تاپسىرىس بەرۋشىلەر تويحانالارعا الدىن الا تولەگەن اقشالارىن قايتارا الماي جاتىر، دەپ  حابارلايدى  Azattyq Rýhy تىلشىسى. تۇرعىندار كورسەتىلمەگەن قىزمەت ءۇشىن اقشا ۇستاپ قالعان تويحانا قوجايىندارىنىڭ ارەكەتىنە نارازى.

«الماتىداعى  Astana Plaza مەيرامحاناسىنا ناۋرىزدىڭ 23-ءى كۇنى تۇساۋكەسەر توي جاسايمىز دەپ دايىندالدىق. قوناقتاردى دا شاقىرىپ قويعان ەدىك. مەيرامحانانىڭ اكىمشىلىگىنە الدىن الا اقشا تولەدىك.  بىراق توتەنشە جاعدايعا بايلانىستى توي وتپەيتىن بولدى. جاعدايدى ءتۇسىندىرىپ  ايتىپ ەدىك، اقشامىزدى تولىق قايتارمادى. باستاپقىدا بارلىق اقشانى قايتارمايمىز دەگەن، كەيىن ەلۋ  مىڭ تەڭگەمىزدى ۇستاپ  قالدى»، – دەپ شاعىمداندى ءوزىن ساۋلە مۇقانوۆا دەپ تانىستىرعان الماتىلىق  تۇرعىن.

قانات كيگىزباەۆ ەسىمدى ازامات اناسىنىڭ 80 جىلدىق مەرەيتويىن 4 ءساۋىر كۇنى اتاپ وتپەك بولعان. الىس-جاقىننان كەلەتىن 220 ادامنىڭ باسىن قوسۋدى جوسپارلاعان جىگىت پرەزيدەنتتىڭ قاۋلىسىنان كەيىن ويىنان ەرىكسىز اينىپ، تويدى كەيىنگە شەگەرۋگە ءماجبۇر بولادى. بىراق تويحانا اكىمشىلىگى الدىن الا كەپىلگە تولەنگەن  300 مىڭ تەڭگەنى «ءبىزدىڭ كىنامىز جوق» دەپ قايتارماعان.

تابىستان اسابالار دا قاعىلىپ جاتىر. ون جىلدان بەرى اسابا بولىپ جۇرگەن ايبەك نۇرقاسىمنىڭ سوزىنشە، ناۋرىز – توي ايى.  ونىڭ سوزىنە سەنسەك، اپتاسىنا كەمى ەكى توي جۇرگىزەدى. بىراق قاۋىپتى ىندەتتىڭ تارالۋى توي جاسايتىن ادامداردىڭ كوڭىلىن سۋ سەپكەندەي باسقان.

«تويعا جالعىز بارمايمىز. ءانشى-بيشىلەر دە بولادى. شوۋ كورسەتىلەدى. ءبىر تويعا كەمى  150 مىڭ تەڭگە اقى الامىن. بىراق بارلىق توي توقتاپ جاتىر. قىسقاسى، ۆيرۋس تابىسىمىزعا دا، حالىقتىڭ كوڭىل كۇيىنە دە تەرىس اسەر ەتتى. ەل امان بولسا، توي تابىلادى. مىنا قاۋىپتەن امان قۇتىلساق بولدى عوي»، -دەيدى وسى ايدا جارتى ميلليون تەڭگە تابىستان قاعىلعان ايبەك نۇرقاسىم.

ال مەيرامحانا يەلەرى بولسا الدىن الا تولەگەن اقشانىڭ تولىق قايتارىلماۋىن ازىق-تۇلىكتىڭ ساتىپ الىنۋىمەن ءتۇسىندىردى. جىل بويى توي وتكىزەتىن ورتالىقتار جاعدايلارىنىڭ  كۇرت «قيىنداپ» كەتكەنىن ايتادى.

«ناۋرىز ايىندا توي كوپ ەدى. ءبىزدىڭ مەيرامحانادا 15 شاقتى توي ءوتۋى كەرەك بولعان. تويعا تاپسىرىس بەرگەندەر كارانتيننەن كەيىن توي وتكىزۋدەن باس تارتىپ جاتىر. ازپازشىلار، داياشىلار، تەحنيكالىق قىزمەتكەرلەردىڭ ءبارىن قوسقاندا، 20-دان استام ادام جۇمىس ىستەيدى. مەيرامحانالار كىرىستى تويدان تابادى عوي. ەندى مىنە، ءنول بولىپ وتىرمىز. ءبارىنىڭ نەسيەسى بار. توي يەلەرىنىڭ اقشاسىن قايتارۋعا تىرىسامىز، قانشاما ازىق-تۇلىك الىپ قويعان ەدىك. ۇكىمەت وتەماقى جاعىن قاراستىرسا»، – دەيدى Astana Plaza مەيرامحاناسىنىڭ اكىمشىسى مارجان ءارىپوۆا.

ال جاعدايىمىز قيىن دەگەن قازاقستان قوناقۇيلەرى جانە مەيرامحانالارى قاۋىمداستىعى كومەك سۇراپ، ۇكىمەتكە ارنايى حات جولدادى. قاۋىمداستىقتىڭ پرەزيدەنتى راشيدا شايكەنوۆا قول قويعان حاتتا بيزنەستىڭ بۇل ءتۇرىن سۋبسيديالاۋدى سۇراعان. سونداي-اق، قوناقۇيلەردى جىلدىڭ اياعىنا دەيىن سالىقتان بوساتىپ، نەسيەلىك ءوسىمپۇلداردى الىپ تاستاۋدى جانە كوممۋنالدىق تولەمدەردىڭ ءتاريفىن تومەندەتۋدى دە تالاپ ەتكەن.

ءامىربولات قۇسايىنۇلى، الماتى