قازاقستاننىڭ سىرتقى ىستەر ءمينيسترى مەملەكەتتىك حاتشى مايكل پومپەونى قازاقستانعا شاقىردى.
kerey.kz
قايرات ءابدىراحمانوۆ جانە مايكل پومپەو قازاقستان پرەزيدەنتىنىڭ ۆاشينگتونعا جاساعان ساپارىنىڭ ناتيجەلەرىن جۇزەگە اسىرۋدى تالقىلادى-دەپ حابارلايدى ءسىم باسپا ءسوز قىزمەتى.
2018 جىلعى 28 ماۋسىمدا سىرتقى ىستەر ءمينيسترى قايرات ءابدىراحمانوۆ امەريكا قۇراما شتاتتارىنىڭ مەملەكەتتىك حاتشىسى مايكل پومپەومەن تەلەفون ارقىلى سويلەستى.
ەكى ەلدىڭ سىرتقى ىستەر ۆەدومستۆولارىنىڭ باسشىلارى قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ 2018 جىلدىڭ قاڭتارىندا اقش-قا رەسمي ساپارى بارىسىندا قول جەتكىزىلگەن ۋاعدالاستىقتاردىڭ دايەكتى تۇردە جۇزەگە اسىرىلۋىن قاناعاتتانۋشىلىقپەن اتاپ ءوتتى. مايكل پومپەو قازاقستان كوشباسشىسى ساپارىنىڭ ماڭىزدىلىعىن ايرىقشا اتاپ ءوتىپ، اقش پرەزيدەنتى دونالد ترامپ ۆاشينگتوندا قول جەتكىزىلگەن ۋاعدالاستىقتاردى جانە قازاقستانمەن ەكىجاقتى ارىپتەستىكتى دامىتۋدى جوعارى باعالايتىنىن اتاپ ءوتتى.
سۇحباتتاستار قازاقستان مەن اقش اراسىنداعى كەڭەيتىلگەن ستراتەگيالىق ارىپتەستىكتى دامىتۋ ماسەلەلەرىنىڭ كەڭ اۋقىمىن، اتاپ ايتقاندا، ساۋدا-ەكونوميكالىق جانە ينۆەستيتسيالىق، ەنەرگەتيكا، اۋىل شارۋاشىلىعى جانە باسقا دا سالالارداعى ىنتىماقتاستىقتى نىعايتۋ پەرسپەكتيۆالارىن تالقىلادى.ءتۇرلى دەڭگەيدەگى ەكى جاقتى بايلانىستاردىڭ، ونىڭ ىشىندە حالىقارالىق فورۋمدار اياسىنداعى كەستەسى قاراستىرىلدى.
قازاقستان سىرتقى ىستەر ءمينيسترى جانە اقش مەملەكەتتىك حاتشىسى ايماقتىق جانە حالىقارالىق كۇن تارتىبىندەگى وزەكتى ماسەلەلەر بويىنشا بايىمدى پىكىر الماستى. قازاقستاننىڭ الەمدەگى ءتورتىنشى يادرولىق ارسەنالىنان باس تارتۋ تاجىريبەسى سولتۇستىك كورەيانىڭ يادرولىق باعدارلاماسى مەن كورەي تۇبەگىنىڭ يادرولىق قارۋسىزدانۋىنا دا قاتىستى جاعدايدى رەتتەۋ ءۇشىن ۇلگى بولاتىنى اتاپ ءوتىلدى.
ەكى تاراپ وڭىرلىك فورماتتا جەمىستى ءوزارا ارەكەتتەستىكتىڭ ماڭىزدىلىعىن، سونداي-اق اۋعانستاننىڭ تۇراقتىلىعىن جانە تۇراقتى دامۋىن قامتاماسىز ەتۋ بويىنشا قازاقستان جانە ورتالىق ازيانىڭ اقش-پەن جانە باسقا ارىپتەستەرمەن ىنتىماقتاستىعىنىڭ ماڭىزدىلىعىن اتاپ ءوتتى. قازاقستاندىق ديپلومات قازاقستاندىق جوعارى وقۋ ورىندارىنداعى اۋعان ستۋدەنتتەرىنە ارنالعان ءبىلىم بەرۋ باعدارلاماسىنىڭ تابىستى ىسكە اسىرىلۋىنا، سونداي-اق استانادا وتۋگە جوسپارلانعان «اۋعانستانداعى ايەلدەردىڭ قۇقىقتارى مەن مۇمكىندىكتەرىن جاقسارتۋ» جونىندەگى وڭىرلىك كونفەرەنتسياسىنا نازار اۋداردى.
قازاقستاننىڭ سىرتقى ىستەر ءمينيسترى مەملەكەتتىك حاتشى مايكل پومپەونىڭ قازاقستانعا ىڭعايلى ۋاقىتتا ساپار جاساۋى جونىندەگى ءوزىنىڭ شاقىرۋىن راستادى.
پىكىر قالدىرۋ