ماتچتىڭ 27-مينۋتىندا ابزال بەيسەبەكوۆتىڭ الاڭ ورتاسىنان شىعارعان پاسىن ماكسيم سامورودوۆ ادەمى گولعا اينالدىرا ءبىلدى. ماكسيم قاتتى كەلگەن پاستى اياعىمەن توقتاتتى دا، قارسىلاس قاقپاسىنىڭ سول قاپتالىنا باعىتتاعان. سولتۇستىك يرلانديا قاقپاشىسى بەيلي پيكوك-فاررەلل قولىن سوزعانىمەن جەتپەدى. دوپ قاقپادا. 30 مىڭ جينالعان ستاديون تۋلاپ سالا بەردى.
وسى گولدان كەيىن سولتۇستىك يرلانديا شابۋىلدى ۇدەتە باستادى. ماتچتىڭ ستاتيستيكاسى دا سونى كورسەتەدى. ويىن كەزىندە قازاقستان جەتى رەت، سولتۇستىك يرلانديا 14 رەت شابۋىلداعان. بىراق قازاقستان قۇراماسىنىڭ قاقپاشىسى يگور شاتسكي مەن ءنۇرالى ءالىپ باستاعان قورعاۋشىلار قارسىلاستارىنا گول سوعۋعا مۇمكىندىك بەرمەدى.
بۇل – قازاقستاننىڭ ىرىكتەۋ اياسىنداعى التى ويىنداعى ءتورتىنشى جەڭىسى.
قازىر قازاقستان بار H ىرىكتەۋ توبىندا ءتورت ەلدىڭ جولدامادان ءۇمىتى بار. دانيا مەن سلوۆەنيا 13 ۇپاي، فينليانديا مەن قازاقستاندا 12 ۇپاي جيناعان. قازاقستان 4-ورىندا كەلەدى. توپتان وزىپ شىعىپ، ەۋروپا بىرىنشىلىگىنە جولداما الاتىن ەكى قۇراما قازان-قاراشادا وتەتىن ويىنداردا انىقتالماق.
قازاقستان تۋرنير كەستەسىندە ءتورتىنشى ورىندا تۇرسا دا، 2024 جىلى گەرمانيادا وتەتىن ەۋروپا چەمپيوناتىنا شىعۋ مۇمكىندىگى ساقتاۋلى. قازاقستان بۇرىن-سوڭدى ەۋرو دوداعا شىعۋعا ءدال مۇنداي جاقىن بولماعان.
وسىدان ءۇش كۇن بۇرىن، 7 قىركۇيەكتە استانادا قازاقستان قۇراماسى فينليانديامەن 0:1 ەسەبىمەن جەڭىلىپ قالعانى ويىنشىلاردى دا، جانكۇيەرلەردى دە جابىرقاتقان. سوندىقتان سولتۇستىك يرلانديامەن ويىندا جەڭىس وتە قاجەت بولدى. ەگەر بۇل ويىندا جەڭىلگەندە قازاقستاننىڭ تۋرنير كەستەسىندەگى جاعدايى قيىنداپ، ەۋروپا چەمپيوناتىنا شىعۋعا مۇمكىندىگى ازايىپ كەتەر ەدى.
بۇگىنگى سولتۇستىك يرلانديادان كەيىنگى ويىننان سوڭ قازاقستان قۇراماسىنىڭ باس باپكەرى رەسەيلىك ماگومەد اگيەۆ ءباسپاسوز ءماسليحاتىندا قۇرامانىڭ جاعدايىنا كوڭىلى تولمايتىنىن ايتىپ قالدى.
“كوماندانىڭ جاعدايى جاقسى دەپ ايتا المايمىن، بۇگىنگى ويىن سونى كورسەتتى. ويىننىڭ سوڭىندا ناشار وينادىق. فينليانديادان ءۇش ۇپاي الۋ كەرەك دەگەن ماقساتىمىز ورىندالماي قالدى. بۇگىن اشۋلى بولدىق. ءبىز جولداماعا تالاسقا قايتا ورالىعىمىز كەلدى. الدا سىرت الاڭدا قيىن ماتچتار كۇتىپ تۇر، سوعان دايىندالامىز” دەدى ول.
ىرىكتەۋ جارىسى قاراشانىڭ سوڭىنا دەيىن جالعاسادى. قازاقستان قۇراماسىنىڭ ەندى ءتورت ويىنى قالدى. ءۇش ويىن، اگيەۆ ايتقانداي، قازاقستاننىڭ توپتاعى باستى قارسىلاستارى دانيا، فينليانديا جانە سلوۆەنيامەن سىرت الاڭدا وتپەك:
- 14 قازان: دانيا – قازاقستان
- 17 قازان: فينليانديا – قازاقستان
- 17 قاراشا: قازاقستان – سان-مارينو
- 20 قاراشا: سلوۆەنيا – قازاقستان.
قازاقستان قازىر ىرىكتەۋ اياسىنداعى التى ماتچتىڭ تورتەۋىندە جەڭىپ، ەكەۋىندە جەڭىلدى. بيىل ناۋرىزدا استانادا دانيادان 0:2 ەسەبىمەن جەڭىلىپ جاتىپ، 3:2 ەسەبىمەن جەڭىستى جۇلىپ اكەتكەندە ىرىكتەۋ ءتۋرنيرىنىڭ ۇلكەن سەنساتسيالارىنىڭ ءبىرىن جاساعان ەدى.
“سپورتتا عاجايىپتار بولىپ تۇرادى!” دانيانى جەڭگەنى قازاقستاننىڭ ەۋروپاداعى جەتىستىگىنىڭ باستاۋى ما؟
قازاقستان قۇراماسىنىڭ ىرىكتەۋ اياسىنداعى وسىعان دەيىنگى ويىندارىنىڭ ناتيجەسى:
- قازاقستان – سلوۆەنيا 1:2
- قازاقستان – دانيا 3:2
- سان-مارينو – قازاقستان 0:3
- سولتۇستىك يرلانديا – قازاقستان 0:1
- قازاقستان – فينليانديا 0:1
ىرىكتەۋ ەرەجەسى بويىنشا توپتاعى قۇرامالار ءبىر-بىرىمەن سىرت الاڭدا جانە ءوز الاڭىندا ويىن وتكىزەدى.
قازاقستان قۇراماسى ىرىكتەۋ ءتۋرنيرى باستالماي تۇرىپ، UEFA (ەۋروپا فۋتبول قاۋىمداستىعى) ۇيىمداستىراتىن ۇلتتار ليگاسىنىڭ ءۇشىنشى ديۆيزيونىندا ءوز توبىندا ءبىرىنشى ورىن الىپ، ءبىر ديۆيزيون جوعارىلاعان. كەلەسى جىلى قازاقستان ۇلتتار ليگاسىندا ۋكراينا، تۇركيا، ۋكراينا، گرەكيا، يسلانديا سىندى قۇرامالارمەن ۆ ديۆيزيونىندا وينايدى.
ۇلتتار ليگاسى مەن ەۋروپا چەمپيوناتىنا ىرىكتەۋ جارىسىنداعى جەڭىستەردەن كەيىن ەل ىشىندە ۇلتتىق قۇراماعا سەنىم ارتىپ، “استانا ارەناعا” كورەرمەن كوپ جينالا باستادى.
7 قىركۇيەكتەگى فينليانديامەن ويىنشا 30019 كورەرمەن جينالعان ەدى. بۇل – قازاقستان ءۇشىن رەكورد. ال سولتۇستىك يرلانديامەن ويىنعا 28 458 كورەرمەن بارعان.
ازات ەۋروپا / ازاتتىق راديوسى
پىكىر قالدىرۋ