ديماش قۇدايبەرگەن ءوز ەلى قازاقستاندا قىتايداعى تەلەۆيزيالىق تالانتتار جوباسىنا شىققانعا دەيىن اسا تانىمال بولماعان ەدى.

بىرنەشە اپتادان كەيىن ول قازاقستانعا تانىمال ادامعا اينالىپ ورالدى. ونى اۋەجايدان كۇتىپ الۋعا اقتوبەدەگى جەرگىلىكتى بيلىك وكىلدەرى، قاپتاعان فاناتتار، تەلەوپەراتورلار باردى.

اقتوبەلىكتەر قىتايدىڭ Singer 2017 (I Am a Singer) بايقاۋىنىڭ ءبىرىنشى اينالىمىندا فرانتسۋز تىلىندەگى S.O.S. D’UN Terrien En Détresse ءانىن ايتقان جەرلەستەرى جەڭىمپاز اتانعاندا قاتتى قۋاندى. مۇنان سوڭ، اقپاننىڭ 25-ءى كۇنى ول بايقاۋدىڭ ءۇشىنشى اينالىمىنىڭ جەڭىمپازى بولدى.

وقي وتىرىڭىز: قىتايداعى ونەر بايقاۋىندا تانىلعان ءانشى

التى اينالىمنان تۇراتىن بۇل بايقاۋ قىتايدىڭ Hunan TV تەلەارناسىنان قاڭتاردان ساۋىرگە دەيىن اپتا سايىن كورسەتىلەدى. بۇل – قىتايدا وتەتىن تالانتتى انشىلەردىڭ جىل سايىنعى بايقاۋى. جەڭىمپازدار كورەرمەندەر بەرگەن داۋىس سانىمەن انىقتالادى.

وتكەن اپتادا ديماشتىڭ قىتايدىڭ Weibo الەۋمەتتىك جەلىسىندەگى فاناتتارى 244 ميلليون ادامنان استى.

ديماشتىڭ قىتايداعى Weibo الەۋمەتتىك جەلىسىندەگى پاراقشاسى. 1 ناۋرىز 2017 جىل.

Weibo جەلىسىنىڭ Wanna ەسىمدى قولدانۋشىسى Kazakhheartthrob سىلتەمەسى ارقىلى «مادەنيەتارالىق قاتىناستار پروفەسسورى مەنەن «ءبىر بەلدەۋ – ءبىر جول» جوباسى (قىتايدىڭ ازيا مەن ەۋروپا ەلدەرىن جالعايتىن، ساۋدانى دامىتاتىن ترانسپورتتىق ءدالىز سالۋ جوباسى) تۋرالى نە ويلايتىنىمدى سۇراعاندا مەن «ديماش» دەي جازدادىم» دەپ جازدى.

Weibo-داعى ەكىنشى ءبىر قولدانۋشى ديماشتىڭ سۋرەتىن جاريالاپ «مەن سەنى سۇيەم» دەگەن. ەسىمىن ۆان فەن دەپ بەلگىلەگەن تاعى فانات «ديماش گۋاندۋن پروۆينتسياسىنا كەلىپ قاشان ءان ايتادى ەكەن؟» دەپ سۇراعان. گۋاندۋن – قىتايدىڭ وڭتۇستىك-شىعىسىندا ورنالاسقان ايماق.

وقي وتىرىڭىز: قازاق ءانشىسى “سلاۆيان بازارىنىڭ” باس جۇلدەسىن يەلەندى​

ديماش تا فاناتتارىنىڭ كوڭىلىن قالدىرماۋعا تىرىسادى. ول گونكونگتا جەكپە-جەكتىڭ «سۋپەرجۇلدىزى»، الەمگە تانىمال اكتەر دجەكي چانمەن كەزدەسكەندە «ارماندار ورىندالادى» دەپ مالىمدەدى. ديماش قۇدايبەرگەن دجەكي چاننىڭ پايدالى كەڭەستەر بەرگەنىن، كۋنگ-فۋ يوگاسىنىڭ بىرنەشە بي قيمىلىن ۇيرەتكەنىن حابارلادى.

ديماش قۇدايبەرگەن Instagram جەلىسىندەگى وزىنىڭ 656 مىڭ «دوسىنا» «بۇگىن مەنىڭ ومىرىمدە تاريxي ەستە قالاتىن ەرەكشە كۇن! اتاقتى اكتەر دجەكي چان مىرزا مەنى تەلەديداردان كورىپ، كەزدەسۋگە شاقىردى! كەزدەسۋدە اكتەر ماعان ءوزىنىڭ ەكسكليۋزيۆتى كۇرتەشەسىن جانە ارنايى فيرمالىق ءان تىڭداۋ قۇرىلعىسىن سىيعا تارتتى! ال مەن اكتەرگە قازاقتىڭ شاپانىن جاۋىپ، دومبىرانى سىيعا تارتتىم!.. ول شىعارماشىلىعىمدى باقىلايتىنىن ايتتى» دەپ حابارلادى.

ديماشتىڭ اتا-اناسى قانات پەن سۆەتا ايتباەۆتار، قارىنداسى راۋشان، ءىنىسى ءابىلمانسۇر.

ول ءوزىن قىتايداعى فاناتتارى قورشاپ العان ۆيدەوسىن دا جاريالادى. ونى اۋەجايدا، كوشەدە جۇرگەن جەرىنەن كورگەن جۇرت قورشاپ الىپ، سەلفيگە ءتۇسىپ، قولتاڭباسىن سۇراپ جاتادى.

ديماش قۇدايبەرگەننىڭ اتاعىنان اقشا جاساي باستاعان قىتايلىق كاسىپكەرلەر دە بار. كەيبىرى ءانشىنىڭ سۋرەتى باسىلعان جانە قازاق تىلىندە «مەن سەنى سۇيەم» دەگەن جازۋى بار قاعاز پاكەتتەر شىعارا باستاعان. قىتاي بازارىنان ونىڭ اتى جازىلعان كونديتەرلىك ونىمدەردى دە بايقاۋعا بولادى.

ديماش قۇدايبەرگەننىڭ رەسمي وكىلدەرى ءانشىنىڭ حالىق سانى قازاقستاننان 75 ەسە كوپ قىتاي ەلىندەگى ونداي بيزنەس ۇسىنىستارعا قارسى ەمەس ەكەنىن ايتادى. الايدا ولار كونديتەرلىك ءونىم مەن قاعاز پاكەتتەر شىعارىپ جاتقان كاسىپكەرلەردىڭ ءانشى ءيميدجىن پايدالانۋعا رۇقسات الماعانىن مالىمدەدى.

ءوزىنىڭ جەكە ءومىرىن كوپ جارنامالامايتىن ديماش قۇدايبەرگەن قازىردىڭ وزىندە اتاق-داڭق پەن تەلەۆيزيا تاراپىنان شەكتەن تىس قىزىعۋشىلىقتىڭ ءتۇرلى زاردابىن دا كورىپ جاتىر. قىتايدىڭ كەيبىر جۋرنالدارى ديماشتىڭ “بۇرىن جۇرگەن قىزى” دەپ Instagram جەلىسىندەگى كۋرستاسىمەن تۇسكەن ءبىر سۋرەتىن جاريالاپ ۇلگەردى.

ال قازاقستانداعى كەي اقپارات قۇرالدارى قىتايداعى ديماشتىڭ فاناتتارى ونىمەن بىرگە ءجۇرۋ ءۇشىن ۇشاق بيلەتتەرىن ساتىپ العان دەگەن اقپارات جاريالادى. ديماش قىتايداعى ءان بايقاۋى ءوتىپ جاتقان كەزدە قازاقستاندا وتكەن ۋنيۆەرسيادادا ءان ايتۋ ءۇشىن ەلىنە ءبىر رەت كەلىپ-كەتكەن ەدى.

“جاس قانات – 2012″ بايقاۋىنىڭ جەڭىمپازى ديماش قۇدايبەرگەن. استانا، 20 مامىر 2012 جىل.

ديماش قۇدايبەرگەن اقتوبەگە قىتاي جۋرناليستەرىن دە ەرتە كەلگەن. ولار قازاق ءانشىسى تۋرالى دەرەكتى فيلم ءتۇسىرىپ جاتىر. اقتوبە اۋەجايىندا ونى وبلىس اكىمى، باسقا دا شەنەۋنىكتەر قارسى الدى، ونداعان قولداۋشىلارى اندەرىن ايتىپ، ونىڭ اتى جازىلعان پلاكات كوتەرىپ، ەسىمىن ايقايلاپ تۇردى.

ديماشتىڭ انشىلىك دارىنىن اتا-اناسى ەرتە بايقاعان. ءسويتىپ ول بەس جاسىندا جەرگىلىكتى مۋزىكا مەكتەبى تابالدىرىعىن اتتايدى. سودان بەرى ول حالىقارالىق جانە جەرگىلىكتى ءان بايقاۋلارىندا بىرنەشە رەت جۇلدە العان. ونىڭ ىشىندە بەلارۋستىڭ ۆيتەبسك قالاسىندا 2015 جىلى وتكەن «سلاۆيانسكي بازار» ءان بايقاۋى دا بار.

فارانگيس نادجيبۋللانىڭ ماقالاسى اعىلشىن تىلىنەن اۋدارىلدى.                                                                                                                ازاتتىق راديوسى