Qazaqstannıñ sırtqı ister ministrligi «şeteldikterge vizasız rejim engizu – kez-kelgen täuelsiz eldiñ haqı» ekenin mälimdedi. Bwl turalı Tengrinews.kzhabarladı. Ministrliktiñ mwnday mälimdeme jasauına bir küni bwrın Reseydiñ sırtqı ister ministri Sergey Lavrovtıñ aytqan sözi sebep boldı. Lavrov Qazaqstannıñ AQŞ azamattarı üşin vizasız rejim engizui «Euraziya ekonomika odağınıñ ayasında kelisip aludı qajet etetinin» aytıp qalğan.

Lavrovtıñ sözinşe, Euraziya ekonomika odağınıñ territoriyasında vizasız rejim bar, sondıqtan mwnday şeşimder özara kelisilui qajet. Reseydiñ sırtqı ister ministri bwl mäseleni naurızdıñ 16-sı küni qazaqstandıq äriptesi Qayrat Abdrahmanovpen talqılaytının aytqan.

Jwma küni Astanağa Siriya kelissözi ayasında kelgen Lavrov äriptesi Abdrahmanovpen kezdeskenimen, däl osı mäseleni qozğağanı belgisiz. Azattıq tilşisine eki el ministrilerine swraq qoyuğa mümkindik berilmedi.

Alayda, keşkisin, birqatar jergilikti BAQ, Qazaqstan sırtqı ister ministrliginiñ resmi ökili Änuar Jaynaqovtıñ bwl mäselege qatıstı mälimdemesin jariyaladı.

Jaynaqov: «Euraziya ekonomika odağı sayasi wyım emes. Memleketter odağı turalı kelisim-şarttı talqılau kezinde,müşe elder onı sayasilandırudan jäne odaqtıñ ökiletine wlttıq derbestikti qozğaytın mäselelerdi qosudan sanalı türde bas tarttı» degen.

SİM ökiliniñ sözinşe, «Qazaqstandıq tarap viza rejimin oñaylatu halıqaralıq sauda-ekonomikalıq, ğılımi-tehnikalıq, mädeni- gumanitarlıq baylanıstı qarqındatıp, investiciyanıñ kelui men turizmniñ damuına, halıq arasındağı türli baylanıstardı nığaytuğa sep boladı dep sanaydı».

Bwrınğı diplomat, sarapşı Qazbek Beysebaev viza mäselesi är eldiñ işki jwmısı ekenin aytadı.

- Lavrov qatelesken bolar, ya onıñ qızmetkerleri dwrıs aqparat bermegen. Sebebi Qazaqstan tek Amerikamen emes, [Euraziya ekonomika odağına kirmeytin] özge birneşe memleketpen vizasız rejim ornatqan jäne ol birneşe jıl bwrın bolğan. Onı Lavrovtıñ bilmeui de mümkin. Degenmen kimmen vizasız rejim ornatam dese de, ol – Qazaqstannıñ öziniñ işki şaruası, – deydi Qazbek Beysebaev.

Al sayasattanuşı Rasul Jwmalınıñ sözinşe, Lavrov siyaqtı joğarı lauazımdı diplomattıñ qatelesui «käsibi deñgeyiniñ körsetkişin» bayqatadı.

- Euraziya ekonomika odağınıñ ayasındağı memleketterde özara vizasız jürip-twru mäselesi qamtılğan. Sonı jeleu etip, Reseydiñ sırtqı ister ministri öziniñ lauazımınan tısqarı mäselelerdi köterip otırğan sıñaylı. Bwl sol bayağı, postimperiyalıq, «Mäskeumen kelisip şeşu kerek» degen äreket. Sol arqılı bälkim, özderiniñ mañızın körsetkisi keledi. Sonday-aq, bwl Reseydiñ Qazaqstannıñ basqa memlekettermen ıntımaqtastığına, onıñ işinde qazir Reseydiñ Amerikamen arası salqındağan twsta bizdiñ Amerika jäne Batıs elderimen qarım-qatınasımızğa qızğanışpen jäne köre almauşılıqpen qarap otırğanınıñ körsetkişi, – deydi Rasul Jwmalı.

2014 jılı Qazaqstan ükimeti AQŞ bastağan 10 eldiñ azamattarı üşin 15 kündik vizasız sınaq rejimin jariyalağan edi. 2015 jılı bwl tizimge tağı 10 el qosılğan. 2017 jılğı jeltoqsannıñ 31-inen bastap bwl sınaq rejim tağı sozılğan. Qazir AQŞ azamattarı Qazaqstan territoriyasında 30 kün vizasız jürip-twra aladı. Bwğan jauap retinde AQŞ Qazaqstan azamattarına 10 jıldıq iskerlik jäne turistik vizalar bere bastağan.

Azat Europa / Azattıq radiosı