وزبەكستاندا مەملەكەتتىك اقپارات قۇرالى ەلدىڭ تۇڭعىش پرەزيدەنتى يسلام كاريموۆتىڭ جۇرگىزگەن ساياساتىن سىنعا الدى دەپ حابارلايدى ازاتتىقتىڭ وزبەك قىزمەتى (وزودليك راديوسى). حاباردا كاريموۆتىڭ تۇسىنداعى “[ايماقتا] ليدەر اتانۋ ءۇشىن ۇنەمى كورشىلەرمەن باسەكە جارىستىرىپ، ۇستەمدىگىن دالەلدەۋگە” تىرىسۋدىڭ كەسىرىنەن شيەلەنىسكەن پروبلەمالاردى قازىرگى تاڭدا پرەزيدەنت شاۆكات ميرزياەۆكە شەشۋگە تۋرالى كەلگەنى ايتىلدى.

اتالعان حابار جاقىندا عانا، ەلدىڭ قازىرگى پرەزيدەنت شاۆكات ميرزياەۆتىڭ تۋعان كۇنى – 24 شىلدەدە جۇمىسىن باستاعان، تاۋلىك بويى اقپاراتتىق-ساراپتامالىق حابار تاراتاتىن “وزبەكستان 24″ تەلەارناسىنىڭ “تاҳليلنوما” باعدارلاماسىنىڭ العاشقى سانىندا كورسەتىلگەن.

شىلدەنىڭ 30-ى كۇنى ەفيردەن بەرىلگەن تەلەاباعدارلامادا يسلام كاريموۆتىڭ اتى-ءجونى اتالماعانىمەن، ونىڭ تۇسىندا جۇرگىزىلگەن ساياسات “كەسەك استىندا قالدى” دەپ حابارلايدى وزودليك.

وزبەكستان پرەزيدەنتى يسلام كاريموۆ شانحاي ىنتىماقتاستىعى ۇيىمى سامميتىندە سويلەپ تۇر. تاشكەنت، 24 ماۋسىم 2016 جىل.

وزبەكستاندى شيرەك عاسىر ۋاقىت ۇزدىكسىز باسقارعان تۇڭعىش پرەزيدەنت يسلام كاريموۆتىڭ تۇسىندا جانە بىلتىر ول دۇنيەدەن وتكەننەن كەيىنگى ۋاقىتتا كاريموۆ بيلىگى كەزىندە جۇرگىزىلگەن ساياسات ۇكىمەت باقىلاۋىنداعى اقپارات قۇرالدارىندا ەشقاشان بۇلايشا اشىق سىنالماعان.

“تاҳليلنوما” باعدارلاماسىندا قوعامنىڭ بارلىق سالاسى – ەكونوميكادان باستاپ الەۋمەتتىك، رۋحاني جانە اۋىل شارۋاشىلىعى سالالارىنداعى جاعدايعا تالداۋ جاسالعان. حاباردا سويلەگەندەر يسلام كاريموۆتىڭ بيلىگى تۇسىنداعى جىبەرىلگەن قاتەلىكتەردى سىنعا العان. ولاردىڭ ايتۋىنشا، مىسالى، بۇعان دەيىن “سىرتقى ساياساتتا جىبەرىلگەن كەمشىلىكتەردىڭ شەشىمىن تابۋمەن بۇگىنگى تاڭدا جاڭا پرەزيدەنت ميرزياەۆ اينالىسىپ جاتىر”.

“بيلىككە كەلگەن ساتتەن باستاپ جاقىن كورشىلەرمەن قاتىناس – ۇستەمدىك ءۇشىن كۇرەس ەمەس، كەرىسىنشە، ءوزارا سەنىم جانە ادالدىق ەكەنىن جاريالاۋى وزبەكستاننىڭ ورتالىقازيالىق رەسپۋبليكالارمەن قارىم-قاتىناسىن جاقسارتىپ، سەنىمنىڭ نىعايۋىنا سەپتىگىن تيگىزدى. شىندىعىندا، قوردالانعان پروبلەمالار، اسىرەسە جىلدار بويى بىتىسىپ كەلگەن شەكارا ماسەلەلەرى ءبىر-بىرىنە كىنارات ارتىپ، تالاپ قويۋ جانە ءوز ۇستەمدىگىن كورسەتۋمەن ەمەس، جىلى ءسوز جانە تاۋلىك مەزگىلىنە قاراماي اتقارىلعان تىنىمسىز جۇمىستىڭ ارقاسىندا شەشىمىن تاپتى”، – دەدى حاباردى جۇرگىزۋشى.

تەلەارنا باعدارلاماسىندا كاريموۆ باسقارعان جىلدارى وزبەكستان بارلىق سالالاردا داعدارىسقا كەزىككەنى ايتىلدى. حابارعا قاتىسۋشىلاردىڭ پىكىرىنشە، جاعداي سەگىز اي بۇرىن بيلىككە كەلگەن جاڭا پرەزيدەنت “شاۆكات ميرزياەۆتىڭ جۇرگىزگەن رەفورمالارىنىڭ ارقاسىندا جاقسارا باستاعان”.

وزبەكستان پوليتسياسىنىڭ “قارا بازارداعى” اقشا ايىرباستاۋشىلارعا قارسى وپەراتسياسى. 16 ناۋرىز 2017 جىل. (الەۋمەتتىك جەلىدەگى سۋرەت.)

سونىمەن بىرگە يسلام كاريموۆ بيلىگى كەزىندەگى قارجى ساياساتى دا قاتتى سىنعا قالدى.

“جەتەكشى ەكونوميكالىق ۇيىمداردىڭ وزبەكستاندى جازعىرىپ، ماماندارىمىزدىڭ كاسىبيلىگىنە شەك كەلتىرگەن بارلىق ايىپتاۋلار تەك سول قارجى ساياساتىنىڭ كەسىرىنەن. بۇگىن ءبىز بۇل تۋرالى اشىق ايتۋعا ءتيىسپىز. سونىمەن بىرگە، شەتەل ۆاليۋتاسىنىڭ ءتورت ءتۇرلى باعامى جانە “قارا بازار” ءتارىزدى ماسقارانىڭ بولۋى ەكونوميكانى دامىتۋعا تۇساۋ كەلتىرگەنىن دە باتىلدىقپەن ايتۋعا ءتيىسپىز. الايدا پرەزيدەنت باستاعان رەفورمالاردىڭ ارقاسىندا بۇل پروبلەمالاردىڭ بارلىعى دا بىرتىندەپ شەشىمىن تاۋىپ كەلەدى”، – دەگەن جۇرگىزۋشى.

وزبەكستان قوعامىندا تەلەباعدارلاما تۇرلىشە رەاكتسيا تۋعىزدى دەپ جازادى وزودليك سايتى. كەي كورەرمەن “جۇرتقا بەلگىلى جايتتى جاڭالىق قىلعان” حاباردى اشۋ-ىزامەن قابىلداسا، كەيبىرەۋلەرگە مارقۇم يسلام كاريموۆتىڭ اتىنا سىن ايتىلعانى ۇناماي قالعان.

“كاريموۆتى ۇنەمى كورشىلەرىنىڭ الدىندا كەۋدەسىن كەرىپ، ۇستەمدىك تانىتتى دەپ ايىپتايدى. وتباسىمىزبەن تەلەارنا حابارىنان جيىركەندىك. ەكىجۇزدىلەر ساياساتى دەگەن وسى” دەپ جازعان ءبىر كورەرمەن وزودليك سايتىنا.

وسى تەلەباعدارلاما ەفيردەن كورسەتىلەردەن ەكى كۇنى بۇرىن، شىلدەنىڭ 28-ءى كۇنى وزبەكستان باس پروكۋراتۋراسى بۇرىنعى پرەزيدەنت مارقۇم يسلام كاريموۆتىڭ ۇلكەن قىزى گۇلنارا كاريموۆا “اقشا جىمقىرۋ” جانە “بوپسالاۋ” باپتارى بويىنشا ايىپتى دەپ تانىلىپ، 2015 جىلعى تامىزدا سوت ۇكىمىمەن ونىڭ باس بوستاندىعى بەس جىلعا شەكتەلگەنى تۋرالى العاش رەت رەسمي جاريالاعان.

وقىڭىز: كاريموۆانىڭ باس بوستاندىعى 5 جىلعا شەكتەلگەن

2003 جىلدىڭ سوڭىنان وزبەكستان ۇكىمەتىن باسقارعان شاۆكات ميرزياەۆ بىلتىر كۇزدە يسلام كاريموۆ قايتىس بولعاننان كەيىن اۋەلى ەل پرەزيدەنتى مىندەتىن اتقارۋشى بولدى، ال جەلتوقساننىڭ 4-ءى كۇنى وتكەن سايلاۋدا، كوپشىلىك كۇتكەندەي، 90 پايىزعا جۋىق داۋىس جيناپ وڭاي جەڭىسكە جەتكەن.

سودان بەرگى ۋاقىت ىشىندە جاڭا پرەزيدەنت قول قويىپ، بەكىتكەن شەشىمگە سايكەس، تاشكەنتتەگى ەڭ ۇزىن كوشە مەن حالىقارالىق اۋەجايعا، جوعارى وقۋ ورنى مەن زاۋىتقا يسلام كاريموۆتىڭ ەسىمى بەرىلدى، ونىڭ باسىنا كەسەنە تۇرعىزىلىپ، تاشكەنت، سامارقان جانە قارشى قالالارىندا تۇڭعىش پرەزيدەنتتىڭ ەسكەرتكىشتەرى ورناتىلماق.                                                                                                  ازاتتىق راديوسى