Memleket basşısı jobağa qatısuşılarğa älemde bolıp jatqan özgerister jöninde aytıp, qazirgi jağdaylarğa beyimdelu qajettigine nazar audardı.

Nwrswltan Nazarbaev jahandıq özgerister däuirinde «Ruhani jañğıru» bağdarlamasınıñ özektiligin atap ötip, onı iske asırudıñ aralıq nätijelerine toqtaldı.

Qazaqstan Prezidenti memlekettik tildi latın qarpine köşiru jönindegi joba turalı aytıp, bwl ürdistiñ bastı maqsatın atap ötti.

– Büginde ğılım jäne mädeniet turalı aqparattıñ 70 payızğa juığı ağılşın tilinde taraladı. Biz üş tilde bilim beruge köşetinimizdi jariyaladıq. Jastarımız qazirdiñ özinde ağılşın tilin meñgergen. Latın qarpine köşu damıp kele jatqan ortaq aqparat älemine enuimizge mümkindik beredi, – dedi Elbası.

Sonımen birge, Memleket basşısı «Jaña gumanitarlıq bilim» jäne «Tuğan jer» jobalarınıñ iske asırılu barısına toqtaldı.

– Biz eger qazaq tiliniñ damuı turalı aytar bolsaq, älemniñ üzdik bilimin ana tilimizde aluımız kerek. «Jaña gumanitarlıq bilim» jobası ayasında üzdik 100 oqulıqtı qazaq tiline audaru mäselesi qarastırılğan. «Tuğan jer» jobası boyınşa mınanı aytuğa boladı. Patriotizm tuğan üy men tuıp-ösken öñirden bastaladı. Biz kişi Otanımız arqılı bükil Qazaqstandı süyemiz. Qazir elimizde mecenattar tuğan jerine barıp, balabaqşa, mektepter men auruhanalar salıp jatır. Jalpı alğanda, büginde osı bağıtta 720-dan astam joba iske astı, – dedi Nwrswltan Nazarbaev.

Elbası «Qazaqstannıñ kieli jerleriniñ geografiyası» jobasınıñ halqımız üşin mäni zor ekenin aytıp, «Jahandağı zamanaui qazaqstandıq mädeniet» bağdarlamasınıñ mindetterin atap ötti.

– Biz älemdegi kieli jerler men olardıñ tarihı turalı jaqsı bilemiz. Al Qazaqstanda onday jerler joq pa? Qazirgi kezde osınday kieli 100 orındı anıqtau jöninde mindet qoyıldı. Olar turistik orınğa aynalatın boladı. Bizdiñ mädenietimiz bükil älemge tanıluğa tiis. Al «Jahandağı zamanaui qazaqstandıq mädeniet» jobası bizdiñ mädeni baylığımızdı dünie jüzine tanıtuı kerek, – dedi Qazaqstan Prezidenti.

Memleket basşısı «Qazaqstandağı 100 jaña esim» jobasın iske asırudıñ mañızdılığına nazar audarıp, kezdesuge qatısuşılarğa qoğam tarapınan artılğan jauapkerşiliktiñ mol ekenin eskertti.

– Sizder bayqaudıñ irikteu turınan öttiñizder. Dauıs beru internet arqılı jürgizildi. Sizder – biregey twlğasızdar. Täuelsizdigimiz sizderge talanttarıñızdı şıñdap, bolaşaqqa jol saluğa mümkindik berdi. Sizder öskeleñ wrpaqqa ülgi bolasızdar, – dedi Nwrswltan Nazarbaev.

Kezdesude «Qazaqstandağı 100 jaña esim» jobasına qatısuşılar ruhani jañğıru bağdarlamasınıñ iske asırılu barısı jöninde oy bölisip, özderiniñ jetistikteri turalı ayttı.

Elbası jobanıñ birneşe qatısuşısınıñ jetken jetistigimen tanısıp, qazaqstandıqtardıñ twlğalıq twrğıdan damuınıñ mañızdılığın atap ötti.

– Söz söylegenderdiñ barlığı turalı fil'm tüsirip, kitap jazuğa boladı. Adamdar odan şabıt aladı. Şın jürekten qwttıqtaymın. Jastarımız maqsatqa qaray talpınuğa tiis, – dedi Qazaqstan Prezidenti.

Memleket basşısı halıqtardıñ damıp, jahandıq ürdisterge beyimdeluiniñ älemdik täjiribeleri jöninde oy bölisti.

Soñında Nwrswltan Nazarbaev jobanıñ barlıq qatısuşısına tabıs tilep, olardı bwl jetistiktermen şektelmeuge şaqırdı.

Elbası kezdesu ayaqtalğan soñ «Qazaqstandağı 100 jaña esim» jobasına qatısuşılarğa arnalğan arnayı fotokörmeni aralap kördi.

Aqorda baspa-cöz qızmeti