Qazaqstan halqına jäne Prezidentine Wlttıq bank törağası D.Aqışev, Joğarğı Sot keñesiniñ törağası A.Smolin, Bas prokuror J.Asanov, «Sırbar» sırtqı barlau qızmetiniñ direktorı Ğ.Bayjanov, sonday-aq Prezident Äkimşiliginiñ basşılıq lauazımdağı birqatar twlğaları, Ükimet müşeleri, oblıstardıñ jäne Almatı qalasınıñ äkimi saltanattı türde ant berdi.

Qazaqstan Prezidenti memlekettik qızmetşilerge qoyılatın talap arta tüsetinin atap ötti.

– Byudjet qarajatın tiimsiz paydalanu jağdayları jii kezdesip jatadı. Memlekettik qızmetşiler tarapınan bolatın qwqıq bwzu jayttarı memlekettik qızmettiñ ğana imidjine emes, jalpı memlekettik basqaru jüyesine teris äserin tigizedi, – dedi Memleket basşısı.

Sonday-aq, Nwrswltan Nazarbaev jinalğan memlekettik qızmetşilerdiñ bärine aldağı cifrlıq däuir talabı jañaşıl şeşimderdi, olardı tiimdi iske asıra alatın jetekşilerdi qajet etetinin ayttı.

Qazaqstan Prezidenti el damuınıñ jaña kezeñinde mañızdı orın alatın öñirlik käsipkerlikti damıtu mäselesine toqtaldı.

– Bwl jwmıstı atqaru äkimderge jüktelgen. Olarğa tiisti ökilettikter men mümkindikter berildi. Biz jwrttı biznespen aynalısuğa üyretuge tiispiz, – dedi Elbası.

Memleket basşısı äleumettik salanıñ wdayı nazarda bolatının jetkizdi.

– Ekonomika men äleumettik saladağı tübegeyli özgerister sayasi jañğırumen qatar jüredi. Aldağı uaqıtta bilik tarmaqtarı arasındağı ökilettikterdi qayta bölu Parlamenttiñ, Ükimettiñ jäne jergilikti memlekettik organdardıñ rölin arttıratın boladı. Sondıqtan keşiktirmey, mülde jañaşa jwmıs jürgize bastau qajet, – dedi Nwrswltan Nazarbaev.

Soñında Elbası eldiñ basqaruşı korpusı aldında twrğan mindetterdiñ auqımdılığı men kürdeliligin, ol sayasi memlekettik qızmetşilerden joğarı jauapkerşilik talap etetin atap ötti.

– Sizder halıqtıñ müddesine minsiz qızmet etip, öz mindetteriñizdi abıroymen atqaradı dep senemin. Biz täuelsizdigimizdi nığaytu jolında jäne Qazaqstannıñ jarqın bolaşağı üşin qolımızdan kelgenniñ bärin jasauğa tiispiz, – dep tüyindedi Qazaqstan Prezidenti.