Memleket basşısı köpşilik aldında söylegen sözinde barşa qazaqstandıqtardı Qwrban ayt meyramımen qwttıqtadı, sonday-aq jinalğan jamağatpen äñgimelesti.

– Bügin külli älemniñ jäne Qazaqstannıñ mwsılmandarı jarqın mereke – Qwrban ayttı merekelep jatır. Barşañız bilesizder, 10 jıldan beri Qwrban ayt pen Rojdestvo demalıs künderi bolıp sanaladı. Bwl – islam dinine de, hristian dinine de memleket qamqorlığınıñ körinisi, – dedi Qazaqstan Prezidenti.

Sonday-aq, Nwrswltan Nazarbaev täuelsizdik jıldarında qol jetken tabıstıñ bäri elimizdegi birlik pen tınıştıqtıñ arqası ekenin atap ötti.

– Älemdegi ärbir din bizdi ıntımaqqa, izgilikke, bir-birimizdi qwrmetteuge şaqıradı. Qwranda öziñ toq bolıp, körşiñ aş otırsa, sen mwsılman bolıp sanalmaysıñ delingen. Onda mwsılmandardıñ ağımğa, jikke bölinbeytini de aytılğan. Nağız mwsılman – el-jwrtqa, qoğamğa, Otanına kömektesetin, barlıq dindi birdey köretin adam, – dedi Memleket basşısı.

Soñında Qazaqstan Prezidenti barşanı tağı da merekemen qwttıqtap, baq-bereke jäne tabıs tiledi.