AQŞ biligi 35 reseylik diplomattı elden quıp, Mäskeuge jaña ekonomikalıq sankciya salu turalı şeşimin jariyaladı. Bwl – Vaşingtonnıñ AQŞ-tağı prezident saylauı kezinde “Resey wyımdastırdı” dep sipattalğan hakerlik şabuılğa jauabı.

Aq Üy 29 jeltoqsan küni jariyalağan bwl şeşimniñ qabıldanğalı jatqanın prezident Barak Obama bwğan deyin de aytıp qalğan. Obamanıñ prezidenttik merziminiñ bituine bir ayday ğana uaqıt qaldı. Jaña saylanğan prezident Donal'd Tramp Aq Üy men CRU-dıñ prezident saylauı kezinde Reseydiñ hakerlik şabuıl jasağanı turalı mağlwmattarına qwlaq aspay kelgen. 20 qañtarda qızmetine kirisetin Tramp AQŞ-tıñ Reseyge salğan sankciyaların sozuğa qajettilik bar ma degen de mäsele kötergen.

Beysenbide Aq Üy taratqan mälimette Reseydiñ Merilend pen N'yu-Yorktegi diplomatiyalıq ökildikteriniñ tıñşılıq jasadı degen küdikpen jabılatını jazılğan. Sonımen birge 35 reseylik diplomat tıñşılıq jasağanı üşin “persona non grata” dep jariyalanıp, olardıñ AQŞ-tan ketuine 72 sağat uaqıt berilgen. Bwğan qosa Vaşington reseylik arnayı organdar – GRU men FSB-niñ toğız ökiline qarjı jäne sayahat sankciyaların saldı.

Prezident Obamanıñ atınan jariyalanğan mälimdemede: “Reseydiñ agressiyaşıl is-äreketine qarsı jasağan twtas şaramız bwl ğana emes. Uaqıtı men mekenine qaray tiisti şara qoldana beremiz, olardıñ keybiri äli jariyalanğan joq” degen joldar bar.

CRU, FBR men amerikalıq basqa da barlau wyımdarı Resey ükimetinen nwsqau alğan hakerler saylaualdı nauqan kezinde AQŞ Demokratiyalıq partiyasınıñ jäne basqa da lauazımdı ökilderdiñ serveri men elektrondıq poştalarına bwzıp kirdi degen twjırım jasağan.

9 jeltoqsanda The Washington Post gazeti CRU reseylik hakerler tek amerikalıq saylau jüyesine nwqsan keltirip qoymay, Tramptıñ prezident saylauında jeñip şığuına kömektespek boldı dep habarlağan. The New York Times gazeti hakerlerdiñ Respublikalıq partiyanıñ komp'yuterlerine de bwzıp kirgenimen bwl partiyağa nwqsan keltiretindey elektrondıq hattar men materialdardı äşkere etpegen dep jazğan.

Sarapşılar bwdan soñ Reseydiñ hakerleri Tramptıñ qolın Aq Üyge jetkizudi maqsat etti degen qorıtındı jasağan. Donal'd Tramp 8 qaraşada ötken prezident saylauında demokrat kandidat Hillari Klintonnan üstem tüsken bolatın.

Bwl twjırımdardı Tramp ünemi joqqa şığarıp kelgen. 11 jeltoqsan küni bergen bir teleswhbatında ol demokrattar özin jeñisten ayıru üşin CRU-diñ mälimetin paydalanıp bağıp jatır degen pikir aytqan.

Biraq Tramp Kongrestegi Respublikalıq partiya ökilderiniñ tarapınan da qısımğa wşıray bastadı. Respublikaşıl zañ şığaruşılar reseylik hakerlerdiñ äreketin jan-jaqtı tekserudi talap etip jatır. Qañtarda Senattıñ üş birdey komissiyası bwl mäseleni qaramaq.

Kreml' AQŞ-tıñ Demokratiyalıq partiyası men saylau jüyesine jasalğan hakerlik şabuılğa qatısı joq ekenin mälimdep keledi. Biraq Resey prezidenti Vladimir Putin bwl mäselege qatıstı ekiwştı kommentariyler aytıp qalğan.

Azat Europa / Azattıq radiosı