“ىستە شيكىلىك بار، ول قۇربان”: ادۆوكات قىزىلوردا وبلىسىنىڭ بۇرىنعى اكىمى جازىقسىز جازالاندى دەپ سانايدى
kerey.kz
ەكس-اكىمى 7 جىلعا باس بوستاندىعىنان ايىرىلدى
بىلتىر جەلتوقساندا سوت ۇكىمى شىققان قىزىلوردا وبلىسىنىڭ ەكس-اكىمى قۋانىشبەك ىسقاقوۆتىڭ ادۆوكاتى ءلاززات احاتوۆا قىلمىستىق ىسكە قاتىستى سوت بىرجاقتى شەشىم شىعارعانىن جاريالادى. ادۆوكات ىستە شيكىلىك دەپ سانايدى.
«ەكس-اكىم قازىرگى كەزدە «سانگە» اينالعان قىلمىستىق كودەكستىڭ 190-شى بابىنىڭ 2 ءبولىمىنىڭ 4 بولىگىمەن، ياعني الاياقتىق بابىمەن 7 جىلعا سوتتالدى. 8 بالانىڭ اكەسى، بىلىكتى مامان، اۋعان سوعىسىنىڭ ارداگەرى، ەل ازاماتى ق.ىسقاقوۆ 7 جىل ارقالايتىنداي نە ىستەدى؟ كىمدى الدادى، قانداي الاياقتىق جاسادى؟ 2019 جىلى ارىستاعى اپات بولعان ايماققا، ياعني ارىس وقيعاسىنان زارداپ شەككەندەرگە سول كەزدەگى وبلىس اكىمىنىڭ بارلىق مەكەمەلەردەگى جۇمىسكەرلەردىڭ ءبىر كۇندىك جالاقىسى اۋدارىلۋ كەرەكتىگى تۋرالى بۇيرىعى 25.06.2019 جىلى شىعادى. 25 ماۋسىمدا، ياعني اتالعان بۇيرىق شىققان كەزدە ق.ىسقاقوۆ وبلىس اكىمى ەمەس، ونىڭ ورىنباسارى قىزمەتىندە بولعان. قىزىلوردا وبلىسى اكىمى قىزمەتىنە ق.ىسقاقوۆ بۇيرىق شىققاننان كەيىن ءۇش كۇننەن سوڭ، 28.06.2019 ج. تاعايىندالادى. ياعني، 25 ماۋسىمدا ءوز ارىپتەستەرىنە، وبلىس اكىمى ورىنباسارلارىنا ونداي تاپسىرما بەرۋگە وكىلەتتىگى بولماعان. الايدا وبلىس اكىمىنىڭ ورىنباسارى ر.رۇستەموۆ تەرگەۋگە، سوتقا بەرگەن كورسەتپەسىندە «ق.ىسقاقوۆتىڭ تاپسىرماسىمەن وبلىستاعى 2000-نان استام مەملەكەتتىك قىزمەتكەرلەردىڭ ءبىر كۇندىك جالاقىسى «سىر مەيرىمى» قوعامدىق قورىنا اۋدارىلدى» دەگەن. الايدا ءىس ماتەريالدارىنان كورىنگەندەي، بۇل ماسەلەنى قوزعاعان، ياعني جينالعان اقشانى تىكەلەي ارىسقا ەمەس، اتالمىش قورعا اۋدارۋدى ر.رۇستەموۆ مىرزانىڭ ءوزى ۇسىنعانى تۋرالى جينالىس حاتتاماسى بار. سونىمەن قاتار، ول فاكت كۋاگەرلەردىڭ كورسەتپەلەرىمەن دە قۋاتتالادى. قىلمىستىق ءىس قوزعالىپ، وبلىس اكىمىن ورىنباسارلارىمەن قوسا، 7 جىلعا سوتتاۋعا باستى نەگىز بولعان «قىلمىس» وسى وقيعادان ارقاۋ الىپ، ارى قاراي ءوربيدى»، – دەپ جازدى ادۆوكات ل.احاتوۆا.
ادۆوكات قىلمىستىق ىسكە تارتىلعان باسقا دا تۇلعالار تەرگەۋ جانە سوت پروتسەسى كەزىندە بەرگەن جاۋاپتارىن سان مارتە وزگەرتكەنىن ايتتى.
«ماسەلەن، وبلىس اكىمىنىڭ سول كەزدەگى ورىنباسارلارى ر.رۇستەموۆ، م.دەلمۇحانوۆ، بۇرىنعى قۇرىلىس باسقارماسىنىڭ باسشىسى م.السەريكوۆ، كاسىپكەر ج.يسكاكوۆ بولعان جاعدايدى «بەلگىسىز سەبەپتەرگە بايلانىستى» ناقتى بايانداۋدان جالتارىپ، جاۋاپتارىن سان مارتە وزگەرتكەنىن ءىس قۇجاتتارىنان كورۋگە بولادى.
ق.ىسقاقوۆ ءوزىنىڭ كىناسىزدىگىن وبەكتيۆتى دالەلدەردىڭ جيىنتىعىمەن دالەلدەگەن سايىن، ىسكە كۋا رەتىندە قاتىسۋشىلار وزدەرىنىڭ بەرگەن جاۋاپتارىن بىردەن وزگەرتىپ جىبەرەتىندەرى، ال تەرگەۋ ورگانى ولاردىڭ جۇيەسىز جانە تۇراقسىز كورسەتىمدەرىنە بۇكىل قىلمىستىق ءىستىڭ سحەماسىن ىڭعايلاپ كەلتىرىپ وتىرعاندارى ءىس ماتەريالدارىندا انىق كورىنىپ تۇر. ءىس بويىنشا تاعى ءبىر ماڭىزدى ماسەلەگە ءمان بەرىلمەي قالعان.
قر باس پروكۋراتۋراسىنىڭ 22 ماۋسىمداعى ءىستى قوسىمشا تەرگەۋگە جىبەرۋ تۋرالى قاۋلىسىنىڭ 9-ءشى پۋنكتىندە «25.06.2019 جىلى قايرىمدىلىق قورعا اقشا جيناۋ ماسەلەسىنە ق.ىسقاقوۆتىڭ قاتىستىلىعىن انىقتاۋ قاجەت» دەگەن ەسكەرتپەسىنە تەرگەۋ ورگانى ىسقاقوۆتىڭ بۇل ماسەلەگە قاتىستىلىعى بار-جوعىن انىقتاماعان. ءتىپتى، وعان سوت تاراپىنان دا باعا بەرىلمەگەن! قور ديرەكتورى ابدراحيموۆا ءتورت مەكەمەگە اۋدارعان قارجىنىڭ يگەرىلۋىن راستايتىن قۇجاتتاردى جازباشا دا، اۋىزشا دا سۇراتپاعانى تۇسىنىكسىز.
ونى سوت تەرگەۋى بارىسىندا ءۇش مەكەمە باسشىسى ا.ەرنازاروۆ، س.سادىقوۆ، ر.يمانوۆا دا تولىعىمەن راستايدى. ياعني ابدراحيموۆا ءوزى اقىماقتىقپەن نە باسقالاي سەبەپپەن قۇجاتسىز اۋدارا سالعان قاراجات ءۇشىن قورىقسا دا، قور مەن ءتورت مەكەمە اراسىندا تۋىنداعان ماسەلەنى ازاماتتىق ءىس تارتىبىمەن شەشۋ ءۇشىن ەشقانداي ارەكەت جاساماعان. بۇل ماسەلەگە تەرگەۋ ورىندارى دا، سوت تا نازار اۋدارماي وتىر!»، – دەگەن ادۆوكات قر باس پروكۋراتۋراسىنا جۇگىندى.
ەسكە سالساق، 2020 جىلدىڭ 10 جەلتوقسانىندا قىزىلوردا قالالىق №2 سوتىندا قۋانىشبەك ىسقاقوۆقا قاتىستى سوت ۇكىمى شىعىپ، ەكس-اكىم 7 جىلعا باس بوستاندىعىنان ايىرىلدى. ول جازاسىن قاۋىپسىزدىگى ورتاشا كولونيادا وتەۋى كەرەك. سونداي-اق، قۋانىشبەك ىسقاقوۆ مەملەكەتتىك، ۇلتتىق جانە كۆازيمەملەكەتتىك ۇيىمداردا قىزمەت اتقارا المايدى.
پىكىر قالدىرۋ