15 قاراشادا قازاقستان پارلامەنتىنىڭ تومەنگى پالاتاسى اسكەري رەزەرۆتى جاساقتاۋ تۋرالى زاڭ جوباسىن ءبىرىنشى وقىلىمدا ماقۇلدادى. قۇجاتتىڭ رەسمي اتاۋى – “قازاقستان رەسپۋبليكاسىنىڭ كەيبىر زاڭنامالىق اكتىلەرىنە رەزەرۆتەگى قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى” زاڭ جوباسى.
قۇجات قازاقستاندا “اسكەري قىزمەتتىڭ جاڭا ءتۇرى – رەزەرۆتەگى قىزمەتتى ەنگىزۋدى قاراستىرادى” دەپ جازدى رەسمي باق.
“زاڭ جوباسىن ىسكە اسىرۋ ازاماتتارعا رەزەرۆتە اسكەري قىزمەت ەتۋگە مۇمكىندىك بەرەدى. ول ءۇشىن كەلىسىمشارت ەرىكتى تۇردە ءۇش جىلعا جاسالادى. دايارلىق ءبىر جىلدا ەكى ايدان اسپايدى. جاۋىنگەرلىك جيىندار 30 كۇندە ىسكە اسىرىلادى. رەزەرۆتەگىلەرگە ارنالعان ساباقتار اي سايىن ەكى-ءۇش كۇن بولادى” دەدى پارلامەنت وتىرىسىندا قورعانىس ءمينيسترى رۋسلان جاقسىلىقوۆ.
رەسمي اقپاراتقا قاراعاندا، اسكەري رەزەرۆ 2025 جىلعا قاراي جاساقتالادى. ءبىرىنشى كەزەڭدە وعان شامامەن 2 مىڭ ادام الۋ قاراستىرىلعان.
قورعانىس مينيسترلىگىنىڭ حابارلاۋىنشا، اسكەري رەزەرۆتە قىزمەت ەتكىسى كەلەتىندەرگە اي سايىن ەڭ تومەنگى جالاقى تولەنەدى. جاۋىنگەرلىك جيىن كەزىندە ورتاشا جالاقى تولەۋ جوسپارلانعان. ولاردى قامتاماسىز ەتۋگە بيۋدجەتتەن 3,5 ملرد تەڭگە جۇمسالادى. اسكەري رەزەرۆتەگى ادام قىزمەت ەتكەن كەزدە جۇمىس ورنى ساقتالادى دەيدى قورعانىس ءمينيسترى رۋسلان جاقسىلىقوۆ.
اسكەري رەزەرۆكە ادامدار ەرىكتى تۇردە تارتىلادى. ونىڭ قۇرامىنا ەنگىسى كەلەتىندەرگە دەنساۋلىق جاعدايى بويىنشا دا تالاپتار قويىلادى. ولار اسكەري بولىمدەردە دايىندىقتان وتەدى جانە ءتيىستى قارۋ-جاراق پەن تەحنيكا دا بەرىلمەك.
جەرگىلىكتى باق-تىڭ جازۋىنشا، قازاقستان قورعانىس مينيسترلىگى ەلدىڭ قورعانىس قابىلەتىن اسكەري رەزەرۆتى جاساقتاۋ ارقىلى نىعايتۋ جونىندە 2022 جىلدىڭ كوكتەمىندە – رەسەي ۋكرايناعا باسىپ كىرگەن شاقتا ايتقان.
بىلتىر قازاندا قورعانىس مينيسترلىگى پرەزيدەنت قاسىم-جومارت توقاەۆ قول قويعان اسكەري دوكتريناداعى وزگەرىستەردى جاريا ەتكەن. مينيسترلىكتىڭ حابارلاۋىنشا، جاڭارتىلعان اسكەري دوكترينا «جاڭا قاۋىپ-قاتەر مەن تاۋەكەلدەرگە جاۋاپ بەرۋ ءۇشىن ەلدىڭ اسكەري الەۋەتىن ارتتىرادى».
«قازاقستان وزگەرىستەر ەنگىزىلگەن اسكەري دوكترينانى بەكىتتى، ونىڭ مازمۇنىندا رەسەيدىڭ ۋكرايناعا باسقىنشىلىعىنا الاڭداۋشىلىق كورىنىس تاپقانداي» دەپ جازعان ەدى سول كەزدە Eurasianet باسىلىمى.
ازات ەۋروپا / ازاتتىق راديوسى
پىكىر قالدىرۋ