ۋكراينالىق اسكەريلەر دونباسستا رەسەي كۇشتەرىنىڭ بىرنەشە شابۋىلىنا تويتارىس بەرگەنىن مالىمدەدى. ال ۋكراينا پرەزيدەنتى ۆلاديمير زەلەنسكي “رەسەي اسكەرىنىڭ ءار جەڭىلىسى ماسكەۋدىڭ اسكەري تاكتيكاسىنىڭ اقىلعا سىيمايتىنىن كورسەتتى” دەدى. مايدان شەبىندە نە بولىپ جاتىر؟ قىسقاشا شولىپ شىقتىق.
كيەۆ “رەسەي ۋكراينا كۇشتەرى حەرسون قالاسىن قايتارۋ ءۇشىن شابۋىل جاسايدى دەپ قاۋىپتەنەدى، سوندىقتان بوس قالعان ۇيلەردى توناپ، بۇل ۇيلەرگە قاراپايىم كيىنگەن اسكەريلەردى ورنالاستىرىپ، كوشە شايقاسىنا دايىندالىپ جاتىر” دەپ ايىپتادى. رەسەي ۋكرايناعا باسىپ كىرگەندە العاش جاۋلاپ العان قالالارىنىڭ ءبىرى وسى حەرسون بولدى. كەيىنگى ۋاقىتتا ماسكەۋ حەرسونعا ۋكراينا اسكەرى شابۋىل جاساۋى مۇمكىن دەپ تۇرعىنداردى قالادان كەتۋگە شاقىرعان. ەكى تاراپتا قازىر حەرسوندا جارىق پەن سۋ جوق ەكەنىن ايتادى.
كرەمل ۋكراينا تارابىن “سابوتاج جاسادى” دەسە، كيەۆ “رەسەي ءبىر جارىم شاقىرىم ەلەكتر تورابىن ءۇزدى” دەپ تە ايىپتادى.
كيەۆ “رەسەيلىك كۇشتەر بەيبىت تۇرعىنداردىڭ جەكە ۇيلەرى مەن ينفراسترۋكتۋرا وبەكتىلەردەن قۇرالداردى، تاماقتاردى، ترانسپورتتاردى ۇرلاپ، رەسەيگە اكەتىپ جاتىر” دەيدى.
بۇعان قوسا، ۋكراينا باس شتابى حەرسون وبلىسى بەريسلاۆ اۋدانىنداعى رەسەيدىڭ قارۋ-جاراق قويماسىنا شابۋىل جاساپ، اسكەري تەحنيكالاردى جويعانىن; رەسەيلىك 32 اسكەري قازا تاپقانىن حابارلادى.
سوعىس ۋاقىتىندا مۇنداي اقپاراتتاردى تاۋەلسىز دەرەككوزدەردەن تەكسەرۋ قيىن.
ۋكراينا قارۋلى كۇشتەرىنىڭ باس شتابى كۇندەلىكتى ەسەبىندە رەسەي كۇشتەرى ەلدىڭ شىعىسىنداعى باحمۋت، اۆدەەۆكا جانە نوۆوپاۆلوۆكاعا شابۋىلدى ۇدەتتى دەپ مالىمدەدى. ماسكەۋ كۇشتەرى كەيىنگى اپتادا دونەتسكتە وسى ءۇش قالانى الۋعا تىرىسىپ جاتىر. بۇعان قوسا، رەسەي اسكەريلەرى ۋكراينانىڭ ءار ايماعىنداعى ينفراسترۋكتۋرالار مەن ازاماتتىق وبەكتىلەردى اتقىلاۋىن دا توقتاتقان جوق.
ال زەلەنسكي رەسەيدىڭ راكەتالىق شابۋىلى كوبەيگەن تۇستا الەم ۋكرايناعا راكەتادان قورعايتىن جۇيەلەردىڭ كەلەسى لەگىن بەرگەنىن مالىمدەدى. “بۇل كومەك ءبىزدىڭ قورعانىسىمىزدى كۇشەيتە تۇسەدى. ۋكراينا اسپانى 100 پايىز قورعاۋدا دەي المايمىن، بىراق ءبىز ماقساتىمىزعا جاقىنداپ كەلەمىز” دەدى ول 7 قاراشاداعى ۆيدەومالىمدەمەسىندە.
ۋكراينا قورعانىس ءمينيسترى الەكسەي رەزنيكوۆ 7 قاراشاداعى مالىمدەمەسىندە راكەتاعا قارسى NASAMS جانە Apside قارۋلارىن العانىن ايتتى.
“بۇل قارۋ ۋكراينا اسكەرىن ودان ءارى كۇشەيتىپ، ەلىمىزدى قاۋىپسىز ەتە تۇسەدى” دەپ جازدى ول Twitter جەلىسىندە. رەزنيكوۆ قارۋدى قاي ەلدەر بەرگەنىن اشىق ايتپادى، دەگەنمەن اقش، نورۆەگيا، يسپانياعا “العىس ايتتى”.
زەلەنسكي دۇيسەنبىدەگى مالىمدەمەسىندە دونەتسك وبلىسىندا كەسكىلەسكەن شايقاس بولىپ جاتقانىن دا ايتىپ، دونباسستى “وككۋپانتتاردىڭ باسسىزدىعىنىڭ ەپيتسەنترى” دەپ اتادى.
“رەسەي كۇنىنە جۇزدەگەن ادامىنان ايىرىلىپ جاتىر. سونداعى ۋكراينانىڭ باقىلاۋىنداعى جەرلەر وككۋپانتتاردىڭ مايىتىنە تولىپ قالدى” دەدى ول.
زەلەنسكي پاۆلوۆكا ماڭىندا جۇرگەن رەسەيلىك اسكەريلەر ءوز ايماقتارىنىڭ گۋبەرناتورىنا شاعىمداندى دەپ مالىمدەدى. 7 قاراشادا امەريكالىق CNN تەلەارناسى رەسەيدىڭ تىنىق مۇحيت فلوتىنىڭ 155-اسكەري بريگاداسىنىڭ سولداتتارى پريمورسك ايماعىنىڭ گۋبەرناتورى ولەگ كوجەمياكوعا شاعىمدانعانىن حابارلادى. تەلەارنانىڭ مالىمەتىنشە، رەسەيلىك اسكەريلەر دونەتسكتە “تۇسىنىكسىز شايقاسقا” جىبەرىلگەنىن، ءتورت كۇندە 300 سولدات قازا تاۋىپ يا جارالانعانىن، قارۋلارىنىڭ 50 پايىزىنان ايىرىلعانىن ايتقان.
زەلەنسكيدىڭ سوزىنشە، كوجەمياكو اسكەريلەردىڭ شاعىمىن “اسىرا سىلتەۋ” دەپ اتاپ، “شىعىن سونشالىقتى كوپ ەمەس” دەگەن.
بۇۇ ەسەبىنشە، 24 اقپاننان بەرى ۋكرايناداعى سوعىستا كەمى 6490 بەيبىت تۇرعىن (ونىڭ ىشىندە 400 بالا بار) قازا تاپقان. ال كيەۆ رەسەيمەن كەلىسسوزدەن قاشپايتىنىن ايتادى، بىراق كەلىسسوز جۇرگىزۋ ءۇشىن رەسەي ۋكراينادان اسكەرىن تولىق اكەتۋى كەرەك دەگەن شارت قويىپ وتىر.
پىكىر قالدىرۋ