2002 jılı Qazaqstan prezidentimen “Qazaqstan” wlttıq telearnasında tikeley efir ötkizgen soñ translyaciya kezinde qarapayım körermenderden tüsken şağımdarğa qatıstı (ol kezde äli de jay halıqtıñ saual qoyu mümkindigi bar edi) memleket basşısı bergen nwsqaular qalay orındalıp jatqanı jaylı är senbi sayın ministrlerdi Astanadağı özim bas bolıp qwrğan Aqparat-saraptama direkciyasınıñ (DIAP) studiyasına kelip esep beruge şaqırdıq.

Ministrlerdiñ köpşiligi viceleri men komitet törağaların jiberip qaşqaqtauğa tırıstı, biraq bäribir özderin keltiru üşin biraz şayqasuğa tura keldi. Sol kezde öz salası boyınşa köterilgen ötkir mäselelerge eş qaşqaqtamay aytqan uaqıttan erte kelip, anıq esep berip ketken bir ministr boldı. Eşqanday kömekşisiz jalğız özi jetipti. Ol kisiniñ ğimaratqa kirgenin küzetşi bayqağan, bir orınbasarıma habarlağan. Orınbasar jigit meniñ kabinetime kirgizip ketken. Dispetçer äriptesimiz (hatşı qız wstağan emespin) meni kütip otırğanına ıñğaysızdanıp özi işip otırğan şayımen bölisken. Studiyadağı äriptestermen dekoraciya men jarıqqa qatıstı bir mäselelerdi pısıqtap qaytıp kelsem, bölmemde ministr otır. Kelisken uaqıttan erte keletinin bilmegenimdi aytıp ğafu ötinsem, “Joğa, eşteñe etpeydi” dep qoyadı. Sosın äñgimemizdi studiyada jalğastırdıq. Öz mekemesine qatıstı prezidentpen tikeley efir kezinde aytılğan eskertpe-şağımdardıñ ärqaysısına oray ne jasalıp jatqanın mwqiyat bayandap şıqtı. Barın bar, joğın joq dedi. Astananıñ bir auruhanasındağı därigerlerdiñ salğırttığınan sırqat bolıp qaldı dep sipattalğan bir büldirşin qızdıñ äke-şeşesi prezidentke arız aytqan edi, sol jağday boyınşa rasında da kinäli därigerdiñ tabılğanın, bas däriger men meñgeruşiden bastap bäriniñ qızmetten alınğanın, älgi kişkentaydı kvotamen Izrail'ge jiberu mäselesi qarastırılıp jatqanın habarladı. Mağan wnağanı – jay ğana ministr-menedjer emes, däriger-adam siyaqtı söyledi. Bwl habardan soñ densaulıq saqtau salasına qatıstı qanday da bir mäsele boyınşa habarlassaq, birden telefon twtqasın alıp jauap beretin. Keyin Qazaqstandağı aqparat pen äkimşilik salasınan ketip qalsam da, san ret däriger retinde järdem etken adamgerşiliginiñ kuäsi boldım. Osı aytıp otırğan ministr Jaqsılıq Dosqaliev bes jıl bwrın “jemqorlıqpen küres” nauqanı kezinde isti bolıp, köp wzamay bosap şıqtı. Özin sıylaytın käsibi ortasına, därigerlik iske qaytıp oraldı. Bilikten ketse de, käsibinen aynımağan täjiribeli mamandı häm adamgerşilik iesin “Jaqsı köru” seriyasınıñ ayasında jay eske alıp qoyğım keldi.

Ğalım Boqaş

Facebook-tegi paraqşasınan