بەيرۋت پورتىنداعى ءىرى جارىلىستان كەيىن ىزدەۋ-قۇتقارۋ جۇمىستارى ءالى جالعاسىپ جاتىر.
Reuters اگەنتتىگىنىڭ حابارلاۋىنشا، كەمىندە 135 ادام قازا بولعان، شامامەن 5 مىڭ ادام جاراقاتتانعان. 250 مىڭ ادام باسپاناسىز قالعان. بيلىكتىڭ ايتۋىنشا، قازا بولعاندار سانى ارتۋى مۇمكىن. جارىلىستان كەيىن ونداعان ادام ءىز-ءتۇزسىز جوعالعان. قۇتقارۋشىلار ولاردى ۇيىندىلەر استىنان ىزدەپ جاتىر.
ليۆاندىق LBCI باسىلىمىنىڭ جازۋىنشا، ۇكىمەت جارىلىسقا كىنالىلەر تابىلعانعا دەيىن پورت باسشىلىعىن ۇيقاماققا العان. ىشكى ىستەر مينيسترلىگى تەرگەۋدى بەس كۇن ىشىندە اياقتاۋعا ۋادە بەردى.
Associated Press اگەنتتىگىنىڭ جازۋىنشا، تەرگەۋشىلەر ءمان-جايدى انىقتاۋ ءۇشىن جارىلىس بولعان اۋماقتى زەرتتەي باستاعان. AP مالىمەتىنشە، ليۆانعا گۋمانيتارلىق كومەكتىڭ العاشقى لەگى دە جەتكەن. ەلدى ەكونوميكالىق داعدارىس جايلاپ، قوعام نارازىلىعى ورىستەگەن تۇستا بيلىك جارىلىستىڭ سالدارىمەن كۇرەسۋگە تىرىسىپ جاتىر.
4 تامىزدا بەيرۋتتاعى پورتتا ەكى ءىرى جارىلىس بولىپ، جارىلىس بولعان جەردەن ون شاقىرىمعا دەيىنگى اۋماقتاعى عيماراتتار ءبۇلىنىپ، قيراعان. كوشەلەر عيمارات بولشەكتەرى مەن قالدىقتارعا تولعان، كولىكتەر اۋدارىلعان. جارىلىس تولقىنىن بەيرۋتتان 240 شاقىرىم جەردەگى كيپر تۇرعىندارى سەزگەن.
شامامەن 300 مىڭ تۇرعىن باسپاناسىز قالعان، جارىلىس شىعىنى كەمىندە 3 ملرد دوللار بولادى دەپ جاتىر. جارىلىستىڭ كەسىرىنەن استىق قويماسى قاتتى بۇلىنگەن: قالاداعى استىقتىڭ 85 پايىزى جارىلىس كەزىندە قيراعان ەلەۆاتورلاردا ساقتالعان بولاتىن.
بۇعان دەيىن ليۆان بيلىگى جارىلىسقا قويمادا ساقتالعان 2 750 توننا اممياك سەليتراسى سەبەپ بولدى دەپ مالىمدەگەن ەدى. ونى 2014 جىلى كەدەن قىزمەتى Rhosus كەمەسىنەن تاركىلەپ العان. مولدوۆا تۋى ىلىنگەن كەمە حاباروۆسكىدە تۋعان كيپرلىك يگور گرەچۋشكين ەسىمدى ازاماتقا تيەسىلى بولعان. ول سەليترانى گرۋزيادان موزامبيككە جەتكىزبەك بولىپ، جولشىباي تەحنيكالىق اقاۋعا بايلانىستى بەيرۋتقا توقتاعان. كەيىنىرەك كەمە باسشىسى جۇكتەن باس تارتىپ، كەمە ەكيپاجىنىڭ بىرنەشە جىل ليۆاندا تۇرۋىنا تۋرا كەلگەن: تەڭىزشىلەر جاقىندا عانا ەلدەرىنە ورالعان.
بولجام بويىنشا، سەليترا ساقتالعان قويمادا جۇرگىزىلگەن دانەكەرلەۋ جۇمىستارى جارىلىسقا سەبەپ بولۋى مۇمكىن.
ازات ەۋروپا / ازاتتىق راديوسى
پىكىر قالدىرۋ