Көкбастауда топ жарған
kerey.kz
Президент кубогі
Көкбастауда топ жарған
Алматы облысы әкімдігінің демеуімен Жамбыл ауданындағы «Көкбастау» ипподромында Қазақстан Республикасы Президентінің кубогы үшін ел Тәуелсіздігінің 25 жылдығына Конституция күніне орай ұйымдастырылған ат спорты түрлерінен өткен дүбірлі жарыс өтті. Оған Қазақстан Президенті кубогын жеңіп алу үшін Республикамыздың түкпір-түкпірінен келген шабандоздар мен жалдарынан жел есіп, атқан оқша зулаған сәйгүліктерінің қарымы осы жарыста сыналды. Сонымен қатар көрші қырғыз елінің тұлпарлары да жарыс жолында бой көрсетті.
Жұрт толық жиналып, сәйгүліктер сайланып болғансоң Қазақстан Республикасының Мемлекеттік Гимні орындалып, әуезді саз биікке қалықтады. Халық алдындағы сахна төріне шыққан «Сүйінбай сазы» фольклорлық-этнографиялық ансамбілінің өнерпаздары ән мен күйді төкпелеп мереке шырайын кіргізді.
Президент кубогі жүлдесіне арналған ат спорты түрлерінің жыл сайын өткізілуі тұғырлы Тәуелсіздігіміздің арқасы десек қателеспейміз. Ат бәйгесіне 7 автокөлік және ақшалай сыйлықтар белгіленді. Межелі уақытта белгілі атбегі, жарыстың бас төрешісі Орынтай Әмірғалиев бастаған шабандоздар жанкүйерлер алдынан салтанатпен сап түзеп өтті.
Дүбірлі жарыстың салтанатты ашылу рәсімінде, Алматы облысының әкімі Амандық Баталов Еліміз егемендігін алғаннан бері Елбасымыздың сарабдал саясатының арқасында бейбіт ғұмыр кешіп, ұлттық құндылықтарымызды қайта жаңғыртып, ата салтымыз жанданып берекелі елге айналдық. Салауатты өмір салтын қалыптастыру, ат сопрты түрлерін дамыту үшін, Алматы облысында көптеген шаралар жүзеге асырылды. Әр түрлі деңгейдегі ұлттық спорт жарыс түрлерін тұрақты түрде өткізіп келеді. Соның бірі бүгінгі Қазақстан Республикасы Президентінің кубогі үшін өткізіліп отырған Республикалық жарыс. Біз ежелден ат құлағында ойнап желмен жарысып сайгүлік баптаған елдің ұрпағы екенімізді мақтан тұтамыз дей келе, Конституция күнімен құттықтап, дүбірлі дода жүзден жүйрік, мыңнан тұлпар шығатын сәйгүліктерге, шабандоздарға сәттілік тілеп, ұйымдастырушыларға ризашылығын білдірді.
Тері алынып, бабына келген 29 тай 5шақырым жарыс жолына шығып, дала төсін дүбірлетті. Соңғы айналымда топ жарып мәреге жеткен Жамбыл ауданынң тумасы Ахаттың иелігіндегі «Жұлдызы» бірінші болса, Қарасай ауданының намысын қорғаған Жанқұлиевтер әулетінің «Темірі» екінші, Көксу ауданынан Мұрат Күлтеновтың «Еркеторысы» үшінші, Алакөл ауданынан Байбатыр Сатыбалдиннің «Наркүреңі» төртінші, Ескелді ауданынан Ақылбай Ақберліннің «Күнқуары» өзара бөлісті. Арасында жігіттің ептілігі мен жылдамдығын анықтайтын теңге ілуде Мәртжан Мейіржаннан ешкім аса алмады. 9 шақырымдық Жорға жарысына 24 жорға шығып, Су төгілмес жорғалар ішінен ойқастап жеткен Жамбыл ауданы намысын қорғаған Асылбек Бөкебаетің «Жойқыны» бірінші орын, Шығыс Қазақстан облысынан келген Николай Шапаревтің «Эелегнті» екінші орын, Үшінші төртінші орындарды Қырғызстан елінен Алипбек Жүнісовтің «Гангі» Замирбек Мұқашевтің «Пленникі» өзара бөліссе бесінші орынды Жамбыл ауданынан Асылбек Бөкебаевтің «Сұлуторысы» алды. 11 шақырымдық Құнан бәйгеде 49 құнан бақ сынады. Бірден топала жүйткіген жүйріктер арасынан оқ бойы озы шығып, құйындай құйғытып мәреге жеткен Жамбыл облысынан Мұрат Өсербаевтің «Ажарторысы» бірінші, тағыда Жамбыл облысынан Әлібек Жұмабектің «Жадраты» екінші, Қарасай ауданынан Сейтжан Қайқыбаевтің «Самиры» үшінші, Жамбыл облысынан Есбол Шыңтасотың «Таусамалы» төртінші, Қарасай ауданынан Майлыбаевтар әулетінің «Миледиіне» бесінші орын бұйырды. 16 шақырымдық Топ бәйгеде 40 ат бақ сынасып Топжарған Қарасай ауданынан Әлнұр Назарбаетің «Сүлікқарасы» бірінші, Жамбыл ауданынан Ұлан Омаровтің «Беріктасы» екінші, Жамбыл облысынан Мұрат Өсербаетің «Шехризаты» үшінші, Балқаш ауданынан Нарымбет Әдібаевтің «Шайкүреңі» төртінші , Қарасай ауданынан Әлнұр Назарбаетің «Босмойыны» бесінші орыннан көрінді. Кезек 25 шақырымдық аламан бәйгеге де келіп, Үміттерін үкілеген 39 тұлпадың арасынан 9 айналымға шыдас берген желтұяқтардың айы оңынан туды десе де болады. Сонымен Қарасай ауданынан Әлнұр Назарбаевтің «Миллионері» бірінші, Жамбыл облысынан келген Серік Сұлтанбаевтің «Атиласы» екінші, Қарасай ауданынан Әлнұр Назарбаевтің «Қозыкүреңі» үшінші, Жамбыл облысынан Есбол Шыңтасовтың «Самалы» төртінші, Маңғыстаулық Әбдіғали Таңатаровтың «Джекпоті» бесінші болып мәре сызығын басты.
Жеңімпаздар мен жүлдегерлерді марапаттау рәсімінде, 25 шақырымдық Аламан бәйгеде мәреге қара үзіп жеткен «Миллионер» деген аттың иесі, Әлнұр Назарбаевқа, КСРО-ның еңбек сіңірген спорт шебері, Мәскеу Олимпиадасында Қазақстаннан шыққан тұңғыш Олимпиада чемпионы Жақсылық Үшкемпіров Президент кубогі мен жол талғамайтын Автокөліктің кілітін табыстады. Бәйгенің басқа да түрлеріне тігілген жеңіл автокөліктер мен ақшалай сыйлықтарды Алматы облысы мәслихатының хатшысы Серік Мұқановпен Алматы облысы ардагерлер кеңесінің төрағасы Ермек келемсейтов табыстады. Дүбірлі жарыс өткен, Көкбастау спподромын жұртшылық қимай тарқасты.
Көгедай ШӘМЕРХАН
kerey.kz
Пікір қалдыру