جاڭالىقتار شوۋ-بيزنيس الەۋمەت

تالدىقورعاندا جاڭا ەكو-اۆتوبۋستار قولدانىسقا بەرىلدى

kerey.kz

 |  Sep 23, 2021

بۇگىن، قازاقستان تاۋەلسىزدىگىنىڭ 30 جىلدىعىنا وراي، وبلىس ورتالىعىنىڭ تالدىقورعانعا قونىس اۋدارۋىنىڭ 20 جىلدىعى اياسىندا ايتۋلى وقيعا ءوتتى. كولىك قولجەتىمدىلىگىن ارتتىرۋ ماقساتىندا قالادا اۆتوبۋس پاركى جاڭارتىلدى.
“جەتىسۋ” اكك ارقىلى جالپى سوماسى 2,3 ملرد.تەڭگەدەن اساتىن گازبەن جۇرەتىن 55 ەكولوگيالىق اۆتوبۋس ساتىپ الىنادى، ولار تاسىمالداۋشىلارعا 7 جىلعا ليزينگكە بەرىلەدى (جىلدىق 4% – بەن). ونىڭ 32-ءسى قالا تۇرعىندارىنا پايدالانۋعا بەرىلدى.
مەرەكە قارساڭىندا ورتالىق الاڭدا وبلىس اكىمى اماندىق باتالوۆتىڭ قاتىسۋىمەن “يۋتونگ” ماركالى 32 جاڭا اۆتوبۋستىڭ العاشقى پارتياسىن-تاپسىرۋ سالتاناتى ءوتتى. قالعان 23 اۆتوبۋس (14 پاز جانە 9 “يۋتونگ”) جىل سوڭىنا دەيىن تالدىقورعان كوشەلەرىمەن جۇرەدى.
“بىرنەشە كۇن بويى جاڭا اۆتوبۋستار قالالىق باعىتتار بويىنشا سىنالدى. جالپى، ولار بارلىق زاماناۋي تالاپتارعا جاۋاپ بەرەدى. ولاردىڭ كەيبىرەۋلەرى – 10 مەتر، باسقالارى-8,5 مەتر، جالپى جولاۋشىلار سىيىمدىلىعى 55-تەن 67 ورىنعا دەيىن. وندا بەينەباقىلاۋ، كونديتسيونەرلەر، مۇمكىندىگى شەكتەۋلى ازاماتتاردى وتىرعىزۋ – ءتۇسىرۋ ءۇشىن قايىرمالى پلاتفورمالار كوزدەلگەن. سونداي-اق، ەلەكتروندى بيلەتتەۋ جۇيەسى ورناتىلعان. جالپى العاندا، اۆتوبۋستاردىڭ وزدەرى بارلارعا قاراعاندا الدەقايدا كەڭ، ولاردا مۇگەدەكتەر ارباسىنا ارنالعان ورىندار كوپ. العاشقى اۆتوبۋستار جولاۋشىلار اعىنى ەڭ كوپ مارشرۋتتارعا جىبەرىلەدى. ال ولاردىڭ قانشالىقتى جايلى جانە ىڭعايلى ەكەنىن سىزدەر، قۇرمەتتى تالدىقورعاندىقتار، ءوز بەتتەرىڭىزبەن باعالاي الاسىزدار”، – دەدى ايماق باسشىسى.
سونداي-اق، ايماق باسشىسى اۆتوجولداردى جوندەۋ جانە قالالىق ينفراقۇرىلىمدى جاقسارتۋ جۇمىستارى جالعاساتىنىن ايتتى.
ساتىپ الىنعان اۆتوبۋستارعا جانارماي قۇيۋ ءۇشىن قالادا اۆتوموبيلدىك گاز تولتىرۋ كومپرەسسورلىق ستانتسياسى سالىندى جانە ىسكە قوسىلدى. بۇل رەتتە جاڭا اۆتوبۋستاردا ءجۇرۋ ءتاريفى وزگەرىسسىز قالادى.