كوز قاراس

عىلىمسىز ءوندىرىس دامي المايدى

kerey.kz

 |  Jun 1, 2019

كەز كەلگەن ەلدىڭ ەكونوميكاسى عىلىم جەتىستىكتەرىن وندىرىسكە ەنگىزبەي دامي المايدى.
عىلىمي جەتىستىكتەردىڭ نەگىزىندە جاسالعان ۇزدىك ونىمدەر عانا حالىقارالىق رىنوكتا
باسەكەلەستىككە قابىلەتتى بولا الادى. ال ءبىزدىڭ وندىرىسشىلەرىمىز عىلىمي-زەرتتەۋ جانە
تاجىريبەلىك-كونسترۋكتورلىق جۇمىستارعا كوڭىل بولمەيدى. ساراپشىلاردىڭ زەرتتەۋىنە
قاراعاندا الەمدەگى ۇزدىك تاۋار وندىرۋشىلەر وتكەن عاسىردىڭ اياعىمەن سالىستىرعاندا
عىلىمي-زەرتتەۋ جۇمىستارىنا بولىنەتىن شىعىستارىن 7 ەسە ارتتىرعان. ال ءبىزدىڭ بارلىق
مەنشىكتەگى وندىرىسشىلەرىمىز سوڭعى بەس جىلدا بۇل تاراپتاعى شىعىندارىن ۇنەمى ازايتۋمەن
كەلەدى. قازىر ول ءىجو-ءنىڭ 0,12 پايىزدىق ۇلەسىنە دەيىن تۇسكەن. بۇل دامىعان ەلدەر تۇگىل
دامۋشى ەلدەردىڭ اراسىنداعى ەڭ تومەنگى كورسەتكىشتەردىڭ ءبىرى. 2018 جىلى ءبىزدىڭ عىلىمعا
كوڭىل بولگەن كاسىپورىندارىمىزدىڭ سانى 384 قانا بولدى، ال بۇدان 10 جىل بۇرىن ونىڭ
سانى 438 بولاتىن. كاسىپورىندا عىلىممەن اينالىساتىن قىزمەتكەرلەر سانى دا سوڭعى 5
جىلدا 3 مىڭنان ارتىق ادامعا ازايعان.
ەلىمىز وندىرىسكە عىلىم جەتىستىكتەرىن ەنگىزۋدى تالاپ ەتكەن كوپتەگەن قاۋلىلار
قابىلداپ، يننوۆاتسيالىق ەكونوميكا جاسايمىز، تەحنوپاركتەر قۇرامىز دەپ عىلىمي
جەتىستىكتەرگە قاجەتتى ينفراقۇرىلىمدىق قاجەتتىلىكتەرگە ۇلكەن كولەمدە شىعىندار ءبولىپ
جاتقانىمەن ءىس جۇزىندە ونىڭ جاعدايى وسىنداي بولىپ وتىر. 2012 جىلى جەر بايلىعىن
قولدانۋشىلارعا تاپقان تابىسىنىڭ 1 پايىزىن عىلىمي زەرتتەۋلەرگە ءبولۋى كەرەك دەگەن زاڭ
تالابى دا قابىلدانعان بولاتىن. بىراق ونى دا كوزگە ىلگەن كاسىپورىن بولعان جوق. وسى
شىعىسقا دەپ ەسەپتەلگەن قاراجاتتار ەكولوگيانى جاقسارتۋعا، كۇزەتتى جەتىلدىرۋگە ت.ب.
قولدانىلعان.
مىنە، وسى ماسەلەلەردىڭ ءبارىن ءماجىلىستىڭ پلەنارلىق وتىرىسىندا جايىپ سالعان
«حالىقتىق كوممۋنيستەر» فراكتسياسىنىڭ جەتەكشىسى ايقىن قوڭىروۆ پرەمەر-مينيستر
ا.مامينگە دەپۋتاتتىق ساۋال جولداپ، وسىناۋ كۇردەلى ماسەلەگە نازار اۋدارۋدى سۇرادى.
دەپۋتات ءوزىنىڭ ساۋالىندا وندىرىستەگى عىلىمي جەتىستىكتەردى ىنتالاندىرۋ بويىنشا قانداي
شارالار جاسالعانىن، ونەرتاپقىشتاردى قولداۋدىڭ قانداي جولدارى جاسالعانىن، «ەڭبەك
ونىمدىلىگى – 2020» باعدارلاماسى بويىنشا قانداي شارالار بەلگىلەنگەنىن سۇرادى.

س.ەلەۋ، ساراپشى

Kerey.kz