Matçtıñ 27-minutında Abzal Beysebekovtiñ alañ ortasınan şığarğan pasın Maksim Samorodov ädemi golğa aynaldıra bildi. Maksim qattı kelgen pastı ayağımen toqtattı da, qarsılas qaqpasınıñ sol qaptalına bağıttağan. Soltüstik Irlandiya qaqpaşısı Beyli Pikok-Farrell qolın sozğanımen jetpedi. Dop qaqpada. 30 mıñ jinalğan stadion tulap sala berdi.
Osı goldan keyin Soltüstik Irlandiya şabuıldı üdete bastadı. Matçtıñ statistikası da sonı körsetedi. Oyın kezinde Qazaqstan jeti ret, Soltüstik Irlandiya 14 ret şabuıldağan. Biraq Qazaqstan qwramasınıñ qaqpaşısı Igor' Şackiy men Nwräli Älip bastağan qorğauşılar qarsılastarına gol soğuğa mümkindik bermedi.
Bwl – Qazaqstannıñ irikteu ayasındağı altı oyındağı törtinşi jeñisi.
Qazir Qazaqstan bar H irikteu tobında tört eldiñ joldamadan ümiti bar. Daniya men Sloveniya 13 wpay, Finlyandiya men Qazaqstanda 12 wpay jinağan. Qazaqstan 4-orında keledi. Toptan ozıp şığıp, Europa birinşiligine joldama alatın eki qwrama qazan-qaraşada ötetin oyındarda anıqtalmaq.
Qazaqstan turnir kestesinde törtinşi orında twrsa da, 2024 jılı Germaniyada ötetin Europa çempionatına şığu mümkindigi saqtaulı. Qazaqstan bwrın-soñdı Euro dodağa şığuğa däl mwnday jaqın bolmağan.
Osıdan üş kün bwrın, 7 qırküyekte Astanada Qazaqstan qwraması Finlyandiyamen 0:1 esebimen jeñilip qalğanı oyınşılardı da, janküyerlerdi de jabırqatqan. Sondıqtan Soltüstik Irlandiyamen oyında jeñis öte qajet boldı. Eger bwl oyında jeñilgende Qazaqstannıñ turnir kestesindegi jağdayı qiındap, Europa çempionatına şığuğa mümkindigi azayıp keter edi.
Bügingi Soltüstik Irlandiyadan keyingi oyınnan soñ Qazaqstan qwramasınıñ bas bapkeri reseylik Magomed Agiev baspasöz mäslihatında qwramanıñ jağdayına köñili tolmaytının aytıp qaldı.
“Komandanıñ jağdayı jaqsı dep ayta almaymın, bügingi oyın sonı körsetti. Oyınnıñ soñında naşar oynadıq. Finlyandiyadan üş wpay alu kerek degen maqsatımız orındalmay qaldı. Bügin aşulı boldıq. Biz joldamağa talasqa qayta oralığımız keldi. Alda sırt alañda qiın matçtar kütip twr, soğan dayındalamız” dedi ol.
İrikteu jarısı qaraşanıñ soñına deyin jalğasadı. Qazaqstan qwramasınıñ endi tört oyını qaldı. Üş oyın, Agiev aytqanday, Qazaqstannıñ toptağı bastı qarsılastarı Daniya, Finlyandiya jäne Sloveniyamen sırt alañda ötpek:
- 14 qazan: Daniya – Qazaqstan
- 17 qazan: Finlyandiya – Qazaqstan
- 17 qaraşa: Qazaqstan – San-Marino
- 20 qaraşa: Sloveniya – Qazaqstan.
Qazaqstan qazir irikteu ayasındağı altı matçtıñ törteuinde jeñip, ekeuinde jeñildi. Biıl naurızda Astanada Daniyadan 0:2 esebimen jeñilip jatıp, 3:2 esebimen jeñisti jwlıp äketkende irikteu turniriniñ ülken sensaciyalarınıñ birin jasağan edi.
“Sportta ğajayıptar bolıp twradı!” Daniyanı jeñgeni Qazaqstannıñ Europadağı jetistiginiñ bastauı ma?
Qazaqstan qwramasınıñ irikteu ayasındağı osığan deyingi oyındarınıñ nätijesi:
- Qazaqstan – Sloveniya 1:2
- Qazaqstan – Daniya 3:2
- San-Marino – Qazaqstan 0:3
- Soltüstik Irlandiya – Qazaqstan 0:1
- Qazaqstan – Finlyandiya 0:1
İrikteu erejesi boyınşa toptağı qwramalar bir-birimen sırt alañda jäne öz alañında oyın ötkizedi.
Qazaqstan qwraması irikteu turniri bastalmay twrıp, UEFA (Europa futbol qauımdastığı) wyımdastıratın Wlttar ligasınıñ üşinşi divizionında öz tobında birinşi orın alıp, bir divizion joğarılağan. Kelesi jılı Qazaqstan Wlttar ligasında Ukraina, Türkiya, Ukraina, Grekiya, Islandiya sındı qwramalarmen V divizionında oynaydı.
Wlttar ligası men Europa çempionatına irikteu jarısındağı jeñisterden keyin el işinde wlttıq qwramağa senim artıp, “Astana Arenağa” körermen köp jinala bastadı.
7 qırküyektegi Finlyandiyamen oyınşa 30019 körermen jinalğan edi. Bwl – Qazaqstan üşin rekord. Al Soltüstik Irlandiyamen oyınğa 28 458 körermen barğan.
Azat Europa / Azattıq radiosı
Pikir qaldıru