Memleket basşısı sessiyağa qatısuşılardı Wlttıq ğılım akademiyasınıñ 70 jıldığımen qwttıqtap, onıñ zamanaui Qazaqstandı damıtuğa qosqan ülesin atap ötti.

– Büginde Ğılım akademiyası salalıq jäne öñirlik bölimşeleri bar iri ziyatkerlik ortalıqqa aynaldı. Bwl rette ol Franciya, AQŞ jäne basqa da elderdegi ğılım akademiyaları siyaqtı ğılım üşin jat närsemen – äkimşilendirumen aynalıspaydı. Ğılım salasın ortalıqtandırudıñ, onda qalıptasatın monopoliyanıñ tiimsiz ekenin älemdik täjiribe körsetip otır, – dedi Qazaqstan Prezidenti.

Nwrswltan Nazarbaev Qazaqstan ğılımınıñ qalıptasuındağı Akademiyanıñ eñbegin erekşe atap ötip, elimizdiñ ğılımi äleuetin «Qazaqstannıñ üşinşi jañğıruı: jahandıq bäsekege qabilettilik» attı joldaudı iske asıruğa paydalanudıñ mañızdılığına nazar audardı.

Sonımen birge, Elbası otandıq basqaru jüyesi men ğılımi qızmetti üylestiruge qatıstı birneşe özekti mäselege toqtaldı.

– Biz ğılımdı ortalıqsızdandırdıq. Köptegen böligin joğarı oqu orındarına berdik, alayda olardıñ bäri äli innovaciyalıq ortalıqtarğa aynala qoyğan joq. Qazaqstannıñ ğalımdarı öz jwmıstarın belsendi türde patentteude. Biraq olardıñ basım köpşiligine swranıs joq. Ğılım negizinen memleket esebinen qarjılandırıluda. İs jüzinde naqtı sektordan tapsırıs tüspey jatır. Sonımen qatar, ğılımi jwmıstarda plagiat jii kezdesedi, – dedi Memleket basşısı.

Osığan oray Qazaqstan Prezidenti otandıq ğılımdı damıtuğa qatıstı wstanımdardı tübegeyli özgertudi tapsırıp, osı bağıtta birqatar naqtı mindetter belgiledi.

– Biz ğılımi jäne ğılımi-tehnikalıq qızmet nätijelerin kommerciyalandıru turalı zañ qabıldadıq. Endi osı zañ tolıqqandı qoldanıluı qajet. Ğılımi-zertteuşilik qızmet nätijelerin qazaqstandıq käsiporındardıñ qajettilikterine bağıttaytın tetikter engizu kerek. Bizdiñ aldımızda importtı almastıru jäne eksporttıq öndiristi damıtu mindeti twr, – dedi Nwrswltan Nazarbaev.

Bwdan bölek, Qazaqstan Prezidenti akademiyanıñ äleuetin paydalana otırıp fundamentaldı jäne gumanitarlıq ğılımi jobalar saraptamasınıñ sapasın jaqsartu qajettigin ayttı.

– Ğılımdı basqarudıñ, onı qarjılandırudıñ jaña format boyınşa jäne uaqtılı jüzege asırılatın jaña jüyesi engizildi. Sonday-aq, Ğılım akademiyası janınan ädep jönindegi alqalı organ qwrudı wsınamın. Ol Ğalım kodeksin jäne Jariyalanımdar ädebi jönindegi kodeksti äzirlep şığa alar edi, – dedi Nwrswltan Nazarbaev.

Memleket basşısı Bilim jäne ğılım ministrligine Akademiyamen jäne joğarı oqu orındarımen birge otandıq ğılımi basılımdardı halıqaralıq reytingtik bazalarda ilgeriletu jwmıstarın jüzege asırudı tapsırdı.

Sonday-aq, Qazaqstan Prezidenti älemdik deñgeydegi ğılımi ortalıqtarda tağılımdamadan ötu üşin üzdik zertteuşilerge qosımşa granttar tağayındau, sonımen birge Ortalıq Aziya elderiniñ jas ğalımdarına Qazaqstanda ğılımi zertteu jürgizu üşin grant bölu mäselesin zerdeleu jöninde tapsırma berdi.