Qıtayda tuğan etnikalıq qazaq Qanat Islam 2008 jılı Pekin olimpiadasına sol eldiñ atınan qatısıp, qola jülde ielengen. Ol 2010 jılı Qazaqstan azamattığın alıp, «Astana arlandarı» klubında bokstasqan. Biraq 2012 jılı London olimpiadasına Qazaqstan atınan qatısuına baylanıstı azamattıq-qwqıqtıq dau tuğan soñ käsipqoy boksqa bet bwrıp, AQŞ-qa ketken.

Sportşı Azattıqqa bergen swhbatında aldağı josparlarımen de bölisti.

Azattıq: – Soñğı kezdesude sizdi meksikalıq Aleksis Kamaçomen ringke şığadı dep habarlanğan. Biraq soñğı sätte qarsılasıñız auıstı. Ne sebep boldı?

Qanat Islam: – Meksikalıq boksşı basında «kezdesuge şığamın» dep kelisim bergen. Biraq soñğı sätte jekpe-jekten bas tarttı. Şıqpaymın degendi qinay almaysıñ. Basqa amal joq.

Qanat Islam men Fidel' Monterros Mun'ospen kezdesui. Kolumbiya, 7 tamız 2014 jıl.

​Azattıq: – Jıl basında «biıl bes-altı kezdesu ötkizudi josparlaymın» dep mälimdegen ediñiz. Biraq biıl ringke eki ret qana şıqtıñız. Josparıñızdı orındauğa ne kedergi bolıp jatır?

Qanat Islam: – Käsipqoy boksta bäri boksşı qalağanday bola qoymaydı. Jospardıñ orındalmauına sebep köp. Mäselen, meniñ därejemdegi qarsılastar tabılmadı. Key boksşılar öz talaptarın qoydı. Eki jaq – meniñ proumouterim men qarsılas boksşınıñ kompaniyası kelise almağan jayttar da boldı. Tamızda bir-eki qarsılas kelisim berip, keyin jekpe-jekke şıqpay qoydı.

Azattıq: – Köptegen boks mamandarı «Qanat Islam älemdik deñgeyge şığuı üşin mıqtı menedjer nemese proumouterlermen jwmıs isteu kerek» degen pikirdi jii aytadı. Bedeldi boks menedjerlerimen jwmıs isteuge mümkindik bar ma?

Qanat Islam: – Proumouterimdi auıstırmaymın. YAğni, bwrınğı proumouterim Nel'son Lopespen jwmıs istey beremin. Tağı bir jaqsı jañalıq – käsipqoy bokstağı eñ bedeldi Showtime telearnasınıñ iesi, Amerikadağı nomeri birinşi menedjer sanalatın El Heymonmen kelisim-şartqa qol qoydım. Aldağı uaqıtta ol meniñ kezdesulerimdi wyımdastıruğa kömektesedi. Ol osığan deyin Meyvezerdiñ menedjeri boldı. Qazir qazaqstandıq boksşı Beybit Şümenovpen de jwmıs istep jatır.

Azattıq: – Är kezdesuiñizden gonorar alasız ba?

Qanat Islam (ortada) qarsılası Reinaldo Eskuivia (sol jaqta) jäne menedjeri Nel'son Mendespen (oñ jaqta) birge. (Suret Nelsons kompaniyasınıñ resmi saytınan alındı).

​Qanat Islam: – Gonorar turalı aytuğa äli erte. Soñğı kezdesude Latın Amerikası çempionı degen atağımdı qorğadım. Aldağı kezdesulerimde IBF, WBC twjırımdarı boyınşa reytingtik kezdesuler ötkizsem degen josparlarım bar.

Azattıq: – Bıltır «Astana» prezidenttik klubımen aralarıñızda kelissözder bolğan edi. Odan nätije bar ma? Sizge «Astana» klubı aldağı uaqıtta demeuşi bola ma?

Qanat Islam: – Bıltır «Astana» klubımen kelissöz jürgizdik. Men öz şarttarımdı, olar öz şarttarın ayttı. Keyin «dağdarıs, byudjetti qısqartıp jatır» dep, kelissözder toqtadı.

Azattıq: – 21-kezdesuiñizdi qaşan ötkizbeksiz?

Qanat Islam: – Äzirge jwmıstar jürgizilip jatır. Qıtaydan, Reseyden wsınıs bar. Kelesi kezdesudi Qıtayda ötkizuim de mümkin. Biraq naqtı uaqıtı belgisiz.

Azattıq: – Qazaqstanda jekpe-jek ötkizuge mümkindik bar ma?

Qanat Islam: – Qazaqstanda jekpe-jek ötkizuge mümkindik az. «Kel, men jekpe-jegiñdi ötkizip bereyin» dep şaqırıp jatqan eşkim joq. Özim barıp ötkizbeymin ğoy. Bizde (Qazaqstanda – red.) käsipqoy boks keşterin wyımdastıru damımağanın bilesiz. Biraq aldağı uaqıtta bir kezdesu ötkizuge mümkindik bolsa eken deymin.

Azattıq: – Jattığu rejimiñiz, aldağı josparıñız qalay?

Qanat Islam: – Künine eki uaqıt jattığu jasaymın. Ağılşınşam da jaqsarıp qaldı. Otbasım qazir Almatıda. Jıl soñında Qazaqstanğa barıp qaytatın edim. Biıl elge barıp qaytu uaqıtı säl naqtılanbay twr. Däl qazir kelesi kezdesuimniñ ötetin uaqıtın naqtılap aluım kerek. Jıl soñına deyin tağı bir kezdesu ötkizsem deymin.

Azattıq: – Swhbatıñızğa rahmet.

Ruslan MEDELBEK

Azattıq radiosı