اقش سەناتى ۋكراينا مەن يزرايلگە 118 ميلليارد دوللار قوسىمشا قارجى كومەگىن بەرۋ تۋرالى ەكى پارتيا ۇسىنعان زاڭ جوباسىن جانە اقش-تىڭ وڭتۇستىك شەكاراسىن نىعايتۋ تۋرالى زاڭ جوباسىن ماقۇلدادى.
بىلتىر قازان ايىنان بەرى جالعاسىپ كەلە جاتقان “ۇلتتىق قاۋىپسىزدىككە بايلانىستى قوسىمشا قارجىلاندىرۋ تۋرالى” داۋعا نۇكتە قوياتىن كومپروميستىك ءماتىن اقش سەناتىنىڭ سايتىنا شىققان.
زاڭ جوباسى بويىنشا، سەناتورلار 60 ميلليارد دوللاردى ۋكراينانى قولداۋعا، 14 ميللياردتى يزرايلگە كومەككە، 20 ميللياردتان استام دوللاردى اقش-تىڭ مەكسيكامەن شەكاراسىن قاۋىپسىزدەندىرۋگە، شامامەن بەس ميللياردتى اقش-تىڭ تىنىق مۇحيت ايماعىنداعى سەرىكتەرىن قارجىلاندىرۋعا، ەكى جارىم ميللياردقا جۋىق دوللاردى “قىزىل تەڭىزدەگى” وپەراتسيانى قولداۋعا، تاعى دا سونداي قارجىنى اقش-تىڭ ورتالىق قولباسشىلىعىنا ءبولۋدى جوسپارلاعان.
اقش پرەزيدەنتى دجو بايدەن كونگرەسستەن ۋكراينا، يزرايل جانە تايۆانعا كومەك بەرۋگە جانە اقش-تىڭ وڭتۇستىك شەكاراسىنىڭ قاۋىپسىزدىگىن قامتاماسىز ەتۋگە بىلتىر قازان ايىندا قارجى سۇراعان. الايدا ءالى كۇنگە شەشىم قابىلدانباعان ەدى. رەسپۋبليكاشىلدار مەن دەموكراتتار نەگىزىنەن مەكسيكامەن اراداعى شەكارانى نىعايتۋ ماسەلەسىنە كەلىسە الماعان. رەسپۋبليكاشىلدار اقش-تىڭ كوشى-قون ساياساتىن قاتايتۋدى تالاپ ەتىپ، ونىسىن ۋكرايناعا قوسىمشا كومەك تۋرالى كەز كەلگەن تالقى كەزىندە العا تارتقان بولاتىن.
ۋكراينانى قولداۋ بويىنشا جاڭا بيۋدجەتتىڭ كەلىسىلمەۋىنە بايلانىستى اقش-تىڭ كەيىنگى كەزدەرى كيەۆكە بەرەتىن اسكەري كومەگى ءبىرشاما قىسقارعان.
اقش پرەزيدەنتى كونگرەستەن زاڭ جوباسىن تەزىرەك قابىلداۋدى سۇراعان. بۇل جولى سەنات كەلىسىمىنە بايلانىستى پىكىر ايتقان بايدەن “ۋكراينانى قولداۋ اقش-تىڭ قاۋىپسىزدىك مۇددەسىنە ساي كەلەتىنىن” تاعى دا مالىمدەدى. ول ەگەر “ۋكراينا بيلىگىنە باقىلاۋ ورناتۋعا ۇمتىلىسىن بۇگىن توقتاتپاسا، ءپۋتيننىڭ ۋكراينامەن عانا شەكتەلمەيتىنىن، ونداي جاعدايدا اقش-تىڭ شىعىنى وسە تۇسەتىنىن” ءسوز ەتكەن.
بۇعان دەيىن وكىلدەر پالاتاسىنىڭ توراعاسى مايك دجونسون سەناتورلار ازىرلەگەن زاڭ جوباسى پالاتادان وتپەيتىنىن مالىمدەگەن. بۇل زاڭعا اقش-تىڭ بۇرىنعى پرەزيدەنتى، بيىل قاراشاداعى پرەزيدەنت سايلاۋىنا رەسپۋبليكالىق پارتيا اتىنان ءتۇسۋى مۇمكىن دونالد ترامپ تا قارسى بولعان.
ەۋرووداقتىڭ بارلىق ەلى ۋكرايناعا 50 ملرد ەۋرو كومەك بەرۋگە كەلىستى
ەۋروپا وداعىنىڭ بارلىق 27 مۇشەسى بەيسەنبى بريۋسسەلدە وتكەن سامميتتە ۋكرايناعا 50 ملرد ەۋرو كولەمىندە قوسىمشا كومەك بەرۋگە كەلىستى. قاراجات ەۋرووداقتىڭ 2027 جىلعا دەيىن بەكىتىلگەن ورتاق بيۋدجەتىنەن بولىنەدى.
بۇل جونىندە ەۋروپا كەڭەسىنىڭ توراعاسى شارل ميشەل ح الەۋمەتتىك جەلىسىندە حابارلادى. بۇل قادام “ۋكراينانى تۇراقتى، ۇزاق ءارى بولجالدى تۇردە قارجىلاندىرۋعا مۇمكىندىك بەرەدى” دەدى ول. “ۋكراينانى قولداۋ جونىنەن ليدەرلىك پەن جاۋاپكەرشىلىكتى ەۋرووداق ءوز موينىنا الادى” دەدى ميشەل.
ەۋرووداق باسشىلارى كيەۆكە كومەك پاكەتى بويىنشا شەشىم قابىلداۋعا بىلتىرعى جەلتوقساننان بەرى قارسى بولىپ كەلە جاتقان ۆەنگريانى كوندىردى. ۆەنگريا پرەمەر-ءمينيسترى ۆيكتور وربان كرەملگە جاقىن ساياساتكەر سانالادى.
Reuters اگەنتتىگىنىڭ جازۋىنشا، سامميت قارساڭىندا ەۋرووداق ىشىندە ۆەنگرياعا قاتتى قىسىم بولعان. وربانعا رەسەيدىڭ ۋكرايناعا قارسى سوعىسى جاعدايىندا ەكى جاقتىڭ ءبىرىن تاڭداۋ كەرەك دەگەن شارت قويىلعان دەلىنەدى.
ۋكراينا پرەزيدەنتى ۆلاديمير زەلەنسكي ەۋروپا باسشىلارىنىڭ شەشىمى تۋرالى ايتا كەلە ەۋرووداقتىڭ بۇل قارجىلاي كومەگى ەلدىڭ ۇزاقمەرزىمدى ەكونوميكالىق جانە قارجىلىق تۇراقتىلىعىن قامتاماسىز ەتۋگە جاردەمدەسەدى دەدى. “اسكەري كومەك پەن رەسەيگە سانكتسيالىق قىسىم ءتارىزدى بۇل دا وتە ماڭىزدى” دەدى ول.
نەمىستىڭ dpa اگەنتتىگىنىڭ حابارلاۋىنشا، ەۋرووداق باسشىلارى ۋكرايناعا بەرىلەتىن كومەكتى ءبولىسۋ بويىنشا جىل سايىن پىكىرسايىس ۇيىمداستىرىپ وتىرۋعا ۋاعدالاسقان. قاجەت بولعان جاعدايدا ەۋروپا كەڭەسى ەكى جىلدان سوڭ قارجىلاندىرۋدى قايتا قاراۋ تۋرالى ماسەلە قويا الادى.
ۆەنگريا ۇكىمەتىنىڭ باسشىسى وربان سوڭعى كەزدەرى شەشىم ءار جىل سايىن قايتا قارالىپ وتىرعان جاعدايدا 50 ملرد دوللار قارجى ءبولۋ ماسەلەسىن قولداۋعا دايىن ەكەنىن ايتىپ كەلگەن.
- ۋكراينا باسشىلىعى رەسەي اگرەسسياسىن قايتارۋ ءۇشىن قارۋ-جاراققا قاتتى مۇقتاج ەكەنىن بىرنەشە ايدان بەرى ايتىپ كەلەدى.
- اقش-تا ۋكرايناعا 60 ملرد دوللار قارجىلاي كومەك بەرۋ جوسپارىنا كونگرەسستەگى رەسپۋبليكالىق پارتيا قارسى بولىپ كەلەدى. ولار قارجى ءبولۋ ءۇشىن الدىمەن يمميگراتسيانى شەكتەۋ بويىنشا شارا قولدانۋ كەرەك دەگەن شارت قويىپ وتىر.
پىكىر قالدىرۋ