Dimaş Qwdaybergen öz eli Qazaqstanda Qıtaydağı televiziyalıq talanttar jobasına şıqqanğa deyin asa tanımal bolmağan edi.

Birneşe aptadan keyin ol Qazaqstanğa tanımal adamğa aynalıp oraldı. Onı äuejaydan kütip aluğa Aqtöbedegi jergilikti bilik ökilderi, qaptağan fanattar, teleoperatorlar bardı.

Aqtöbelikter Qıtaydıñ Singer 2017 (I Am a Singer) bayqauınıñ birinşi aynalımında francuz tilindegi S.O.S. D’UN Terrien En Détresse änin aytqan jerlesteri jeñimpaz atanğanda qattı quandı. Mwnan soñ, aqpannıñ 25-i küni ol bayqaudıñ üşinşi aynalımınıñ jeñimpazı boldı.

Oqi otırıñız: Qıtaydağı öner bayqauında tanılğan änşi

Altı aynalımnan twratın bwl bayqau Qıtaydıñ Hunan TV telearnasınan qañtardan säuirge deyin apta sayın körsetiledi. Bwl – Qıtayda ötetin talanttı änşilerdiñ jıl sayınğı bayqauı. Jeñimpazdar körermender bergen dauıs sanımen anıqtaladı.

Ötken aptada Dimaştıñ Qıtaydıñ Weibo äleumettik jelisindegi fanattarı 244 million adamnan astı.

Dimaştıñ Qıtaydağı Weibo äleumettik jelisindegi paraqşası. 1 naurız 2017 jıl.

Weibo jelisiniñ Wanna esimdi qoldanuşısı Kazakhheartthrob siltemesi arqılı «Mädenietaralıq qatınastar professorı menen «Bir beldeu – bir jol» jobası (Qıtaydıñ Aziya men Europa elderin jalğaytın, saudanı damıtatın transporttıq däliz salu jobası) turalı ne oylaytınımdı swrağanda men «Dimaş» dey jazdadım» dep jazdı.

Weibo-dağı ekinşi bir qoldanuşı Dimaştıñ suretin jariyalap «Men seni süyem» degen. Esimin Van Fen dep belgilegen tağı fanat «Dimaş Guandun provinciyasına kelip qaşan än aytadı eken?» dep swrağan. Guandun – Qıtaydıñ oñtüstik-şığısında ornalasqan aymaq.

Oqi otırıñız: Qazaq änşisi “Slavyan bazarınıñ” bas jüldesin ielendi​

Dimaş ta fanattarınıñ köñilin qaldırmauğa tırısadı. Ol Gonkongta jekpe-jektiñ «superjwldızı», älemge tanımal akter Djeki Çanmen kezdeskende «armandar orındaladı» dep mälimdedi. Dimaş Qwdaybergen Djeki Çannıñ paydalı keñester bergenin, kung-fu yogasınıñ birneşe bi qimılın üyretkenin habarladı.

Dimaş Qwdaybergen Instagram jelisindegi öziniñ 656 mıñ «dosına» «Bügin meniñ ömirimde tarixi este qalatın erekşe kün! Ataqtı akter Djeki Çan mırza meni teledidardan körip, kezdesuge şaqırdı! Kezdesude akter mağan öziniñ eksklyuzivti kürteşesin jäne arnayı firmalıq än tıñdau qwrılğısın sıyğa tarttı! Al men akterge qazaqtıñ şapanın jauıp, dombıranı sıyğa tarttım!.. ol şığarmaşılığımdı baqılaytının ayttı» dep habarladı.

Dimaştıñ ata-anası Qanat pen Sveta Aytbaevtar, qarındası Rauşan, inisi Äbilmanswr.

Ol özin Qıtaydağı fanattarı qorşap alğan videosın da jariyaladı. Onı äuejayda, köşede jürgen jerinen körgen jwrt qorşap alıp, selfige tüsip, qoltañbasın swrap jatadı.

Dimaş Qwdaybergenniñ atağınan aqşa jasay bastağan qıtaylıq käsipkerler de bar. Keybiri änşiniñ sureti basılğan jäne qazaq tilinde «Men seni süyem» degen jazuı bar qağaz paketter şığara bastağan. Qıtay bazarınan onıñ atı jazılğan konditerlik önimderdi de bayqauğa boladı.

Dimaş Qwdaybergenniñ resmi ökilderi änşiniñ halıq sanı Qazaqstannan 75 ese köp Qıtay elindegi onday biznes wsınıstarğa qarsı emes ekenin aytadı. Alayda olar konditerlik önim men qağaz paketter şığarıp jatqan käsipkerlerdiñ änşi imidjin paydalanuğa rwqsat almağanın mälimdedi.

Öziniñ jeke ömirin köp jarnamalamaytın Dimaş Qwdaybergen qazirdiñ özinde ataq-dañq pen televiziya tarapınan şekten tıs qızığuşılıqtıñ türli zardabın da körip jatır. Qıtaydıñ keybir jurnaldarı Dimaştıñ “bwrın jürgen qızı” dep Instagram jelisindegi kurstasımen tüsken bir suretin jariyalap ülgerdi.

Al Qazaqstandağı key aqparat qwraldarı Qıtaydağı Dimaştıñ fanattarı onımen birge jüru üşin wşaq biletterin satıp alğan degen aqparat jariyaladı. Dimaş Qıtaydağı än bayqauı ötip jatqan kezde Qazaqstanda ötken universiadada än aytu üşin eline bir ret kelip-ketken edi.

“Jas Qanat – 2012″ bayqauınıñ jeñimpazı Dimaş Qwdaybergen. Astana, 20 mamır 2012 jıl.

Dimaş Qwdaybergen Aqtöbege Qıtay jurnalisterin de erte kelgen. Olar qazaq änşisi turalı derekti fil'm tüsirip jatır. Aqtöbe äuejayında onı oblıs äkimi, basqa da şeneunikter qarsı aldı, ondağan qoldauşıları änderin aytıp, onıñ atı jazılğan plakat köterip, esimin ayqaylap twrdı.

Dimaştıñ änşilik darının ata-anası erte bayqağan. Söytip ol bes jasında jergilikti muzıka mektebi tabaldırığın attaydı. Sodan beri ol halıqaralıq jäne jergilikti än bayqaularında birneşe ret jülde alğan. Onıñ işinde Belarus'tiñ Vitebsk qalasında 2015 jılı ötken «Slavyanskiy bazar» än bayqauı da bar.

Farangis Nadjibullanıñ maqalası ağılşın tilinen audarıldı.                                                                                                                Azattıq radiosı