ابىلايدىڭ وكىنىشى
kerey.kz
قالماقتارمەن بولعان ءبىر شايقاستا مالايسارىنىڭ ساۋىتىنىڭ جىرتىق جيەگىنەن وق تيەدى. ونى تۋ سىرتىنان بايقاعان ابىلاي حان: «مالايسارى امان ەمەس، اتى كيرەلەڭدەپ قالدى»، – دەپتى.
ايتسا ايتقانداي مالايسارىنىڭ بەل تۇسىنان وق ءوتىپ، قان ساۋلاپ تۇرسا كەرەك. باتىردى قوسىنا الىپ كەلىپ جاتقىزعان سوڭ، ابىلاي: «بارلىق تاماقتى بەرسەڭدەر دە، ەسكى قاتقان ءسۇر ەت بەرمەڭدەر، ىشەگى جارىلادى. ونان سوڭ ۇيىرگە قوسىلمايدى»، – دەيدى.
مالايسارىنى باقىرشىسى قوستا باتىردى باعىپ جاتا بەرەدى.كۇندە جاس مالدىڭ ەتىن جەۋگە مۇمكىندىك بولمايدى. ءبىر كۇنى مالايسارى باقىرشىسىن شاقىرىپ: «قىزىل تۋرام ەتكە ءتىسىمدى تيگىزبەسەڭ، باسىڭدى شاۋىپ تاستايمىن»، – دەپ قاھارلانادى.
ءسويتىپ قازىنىڭ ورتاسىنان كەستىرىپ ەت استىرىپتى. حان ابىلاي سول كۇنى مالايسارىنىڭ ءتۇرىنىڭ بۇزىلىپ كەلىسپەي تۇرعانىن بايقاپ: «ءسۇر ەت بەردىڭدەر مە؟» دەگەندە، باقىرشى: «قازىنىڭ ورتاسىنان بەرىپ ەدىك»، – دەيدى. سوندا حان: «ەندى ادام بولمايدى، جالعىز-اق ءىلىنىپ تۇرعانى – ىشەگىنىڭ بۇتىندىگى ەدى. ءاي، كەلىسپەدى-اۋ!» – دەسە، مالايسارى: «ازىرەيىل شىركىن قايدا ءجۇر ءوزى؟»،- دەي بەرۋشى ەدىم. سويتسەم، الا قورجىننىڭ تۇبىندە بۇعىپ جاتا بەرگەن ەكەن عوي»، – دەپتى. اقىرى سول ساپاردا باتىردىڭ دەمى تاۋسىلىپ، سۇيەگىن ەلگە الىپ كەلىپ قويىپتى.
«اڭىز ادام» جۋرنالىنان ىقشامداعان
ماناربەك قىدىربايۇلى
Kazakh-tv.kz
پىكىر قالدىرۋ