقشاسىنان  الىندى