Бейсенбі қазір «Юннан жұңуи» клубының кәсіпқой бокс шебері. Естеріңізде болса, ол 12 ақпан күні, Қытайдың Сычуан өлкесі Лужоу қаласында өткен 2016 жылдың 4 реткі «Орталық телевизияның жаңа жылды құттықтау белдігіне таласу» бәсекесінде жеңіске жетіп, алтын белік тағынған болатын. Енді міне, кезекті додадан мерейі үстем болған батыр 24 ақпанда туған ауылына оралды.

Аталмыш Лужоу қаласындағы жарысқа Гана, Бразилия, Венесуэла, Қытай сынды 4 мемлекеттен 28 спортшы қатысқан. 63 келі салмақта ганалық қарсыласын бас көтертпей соққылаған Бейсенбі оны 2 минут 23 секудта алаңнан кетуге мәжбүр етті. Сөйтіп, WBC жеңіл салмақтылар дәрежесінде алтын белбеуді жеңіп алған.
Бейсенбі 2007 жылдан боксқа қатысып, «қытайдағы қазақ боксының қолбасшысы» атанған Мұрат Бошайұлының бапкерлігінде болады. Тәжірибелі жаттықтырушының еңбегі мен өзінің таланты арқасында ол Алтай аймақтық, Шыңжаң өлкелік бокс жарстарында жеке-жеке алтын және күміс медаль еншілеген.

Сондай-ақ, Қабаның қабыланы 2012 жылы желтоқсанда, 2013 жылы тамызда, 2014 жылы қаңтарда Хынан өлкесі Жыңжу қаласында өткізілген WBV, BCA-ның іріктеу сындарында 64 келі салмақ бойынша арт-артынан 3 мәрте жеңімпаз атанады.
Жас спортшының еліне оралуына орай «Ағажай-Алтай торабы» тілшілері де сүйінші хабар арнапты. «Сүйер ұлың болса сен сүй, сүйінерге жарар ол» дегендей ауылға оралған Бейсенбіні ата-анасы, туыс-туғандары, ауылдастары қуана қарсы алып, ақ самайлы аналар ақ шашуын шашып жүлделі ұлдарының алтын белбеуін құттықтап, алдағы сапарына сәттілік тіледі.