سيريا كەلىسسوزى ءساتسىز بولدى

Euronews جاڭالىقتار سايتى “سيريادا “قاۋىپسىزدىك ايماقتارىن” قۇرۋ كەلىسسوزى ساتسىزدىككە ۇشىرادى” دەگەن ماقالاسىندا شىلدەنىڭ 6-سى كۇنى استانادا وتكەن سيريا جونىندەگى بەيبىت كەلىسسوزدىڭ بەسىنشى كەزەڭىنىڭ ناتيجەسى جايلى جازعان.

ازاتتىق بۇعان دەيىن حابارلاعانىنداي، استاناداعى كەلىسسوز كەزەڭى ءساتسىز اياقتالعاننان سوڭ سيريا ۇكىمەتى دەلەگاتسياسىن باستاپ كەلگەن باشار ءال-جاافاري جۋرناليستەرگە “قاۋىپسىزدىك ايماقتارىنا” قاتىستى كەلىسىمگە تۇركيا قارسى بولدى دەپ ايتقان. سيريا جانجالىن رەتتەۋ كەلىسسوزىنە قاتىسقان رەسەي پرەزيدەنتىنىڭ ارنايى وكىلى الەكساندر لاۆرەنتەۆتىڭ مالىمدەۋىنشە، تۇركيانىڭ رەسمي تۇلعالارى قارۋلى كوتەرىلىسشىلەر مەن سيريا پرەزيدەنتى باشار ءال-اساد اسكەرىنىڭ اراسىن ءبولىپ تۇراتىن ايماقتاردى قۇرۋعا قاتىسۋ ماسەلەسىن ۇيلەستىرۋ ءۇشىن قوسىمشا ۋاقىت سۇراعان.

“بۇل ساتسىزدىك بۇكىل الەم اتسالىسىپ جاتقان سيرياداعى ازامات سوعىسىن رەتتەۋ ىسىنە جوسپار قۇرىپ، جەتەكشىلىك ەتۋگە ۇمىتىلىپ وتىرعان ماسكەۋ ءۇشىن كەرى كەتۋ بولىپ سانالادى” دەپ جازادى Euronews. بۇعان قوسا، تامىزدىڭ اياعىندا استانادا وتكىزۋ جوسپارلانىپ وتىرعان كەزەكتى كەزەڭگە دەيىن ورتاق ۇستانىمعا قول جەتكىزۋ ءۇشىن رەسەي، تۇركيا مەن يراننىڭ قاتىسۋىمەن جۇمىس توبى قۇرىلعانى جايلى حابارلاندى.

سيريانىڭ راككا قالاسىندا “يسلام مەملەكەتى” ەكسترەميستىك توبىنا قارسى سوعىسىپ جۇرگەن كۇرد جاساعى. 3 شىلدە 2017 جىل.

“رەسەي، تۇركيا جانە يران سيريادا قاۋىپسىزدىك ايماقتارىن قۇرۋ جونىندەگى ورتاق كەلىسىمگە كەلە المادى” دەگەن ماقالاسىندا Reuters اگەنتتىگى دە استانا كەلىسسوزىنىڭ ساتسىزدىككە ۇشىراۋىنا قاتىستى كوممەنتاري بەرگەن. “لاۆرەنتەۆ وڭتۇستىكتەگى قاۋىپسىزدىك ايماعىنا قاتىستى جايتتاردى ول جاقتا ورنالاسقان كوتەرىلىسشىلەردى قولدايتىن اقش جانە يوردانيامەن كەلىسۋ كەرەكتىگىن ايتتى” دەپ جازادى Reuters.

بىراق شىلدەنىڭ 7-سىندە گامبۋرگتە اقش پرەزيدەنتى دونالد ترامپ پەن رەسەي پرەزيدەنتى ۆلاديمير ءپۋتيننىڭ اراسىندا بولعان كەلىسسوزدەردەن كەيىن اقش، رەسەي جانە يوردانيا شىلدەنىڭ 9-ىنان باستاپ سيريانىڭ وڭتۇستىك-شىعىسىنداعى ءبىتىم جانە “دەەسكالاتسيا” جايلى تاراپتار ورتاق كەلىسىمگە كەلگەنى تۋرالى جاريالاندى. “ۇلكەن جيىرمالىقتىڭ” گامبۋرگتەگى سامميتىندە مۇنى اقش مەملەكەتتىك حاتشىسى رەكس تيللەرسون مەن رەسەي سىرتقى ىستەر ءمينيسترى سەرگەي لاۆروۆ تا راستادى، دەپ حابارلايدى Reuters.

استاناعا ماداق

گەرمانيا، كانادا، سينگاپۋر جانە جاپونيادا تىركەلگەن In Depth Newsحالىقارالىق جاڭالىقتار سايتىندا قازاقستان ديپلوماتياسىنىڭ 25 جىلدىعى قۇرمەتىنە “ديپلوماتيا قازاقستان استاناسى – استانانى الەمگە تانىتتى” دەگەن ماقالا شىقتى. ماقتاۋ ماقالاسىنىڭ اۆتورى رامەش دجاۋرا جۋىردا استانادا وتكەن شىۇ ءسامميتى، ەحرو-2017 حالىقارالىق كورمەسىنىڭ اشىلۋى، استانا ەكونوميكالىق فورۋمى جانە ەۋرازيا مەديا-فورۋمى ءتارىزدى قازاقستاننىڭ سىرتقى ساياساتىنىڭ جەتىستىكتەرىن ءتىزىپ شىققان. بۇعان قوسا، ەلدىڭ يادرولىق قارۋدى تاراتپاۋعا قوسقان ۇلەسىن، ءتۇرلى جانجالداردى رەتتەۋ كەلىسسوزدەرى، مىسالى ۋكرايناداعى احۋال بويىنشا مينسك ءسامميتىنىڭ ەكى كەزەڭى جانە سيريا بەيبىت كەلىسسوزدەرىنىڭ استانادا وتكەنىن قازاقستاننىڭ جەتىستىكتەرى قاتارىنا جاتقىزعان.

EXPO-2017 حالىقارالىق كورمەسى اۋماعىنداعى نىساندار. استانا، 22 ماۋسىم 2017 جىل.

قازاقستان پرەزيدەنتى نۇرسۇلتان نازارباەۆتىڭ بۇۇ-ىن رەفورمالاۋ، مىسالى شتاب-پاتەرىن ازياعا كوشىرۋ جايلى ۇسىنىسىنا قاتىستى دا كوممەنتاري بەرگەن. “پرەزيدەنت نازارباەۆ استانا مەن ەۋرازيالىق ەل – قازاقستاندى رەسمي تۇردە سان الۋان مادەني مۇراسى بار دەموكراتيالىق، زايىرلى، ۋنيتارلى ءارى كونستيتۋتسيالىق رەسپۋبليكا دەپ سانايتىن سىڭايلى” دەپ جازادى In Depth News.

وتكەن اپتادا باتىستىڭ بىرقاتار بەلگىلى باسىلىمدارىندا وسىنداي سارىنداعى ماقالالار شىققان. ولار امەريكالىق Foreign Policy جۋرنالىنىڭ ءتىلشىسى دجەيمس پالمەر بيىلعى ماۋسىمنىڭ 15-ءى كۇنى شىعىنى تىم كوپ، ال بىراق جۇمسالعان “بەس ميلليارد دوللاردىڭ” ناتيجەسى ماردىمسىز ەحرو-2017 كورمەسىن قازاقستاننىڭ قالاي ۇيىمداستىرعانى تۋرالى سىني ماقالاسى جاريالاعاننان كەيىن جارىققا شىققان.

قازاقستاندى تۋريستەرگە قاۋىپسىز ەلگە جاتقىزدى

ۇلىبريتانيانىڭ Liverpool Echo باسىلىمىنىڭ سايتى “جاڭا بايانداماعا سايكەس، بۇلار – باراتىندار ءۇشىن ەڭ قاۋىپتى ەلدەر” دەگەن ماقالاسىندا شۆەيتساريادا ورنالاسقان “دۇنيەجۇزىلىك ەكونوميكالىق فورۋم” ۇكىمەتتىك ەمەس قورىنىڭ جۋىردا جاريالانعان ەسەبىنە قاتىستى كوممەنتاري بەرگەن. “ساياحات پەن ءتۋريزمنىڭ باسەكەگە قابىلەتتىلىگى – 2017 بايانداماسىندا” (The Travel & Tourism Competitiveness Report 2017) تۋريستەر ءۇشىن “قاۋىپتى” ەلدەردىڭ رەيتينگى جاريالانعان.

اياگوز قالاسىنداعى تەمىر جول ستانتسياسى. شىعىس قازاقستان وبلىسى، 3 تامىز 2014 جىل.

باياندامادا 136 ەلدى زورلىق-زومبىلىق جانە تەرروريزم قاتەرى سياقتى كورسەتكىشتەر بويىنشا باعالاعان، بىراق بۇل تىزىمگە سيريا، اۋعانستان جانە يراك ەنبەي قالعان، سەبەبى وعان ەرتەدەن قالىپتاسقان ءداستۇر بويىنشا، اۋەلى ەكونوميكاسى دامىعان ەلدەردى، سوسىن عانا دامۋشى ەلدەردى قوسادى.

قازاقستان اتالعان رەيتينگتە 5,5 ۇپايمەن 58-ورىندا (مىسالى، فرانتسيا 67-ءشى، ۇلىبريتانيا – 78, ال اقش 84-ءشى ورىندا) تۇر.

فينليانديا، ءباا، يسلانديا، ومان جانە گونكونگ ەڭ قاۋىپسىز ەلدەر رەتىندە اتالعان. تۋريستەر ءۇشىن ەڭ قاۋىپتى ەلدەر قاتارىنا قازاقستاندىقتار ءجيى باراتىن تۇركيا (116-ورىن), تايلاند (118-ورىن) جانە ەگيپەت (130-ورىن) ءتارىزدى ەلدەر ەنگەن.                                   ازات ەۋروپا / ازاتتىق راديوسى