2002 جىلى قازاقستان پرەزيدەنتىمەن “قازاقستان” ۇلتتىق تەلەارناسىندا تىكەلەي ەفير وتكىزگەن سوڭ ترانسلياتسيا كەزىندە قاراپايىم كورەرمەندەردەن تۇسكەن شاعىمدارعا قاتىستى (ول كەزدە ءالى دە جاي حالىقتىڭ ساۋال قويۋ مۇمكىندىگى بار ەدى) مەملەكەت باسشىسى بەرگەن نۇسقاۋلار قالاي ورىندالىپ جاتقانى جايلى ءار سەنبى سايىن مينيسترلەردى استاناداعى ءوزىم باس بولىپ قۇرعان اقپارات-ساراپتاما ديرەكتسياسىنىڭ (دياپ) ستۋدياسىنا كەلىپ ەسەپ بەرۋگە شاقىردىق.
مينيسترلەردىڭ كوپشىلىگى ۆيتسەلەرى مەن كوميتەت توراعالارىن جىبەرىپ قاشقاقتاۋعا تىرىستى، بىراق ءبارىبىر وزدەرىن كەلتىرۋ ءۇشىن ءبىراز شايقاسۋعا تۋرا كەلدى. سول كەزدە ءوز سالاسى بويىنشا كوتەرىلگەن وتكىر ماسەلەلەرگە ەش قاشقاقتاماي ايتقان ۋاقىتتان ەرتە كەلىپ، انىق ەسەپ بەرىپ كەتكەن ءبىر مينيستر بولدى. ەشقانداي كومەكشىسىز جالعىز ءوزى جەتىپتى. ول كىسىنىڭ عيماراتقا كىرگەنىن كۇزەتشى بايقاعان، ءبىر ورىنباسارىما حابارلاعان. ورىنباسار جىگىت مەنىڭ كابينەتىمە كىرگىزىپ كەتكەن. ديسپەتچەر ارىپتەسىمىز (حاتشى قىز ۇستاعان ەمەسپىن) مەنى كۇتىپ وتىرعانىنا ىڭعايسىزدانىپ ءوزى ءىشىپ وتىرعان شايىمەن بولىسكەن. ستۋدياداعى ارىپتەستەرمەن دەكوراتسيا مەن جارىققا قاتىستى ءبىر ماسەلەلەردى پىسىقتاپ قايتىپ كەلسەم، بولمەمدە مينيستر وتىر. كەلىسكەن ۋاقىتتان ەرتە كەلەتىنىن بىلمەگەنىمدى ايتىپ عافۋ وتىنسەم، “جوعا، ەشتەڭە ەتپەيدى” دەپ قويادى. سوسىن اڭگىمەمىزدى ستۋديادا جالعاستىردىق. ءوز مەكەمەسىنە قاتىستى پرەزيدەنتپەن تىكەلەي ەفير كەزىندە ايتىلعان ەسكەرتپە-شاعىمداردىڭ ارقايسىسىنا وراي نە جاسالىپ جاتقانىن مۇقيات بايانداپ شىقتى. بارىن بار، جوعىن جوق دەدى. استانانىڭ ءبىر اۋرۋحاناسىنداعى دارىگەرلەردىڭ سالعىرتتىعىنان سىرقات بولىپ قالدى دەپ سيپاتتالعان ءبىر ءبۇلدىرشىن قىزدىڭ اكە-شەشەسى پرەزيدەنتكە ارىز ايتقان ەدى، سول جاعداي بويىنشا راسىندا دا كىنالى دارىگەردىڭ تابىلعانىن، باس دارىگەر مەن مەڭگەرۋشىدەن باستاپ ءبارىنىڭ قىزمەتتەن الىنعانىن، الگى كىشكەنتايدى كۆوتامەن يزرايلگە جىبەرۋ ماسەلەسى قاراستىرىلىپ جاتقانىن حابارلادى. ماعان ۇناعانى – جاي عانا مينيستر-مەنەدجەر ەمەس، دارىگەر-ادام سياقتى سويلەدى. بۇل حاباردان سوڭ دەنساۋلىق ساقتاۋ سالاسىنا قاتىستى قانداي دا ءبىر ماسەلە بويىنشا حابارلاسساق، بىردەن تەلەفون تۇتقاسىن الىپ جاۋاپ بەرەتىن. كەيىن قازاقستانداعى اقپارات پەن اكىمشىلىك سالاسىنان كەتىپ قالسام دا، سان رەت دارىگەر رەتىندە جاردەم ەتكەن ادامگەرشىلىگىنىڭ كۋاسى بولدىم. وسى ايتىپ وتىرعان مينيستر جاقسىلىق دوسقاليەۆ بەس جىل بۇرىن “جەمقورلىقپەن كۇرەس” ناۋقانى كەزىندە ءىستى بولىپ، كوپ ۇزاماي بوساپ شىقتى. ءوزىن سىيلايتىن كاسىبي ورتاسىنا، دارىگەرلىك ىسكە قايتىپ ورالدى. بيلىكتەن كەتسە دە، كاسىبىنەن اينىماعان تاجىريبەلى ماماندى ءھام ادامگەرشىلىك يەسىن “جاقسى كورۋ” سەرياسىنىڭ اياسىندا جاي ەسكە الىپ قويعىم كەلدى.
عالىم بوقاش
Facebook-تەگى پاراقشاسىنان
پىكىر قالدىرۋ