Jañalıqtar Sayasat

Almatı qalasınıñ jaña äkimi Bauırjan Baybek

kerey.kz

 |  Aug 10, 2015

Qazaqstan Prezidenti sapar ayasında qalalıq mäslihattıñ sessiyasına qatıstı. Sessiya barısında Almatı qalasınıñ jaña äkimi Bauırjan Baybektiñ kandidaturası deputattar tarapınan birauızdan qoldau taptı.

Memleket basşısı sonday-aq qala aktivimen kezdesip, jaña basşını tanıstırdı jäne megapolistiñ bwdan äri damu bağıttarın ayqındadı.

Qazaqstan Prezidenti “Astana   EKSPO-2017″ wlttıq kompaniyasınıñ basşılığına tağayındalğan Ahmetjan Esimov Almatı qalasınıñ äkimi lauazımında ülken jwmıs atqarğanın atap ötti.

Osı uaqıt aralığında qala eleuli nätijelerge qol jetkizdi, kelbeti özgerdi, barınşa ikemdi äri jaylı bola tüsti. Baspana qwrılısı qarqındı jürgizilip, jañadan eki audan payda boldı. Aziada tabıstı ötkizildi, qazirgi kezde Düniejüzilik studentter oyınına dayındıq jürip jatır. Almatıda şağın jäne orta biznes ekpindi damuda. Onıñ ülesi qala ekonomikasında 30 payızdan asıp, byudjet tüsimderiniñ üşten ekisin qamtamasız etip otır. Bwl – mañızdı körsetkiş, – dedi Nwrswltan Nazarbaev.

Qazaqstan Prezidenti atap ötkendey, A.Esimovtiñ täjiribesi qazirgi uaqıtta Astanada EKSPO körmesin wyımdastıru jäne ötkizu üşin qajet.

EKSPO-2017 – bizdiñ bolaşağımız. Körme nısandarınıñ qwrılısı – bwl mindettiñ tek bir qırı ğana. Onıñ basqa, äldeqayda mañızdı qırı – mazmwndıq tolığuı. EKSPO-2017 Qazaqstannıñ barlıq salada balama energetikanı damıtu arqılı jaña tehnologiyalıq qwrılısqa ötui üşin serpin berui tiis. Wlttıq kompaniyanıñ basşılığına ükimetpen, barlıq öñirlerdiñ äkimdikterimen is-qimıl jasaytın, investiciya jäne tehnologiya tartu üşin älemniñ ondağan elderimen jwmıs isteytin täjiribeli adam kerek, – dedi Memleket basşısı.

Nwrswltan Nazarbaev Almatı eldiñ iri qalası ğana emes, ekonomikanıñ lokomotivi äri ğılımi-ağartuşılıq ortalıq bolğandıqtan, onı basqaru täjiribeli jäne kreativti kadrdı qajet etetinine nazar audardı.

Bauırjan Baybek – osınday lauazımğa tağayındalıp otırğan «Bolaşaq» bağdarlamasınıñ birinşi tülegi. Ol sırtqı ister ministrligi jüyesinde, Prezident Äkimşiliginde jwmıs istedi, «Nwr Otan» partiyası törağasınıñ birinşi orınbasarı boldı. Qasımda jwmıs istey jürip, meniñ qızmetimdi kördi, bükil respublikamızdı araladı, mañızdı saylau nauqandarına qatıstı, al bizdi alda parlamenttik saylau kütip twr, bwl oñay sınaq emes. Onıñ qala aldında twrğan mindetterdi elde jüzege asırılıp jatqan bağdarlamalar ayasında sizdermen birlesip şeşe alatınına senimdimin, – dedi Qazaqstan Prezidenti.

Memleket basşısı Almatı qalasınıñ bwdan äri damuınıñ negizgi bağıttarın atadı. Birinşi kezekte, qalanıñ ğılımi jäne kadrlıq äleuetin, onıñ investiciyalıq tartımdılığın paydalana otırıp, investiciya tartu jäne jaña öndiris orındarın aşu jwmıstarın jandandıru kerek.
Sonday-aq şağın jäne orta biznesti qoldau jwmıstarın mülde jaña deñgeyge şığaru qajet boladı.

Almatı ejelden käsipkerliktiñ ortalığı bolıp sanaladı, sondıqtan ekonomika üşin kürdeli kezeñde biznestiñ belsendiligin tömendetpey, kerisinşe wlğaytu üşin memlekettik qoldaudıñ barlıq şaraların qabıldau kerek, – dedi Nwrswltan Nazarbaev.

Sonımen qatar Qazaqstan Prezidenti 2017 jılğı Universiadanı joğarı deñgeyde ötkizudi jäne salınğan barlıq nısandardıñ ol ötkennen keyin tiimdi paydalanıluın qamtamasız etudi  tapsırdı.

Nwrswltan Nazarbaev atap ötkendey, kölik infraqwrılımı jetildirudi qajet etedi, al onımen ekologiyalıq ahual da baylanıstı.

Qalada keptelister men kölik twraqtarı mäselesi äli künge tübegeyli şeşilgen joq. Jol toraptarı salındı, metro iske qosıldı, qoğamdıq kölikti gazğa köşiru jürip jatır. Mwnıñ bäri ahualdı aytarlıqtay jaqsartuğa kömektesedi, bwl jwmıstardı jalğastıru kerek, – dedi Memleket basşısı.

Qazaqstan Prezidenti tağı bir mañızdı bağıt retinde qaladağı qılmıstıq ahualdı jaqsartu mäselesin ayttı.

Biz Almatıda turizmdi damıtuğa niettimiz, sondıqtan qala qauipsiz äri ömir süru üşin jaylı boluı tiis, – dedi Elbası.

Sonday-aq Memleket basşısı studenttik ortalıq bolıp sanalatın megapoliste ğılım men bilimdi odan äri damıtudıñ, jastardı jwmısqa ornalastıru mäselesin şeşudiñ mañızdılığın ayttı.

Soñında Nwrswltan Nazarbaev el ekonomikasındağı kürdeli ahualdı eñseru jäne onıñ äri qaray jüyeli damuı köp jağdayda Almatınıñ tabıstı damuımen baylanıstı ekenine nazar audardı.