Sonımen, qañtar oqiğasınıñ jıldığındağı “arnayı parlamenttik tıñdau” ayaqtaldı. Bwl – älbette, eleuli oqiğa. Jılnamağa jazılatın, erteñ tañbalanıp qalatın, sen ölgen soñ da izdengiş wrpağıñ aşatın jayt. YAğni, bügin – qañtardıñ birjıldığında parlamentte qanday mälimdeme jasağanıñ tügel saqtaldı, qwjattalıp qattaldı degen söz. 1986 jılı jeltoqsan oqiğasınan soñ biraz qazaq ziyalısı “Nam gor'ko” degen maqalağa qol qoyıp, jeltoqsanşılardı “wltşıl, narkoman” dep qaralağan. Bekhojin, Qayırbekov, Serkebaev, Asanäliler qol qoyğan ol hatqa. Mınau da sonıñ bir türi. Basprokuratura men İşkisiminniñ bayandaması tüsinikti – ädettegidey ayıptau sarınında. “Bülikşiler men arandatuşılar bärin qirattı” degen sıñayda. Biraq, prokurorlardıñ aldına tüsip empeñdep, bilikti aqtap, “arandatuşılar men bülikşiler” turalı sayrap ketken deputattarğa ne jorıq?

Deputat J.Äşimjan: “qañtarda sintetikalıq esirtki men aşı suğa toyıp alğandar bülik saldı” degendi qanday faktimen, qanday tergeu materialdarına süyenip ayttı, bilgim keledi? 86 jılğı jastardı narkoman dep ayıptağandar qatarınan öziniñ de tabılğanın seze me eken, Janarbek? Deputat Q.Isa: “19 äskeri qaza boldı” dep qabırğası qayısqanda özge 220 bozdaq pen onıñ arasındağı säbi Aykörkemdi aytuğa, qwnın daulauğa däti nege jetpedi, estigim keledi? Eñ bolmasa aqın retinde onıñ jüregine tört jasar säbidiñ naqaq ölimi batpadı ma? Säbi men naqaq qwrbandar qwqığın swrauğa nege attamadı? Deputat E.Jañbırşin “eskertusiz oq atu bwyrığın” aqtauğa tırısıp, “Mañğıstauda, Qostanayda, Pavlodarda nege atpadı, Almatıdağı jwrt qarulı bolğasın attı?!” dep aşulandı. Mañğıstaudıñ beybit mitingisin Almatınıñ qaharlı künderimen qisınsızdau salıstırıp ketti. Al altınşı qañtarda Almatınıñ alañında “biz terrorist emespiz” dep plakat kötergen qarusız halıqqa twtqiıl şabuıldap, qırıp tastağan äskerdi esine almadı, swrau salmadı…

Qazir parlament pen ökimet qanşa jerden tırmıssa da, qañtarda bilik tarapınan qılmıs bar. Öltiru bar. Añırağan ana bar, kektengen jetim de öser. Al adam atuğa bwyrıq beruşi äu bastan anıq. Endigi swraq, az kündik bileuşini aqtap, onımen birge moynıña qan jükteuge dayarsıñ ba, deputat?

Qasım Amanjol