Q-pop جانرىندا ءان سالاتىن Ninety One توبى بۇۇ بالالار قورىنىڭ (يۋنيسەف) قازاقستانداعى ىزگى نيەت ەلشىلەرى اتاندى. بۇگىن، 16 مامىردا الماتىدا وتكەن ءباسپاسوز ءماسليحاتىندا يۋنيسەف-ءتىڭ قازاقستانداعى وكىلى ارتۋر ۆان ديزەن توپ مۇشەلەرىنە وسىنداي سەرتيفيكات تاپسىردى. توپ مۇشەلەرى قورمەن بىرگە بالالار قۇقىعىن قورعاۋعا كۇش سالماق.
– Ninety One توبى ۇسىنىسىمىزدى قابىل العانى – ءبىز ءۇشىن ۇلكەن مارتەبە. قازاقستانداعى بالالاردىڭ ەڭ وزەكتى ماسەلەلەرىنە نازار اۋدارتۋدا توپتىڭ تالانتى مەن تانىمالدىعى وتە ماڭىزدى ءرول اتقارادى. قازىر بىرلەسكەن ماڭىزدى ءىس-شارا بويىنشا جۇمىس ىستەپ جاتىرمىز. جاقىندا Ninety One توبىن UNICEF Talks-تا (جاستار كونفەرەنتسياسى – رەد.) كورەتىن بولاسىزدار، – دەدى يۋنيسەف-ءتىڭ قازاقستانداعى وكىلى ارتۋر ۆان ديزەن.
Ninety One توبىنىڭ وكىلدەرى يۋنيسەف-ءتىڭ ۇسىنىسىنا قۋانا كەلىستىك دەيدى. ولار وسى ءرول ارقىلى قوعامدا جاستاردىڭ ءۇنىن ەستىرتۋگە كۇش سالاتىنىن ايتتى.
توپ مۇشەسى دۋلات مۇحامەتقاليەۆتىڭ ايتۋىنشا، ولاردىڭ وي-يدەيالارى يۋنيسەف-تىكىمەن ۇشتاسادى.
– توپتىڭ نەگىزگى ماقساتى – جاستاردى قولداۋ، جىگەرلەندىرۋ. ءبىز ءارتۇرلى الەۋمەتتىك تاقىرىپتاردى كوتەرۋگە، قولىمىزدان كەلسە، سوعان كومەكتەسۋگە تىرىسامىز، – دەدى ول.
Ninety One توبى قورمەن بىرگە كيبەربۋللينگ جانە پسيحيكالىق دەنساۋلىق تاقىرىبىنداعى شارالارعا اتسالىسپاق.
– كيبەربۋللينگ نە ەكەنىن، ونىمەن كۇرەس قانشالىق ماڭىزدى ەكەنىن تۇسىنەمىز جانە ونىمەن قالاي كۇرەسۋدى دە بىلەمىز، – دەيدى ءانشى.
Ninety One توبى بىلتىر يۋنيسەف پەن TikTok بىرلەسە وتكىزگەن “پسيحيكالىق ءال-اۋقات بارىنەن دە جوعارى” ناۋقانىنا قاتىسقان.
الەم بويىنشا يۋنيسەف-ءتىڭ 200-دەن استام ىزگى نيەت ەلشىسى بار. ولار بالا مەن ايەل قۇقىعىن قورعاۋ بويىنشا قوعامعا كوبىرەك اقپارات تاراتۋدى كوزدەيدى.
Ninety One – 2015 جىلى قازاقستاندىق ءانشى ءارى پروديۋسەر ەربولات بەدەلحاننىڭ باستاۋىمەن قۇرىلعان مۋزىكالىق توپ. ولار قازاقشا اندەردى قازىرگى زامانعى ناقىشتا ايتۋ ارقىلى ەل اراسىندا تانىمال بولعان.
پىكىر قالدىرۋ