Tamız ayınıñ 30 küni Astana qalasında «Nwr Otan» partiyasınıñ qoldauımen QR Wlttıq sport türleri qauımdastığı Qazaqstan halqı assambleyasınıñ jılı ayasında QR Konstituciyasınıñ 20 jıldığına oray Teñge iluden İ Aşıq Aziya çempionatı jäne Asau üyretuden respublikalıq turnir wyımdastıradı.

Auqımdı şarağa Qıtay, Moñğoliya, Özbekstan, Täjikstan, Resey, Qırğızstan, Türkiya, Vengriya, Äzirbayjan respublikalarınıñ sportşıları qatısadı.

«Nwr Otan» partiyası tek qana «Teñge ilu» jäne mına asau üyretu, Altın twlpardan basqa da aytısqa da öziniñ ülesin qosıp, qoldauın körsetip keledi. «Bürkitşiler», «Audarıspaqtan» jarıstar ötti, «Qazaqstan Barısında» öziniñ qoldauın körsetip kele jatır. Sondıqtan, qoldaular partiyasınıñ tarapınan qaşanda öz jalğasın taba bermek», – dedi «Nwr Otan» partiyası Törağasınıñ birinşi orınbasarınıñ keñesşisi Berik Uäli.

Teñge ilu – halqımızdıñ köneden kele jatqan wlttıq sport türi. Teñge  iludiñ mañızına toqtalar bolsaq, ata-babalarımız el qorğaytın sarbazdardıñ äskeri-jauıngerlik dayarlığın jetildiru üşin beybit künderi, yağni, oyın-toylarda teñge ilu sayısın ötkizgen. Bwl sporttıñ atı aytıp twrğanday, sarbazdardı ıntalandıru maqsatında jerge qoyılğan bağalı altın-kümis teñgeni, şabandoz at üstinde jelip kelip, ilip alğan. Öytkeni, beybit zamanda äskeri maşığın joğaltpas üşin sarbazdar arasında  osınday sayıs türleri wyımdastırılğan. At üstinen eñkeyip teñge iludi meñgergen jauınger soğıs kezinde, jerde jatqan jebelerdi nemese qolınan susıp tüsken qaru-jarağın lezde ilip alıp, şayqastı jalğastıratın bolğan.

Sonday-aq, joğarıdağı Teñge ilu sayısımen qatar jügen-qwrıq timegen, şu asaudı er-toqım salmay, jügen-qwrıqsız jaydaq minip, bastıqtıru jarısı ötpek.

Asau üyretu – jigitti şınıqtırıp, jiger beretin, qaysarlıqqa tärbieleytin sporttıñ kürdeli türi. Bwl önerdiñ köneden kele jatqan mañızına nazar audarsaq: asau üyretu – uaqıt jäne jer tañdamaytın, ortaq qağidası joq, keñ dalada jürgizilgen. Asau üyretuşi – taqımı berik, at üsti qimıl-qozğalısın tolıq meñgergen, äri tulağan asau jılqınıñ möñku barısındağı ebedeysiz qozğalısına özin tez beyimday alatın qırağı, jürekti boluı kerek. Üyretilgen asaudı halqımız minis köligi, sonday-aq, ärtürli twrmıstıq qajettilikti öteuge paydalanatındıqtan, bwl istiñ köşpendiler üşin äleumettik-şaruaşılıq mañızı da zor.

Osı orayda, twñğış ret ötkizgeli otqan atalmış sayıs türi qazirgi tañda sporttıq sipat alıp, bekitilgen ereje boyınşa jürgizilude.

nurotan.kz