قىزىلوردا وبلىسىندا اكىمدەردىڭ داۋى بىتەر ەمەس.
kerey.kz
بۇل جول ادۆوكات ءلاززات احاتوۆا قىزىلوردا وبلىسىنىڭ ەكس-اكىمى قۋانىشبەك ىسقاقوۆتىڭ تاپسىرماەن قامالعانى تۋرالى پىكىرىن ءبىلدىرىپ، تاعى ءبىر اقپاراتتى تاراتتى. ونىڭ سوزىنشە، سوت قاراما قايشىلىقتارعا تولى. ادۆوكاتتىڭ ايتۋىنشا، قورعا 80 ملن تەڭگەنى اۋدارۋعا قۇرىلىس باسقارماسىنىڭ بۇرىنعى باسشىسى تاپسىرما بەرگەن.
“ابدوللا داستانوۆ مىرزا، وتكەندە جەلى بەتىندە: ىسقاقوۆتىڭ قورعاۋشىلارى قورعا اۋدارۋعا تاپسىرما بەرگەندى ەمەس، سول اقشانىڭ جۇمسالۋىنا كىم تاپسىرما بەرگەنىن انىقتاۋ كەرەك قوي”-دەپ، “كاسىبي” اقىل-كەڭەس ايتقان ەكەنسىز. جاۋاپ جازۋعا مۇمكىندىك ەندى بولىپ وتىر، ايىپقا بۇيىرماسسىز. ونىڭ ۇستىنە ءىس ماتەريالدارىنان بولەك، كەشەگى سوت وتىرىسىندا ءوزىم دە سۇراقتارىمدى ءتيىستى تۇلعالارعا تاعى دا قويىپ، بەكىتىپ، ناقتىلاپ الايىن دەگەم. ال كىم تاپسىرما بەرگەنىن تىڭداڭىز:
10.12.2020 ج. قىزىلوردا قالالىق 2-ءشى سوتىنىڭ ايىپتاۋ ۇكىمىنىڭ 3-ءشى بەتىندە 80 ملن. اقشانى ءتورت قۇرىلىس كومپانياعا اۋداراۋعا ابدراحيموۆاعا تاپسىرمانى قۇرىلىس باسقارماسىنىڭ بۇرىنعى باسشىسى السەريكوۆتىڭ بەرگەنى كورسەتىلگەن. ال قىزمەتكەرلەردىڭ ءبىر كۇندىك جالاقىسىن قورعا اۋدارۋعا تاپسىرمانى سول كەزدەگى وبلىس اكىمىنىڭ ورىنباسارى ر.رۇستەموۆ بەرگەنىن ساپۋرا حانىم سوتتاعى كەشەگى جاۋابىمەن تاعى دا بەكىتىپ بەردى. 80 ملن-دى مونشا قۇرىلىسىنا قوردان الىپ، جۇمساۋ تۋرالى يدەيانىڭ دا السەريكوۆ مىرزاعا تيەسىلى بولعانىن، سونداي-اق ول تاپسىرما قور باسشىسىنا قۇرىلىس باسقارماسىنىڭ بۇرىنعى باسشىسى السەريكوۆ مىرزا تاراپىنان بەرىلگەندىگى دە كەشەگى سوتتا ناقتى انىقتالىپ، راستالدى»، – دەدى ادۆوكات ل.احاتوۆا.
اپەللياتسيالىق سوت وتىرىستارىنىڭ كەزەكتى تەرگەۋىندە “باق-بەرەكە” جشس-نىڭ ء(تورت قۇرىلىس كومپانيانىڭ ءبىرى) ديرەكتورى ا.ەرنازاروۆ (كەشەگى سوتقا كۋا رەتىندە قاتىستى) 80 ملن-دى قولما-قول اقشاعا اينالدىرۋعا تاپسىرمانى السەريكوۆ مىرزادان العانىن سوت وتىرىسىندا ءوز جاۋابىمەن تاعى ءبىر بەكىتكەن.
«بۇل ەپيزود جايلى بولەك جازبا بولادى. ءبىر وقيعامەن ەكىنشى وقيعانى ارالاستىرىپ، ۇزىن-سونار جازبا بوپ كەتسە، قابىلداۋعا قيىن بولار. كەشەگى سوت وتىرىسىنا كۋا رەتىندە السەريكوۆ تە، رۇستەموۆ مىرزا دا قاتىستى. السەريكوۆ مۇحامەديسا مىرزا جاۋاپتارىنان ءوزى دە شاتاسىپ، ەلدى دە شاتاستىرىپ بىتكەن سياقتى..ىستەگى ماتەريالدارعا كوز سالساق، ءار تەرگەۋدە بەرگەن جاۋابى ءار قيلى. مىسالى، 11 ناۋرىز كۇنگى كورسەتپەسىندە 80 ملن-دى “شىعىس مونشاسى” قۇرىلىسىنا جۇمساۋعا تاپسىرمانى دەلمۇحانوۆ بەردى دەگەن. 29-ناۋرىزداعى تەرگەۋگە بەرگەن جاۋابىندا ونداي تاپسىرمانى يماندوسوۆتان العانىن كورسەتكەن. ال 7 ساۋىردە تەرگەۋگە بەرگەن جاۋاپتارىندا يماندوسوۆ پەن دەلمۇحانوۆتى شاتاستىرىپ العانىن ايتقان»، -دەدى ادۆوكات.
كەشەگى سوتتا ءتۇرلى جاۋاپ بەرۋمەن ەلدى شاتاستىرعان السەريكوۆكە ادۆوكات تاراپىنان قويلىعان سۇراقتار از بولماعان. كۋاگەر، باسىندا «جاڭىلىسقانىن»، سوڭىندا «شىندىقتى» ايتقانىن جاسىرمادى.
ء“ار كەزدە ءار باسشىعا قارسى كورسەتپە بەرۋىڭىزدىڭ سەبەبى-تەرگەۋ ورگانى تاراپىنان كورسەتىلگەن ىقپالدىڭ، اتاپ ايتقاندا قىسىمنىڭ ناتيجەسى مە، الدە ءوز وتىرىكتەرىڭىزدەن ءوزىڭىز جاڭىلىسىپ، شاتاسىپ بىتكەنىڭىزدىڭ كورىنىسى مە؟”- دەگەن سۇراققا “ەندى باسىندا بىلاي نەعىلا ما دەگەن ەدىم، سوسىن اياعىندا شىندىقتى ايتتىق قوي”-دەيدى. سوندا ءسىزدىڭ قاي ءسوزىڭىز وتىرىك، قاي ءسوزىڭىز شىندىق؟”- دەگەن سۇراعىمىزعا ماردىمدى جاۋاپ الا المادىق. سوت تاراپىنان كۋاعا جالعان جاۋاپ بەرگەن جاعدايدا قىلمىستىق جاۋاپتىلىققا تارتىلاتىنى ەسكەرتىلگەن. ءبىرىنشى ساتىداعى سوتتا دا سول زاڭ نورماسى ەسكەرتىلەدى. سوعان قاراماستان، ءبىر ادامنىڭ مىڭ قۇبىلىپ، سان ءتۇرلى جالعان جاۋاپتارىنىڭ سالدارىنان قانشا ادام تەمىر توردىڭ ارتىندا وتىر؟»، -دەدى ىسقاقوۆتىڭ ادۆوكاتى.
احاتوۆا، الداعى ۋاقىتتا وزگەدە كۋالاردىڭ جاۋاپتارى تۋرالى جاريالاماق…
پىكىر قالدىرۋ