ۇكىمەت “قازاقستان رەسپۋبليكاسىنىڭ ازاماتتىعى تۋرالى”زاڭعا وزگەرىس ماسەلەسىن قاراستىرىپ جاتىر. بۇل وزگەرىس بويىنشا، مەملەكەتتىك ءتىلدى، مەملەكەت تاريحى مەن نەگىزگى زاڭدارىن بىلمەۋ – قازاقستان ازاماتتىعىن بەرۋدەن باس تارتۋعا نە ازاماتتىعىن قالپىنا كەلتىرۋدەن باس تارتۋعا قوسىمشا نەگىز بولا الادى. بۇل تۋرالى پرەمەر-مينيستر ءاليحان سمايىلوۆتىڭ دەپۋتات ساۋالىنا جولداعان جاۋابىنا سىلتەپ، Kursiv.Media جازدى.
پرەمەر جاۋابىندا بۇل تالاپ قوس ازاماتتىققا جول بەرمەۋ ءۇشىن دە ەنگىزىلىپ وتىرعانىن ايتقان.
“قازىرگى زاڭ بويىنشا قازاقستاندا زاڭدى نەگىزدە كەمى بەس جىل تۇراقتى ءومىر سۇرگەن نەمەسە قازاقستان ازاماتىمەن كەمى ءۇش جىل نەكەدە تۇرعان، سونداي-اق قازاقستاندا تۇراقتى تۇرۋ ماقساتىندا كەلگەن جانە جاقىن تۋىستارىنىڭ ءبىرى قازاقستان ازاماتى بولىپ سانالاتىن بۇرىنعى وداقتاس رەسپۋبليكا ازاماتتارىنا قازاقستان ازاماتتىعى بەرىلەدى” دەيدى پرەمەر-مينيستر.
قازىرگى قولدانىستاعى زاڭعا ساي، مىنا ساناتتاعى ادامار جەڭىل ەرەجەمەن ازاماتتىق الا الادى:
- قازاقستاندا زاڭدى نەگىزدە تۇرىپ جاتقان قانداستار (تۇرعان مەرزىمىنە قاراماستان);
- جاپپاي ساياسي قۋعىن-سۇرگىن قۇربانى رەتىندە اقتالعاندار مەن ولاردىڭ قازاقستاندا زاڭدى نەگىزدە تۇراقتى تۇراتىن، ەركىنەن تىس ازاماتتىعىنان ايىرىلعان ۇرپاقتارى;
- ەلدىڭ جوعارى وقۋ ورىندارىندا وقيتىن ەتنيكالىق قازاقتار.
مۇنداي جاعدايدا ءىستى قاراۋ مەرزىمى ءوتىنىش بەرىلگەن كۇننەن ءۇش اي اسپاۋعا ءتيىس.
“قولدانىستاعى زاڭ بويىنشا قازاقستان ازاماتتىعىن قالپىنا كەلتىرۋ مەن بەرۋدەن باس تارتۋدىڭ 14 نەگىزى بار. ونىڭ كوبى زاڭ بۇزۋشىلىقپەن بايلانىستى، بىراق ونىڭ ىشىندە قازاق ءتىلىن بىلمەگەنى ءۇشىن ازاماتتىق بەرىلمەيدى دەگەن ءسوز جوق ەدى” دەيدى باسىلىم.
بيىل ءساۋىر ايىندا سەنات توراعاسى ماۋلەن اشىمباەۆ قىسقا مەرزىمگە كەلەتىن شەتەلدىكتەرگە مەملەكەتتىك ءتىلدى ءبىلۋ مىندەتى ەمەس، ال ۇزاق تۇرعىسى كەلەتىندەر مەملەكەتتىك ءتىلدى ءبىلۋى ءتيىس دەگەن ەدى.
قازاقستان ازاماتتىعى مەن مەملەكەتتىك ءتىلدى دامىتۋ ماسەلەسى رەسەيدەگى موبيليزاتسياعا بايلانىستى بيىل قىكۇيەكتە رەسەيدەن قازاقستانعا قاشىپ كەلگەندەر كۇرت كوبەيگەن تۇستا قوعامدا ايرىقشا تالقىلانعان. ۇكىمەت مالىمەتىنە قاراعاندا، 21 قىركۇيەكتەن بەرى شەتەلدىڭ 200 مىڭ ازاماتىنان جسن سۇراعان ءوتىنىش تۇسكەن. شەتەل ازاماتتارى مەن زاڭدى تۇلعالارى جسن الماسا قازاقستاننىڭ مەملەكەتتىك ورگاندارىنىڭ قىزمەتىن پايدالانا المايدى جانە بانك وپەراتسيالارىن جۇرگىزە المايدى.
ازات ەۋروپا / ازاتتىق راديوسى
پىكىر قالدىرۋ