شاكەرىم قاجىنىڭ اتىنا قاتىستى
kerey.kz
شاكەرىمدى “شاكارىم” دەپ اتاۋ قالىپتاسىپ كەتتى. ءوزىم دە وسىلاي ايتىپ جۇرگەم. مۇحتار ماعاۋين اقساقالدىڭ ەكى ۋاجىنەن سوڭ پىكىرىمدى وزگەرتتىم. اقساقالدىڭ سوزىنشە، بىرىنشىدەن، شىڭعىستاۋ، باقاناس پەن شۇبارتاۋداعى اعايىنى كوزى تىرىسىندە ءھام كەيىن شايىردى “شاكەرىم” دەپ اتاعان. ەكىنشىدەن، ءتىپتى زامانداستارىنىڭ كوزىن كورىپ، ءسوزىن ەستىگەندەرگە سەنبەگەن جاعدايدا، مىناداي قيسىنعا توقتاۋعا بولادى: قازاق تىلىندە “اكا” دەگەن بۋىن مۇلدەم جوق، ءسوز ىشىندە كەزدەسپەيدى، فونەتيكالىق زاڭدىلىققا قايشى. “اكە”، “داكە” (مارليا), “ساكە” دەگەن سياقتى اتاۋلار سونىڭ ايعاعى. اقساقالدىڭ وسى ءبىرىنشى ءۋاجى-اق ءوز باسىما جەتكىلىكتى ەدى، ەكىنشىسى مۇنىڭ دۇرىستىعىن ابدەن ۇعىندىرىپ تۇر.
عالىم بوقاشتىڭ facebook پاراقشاسىنان الىندى
باس تاۋەلسىزدىگى
ادامنىڭ شىن مىنەزى، وي-پىكىرى ءھام قابىلەتى جەكە باسى ءۇشىن ساياسي-ەكونوميكالىق تاۋەلسىزدىك تۋعاندا عانا بىلىنەدى (سالىستىرمالى تۇردە ايتىپ وتىرمىن، ابسوليۋت تاۋەلسىزدىك بولمايدى، ارينە). ياعني شاما-شارقىنا قاراي جايلى باسپاناسى، تۇراقتى جۇمىسى ءھام تابىس كوزى، زەينەت پەن مۇقتاجدىق جاردەماقىسى بار; جىلىنا كەم دەگەندە ءبىر مارتە شەتكە شىعىپ كەلە الاتىن ەركىندىگى بار; اپتاسىنا از دەگەندە بىرنەشە مارتە جانى جاقىن ادامدارمەن ويىن-ساۋىق ورتالىقتارىنا، يا ساياسي-الەۋمەتتىك كلۋبتارعا بارىپ تۇراتىن جاعدايى بار; مادەنيەت پەن سپورت سالاسىنداعى ءحوببيىن دامىتاتىن، عىلىم سالاسىنداعى تالابىن ۇشتايتىن ءارى ءلاززات الاتىن مۇمكىندىگى بار; بويداق بولسا، باسىنا جەتەتىن، وتباسىلى بولسا، بالا-شاعاسىنا جەتەتىن، زەينەتكەر بولسا، كۇتىمىنە جەتەتىن قورى بار ادام عانا تۋعان-تۋىس ءھام دوس-جارمەن قارىم-قاتىناستا دا، بيلىكپەن قارىم-قاتىناستا دا ويىن بۇكپەي ايتاتىن شىنشىل، انىق ازاماتقا اينالادى. وركەنيەتتى رەجيمدەر زاڭنىڭ ۇستەمدىگىن ورناتۋ ارقىلى حالقىنا وسىنداي ساياسي-ەكونوميكالىق ازاتتىق اپەرەدى. ال قۋدالاۋشى رەجيمدەر زاڭنان ۇستەمدىگىن ورناتۋ ارقىلى حالقىنا باس كوتەرتپەي، كىشىگىن – ۇلىعىنا، ادالىن – ارامىنا، ءادىلىن – اككىسىنە، مامانىن – مانساپقورعا، كارىسىن – جاسىنا كىرىپتار ەتىپ قويادى. كىرىپتار ادامنىڭ شىن سويلەۋى، شىن ءىس قىلۋى، اربىردەن سوڭ شىن ءومىر ءسۇرۋى قيىننىڭ قيىنى. “كىسىنىڭ قولىنا قاراعاننىڭ كۇنى قۇرىسىن” دەيدى قازاقتىڭ ءبىر ماقالى. راس ءسوز.
عالىم بوقاشتىڭ facebook پاراقشاسىنان الىندى
پىكىر قالدىرۋ