АҚШ сенаты Украина мен Израильге 118 миллиард доллар қосымша қаржы көмегін беру туралы екі партия ұсынған заң жобасын және АҚШ-тың оңтүстік шекарасын нығайту туралы заң жобасын мақұлдады.
Былтыр қазан айынан бері жалғасып келе жатқан “ұлттық қауіпсіздікке байланысты қосымша қаржыландыру туралы” дауға нүкте қоятын компромистік мәтін АҚШ сенатының сайтына шыққан.
Заң жобасы бойынша, сенаторлар 60 миллиард долларды Украинаны қолдауға, 14 миллиардты Израильге көмекке, 20 миллиардтан астам долларды АҚШ-тың Мексикамен шекарасын қауіпсіздендіруге, шамамен бес миллиардты АҚШ-тың Тынық мұхит аймағындағы серіктерін қаржыландыруға, екі жарым миллиардқа жуық долларды “Қызыл теңіздегі” операцияны қолдауға, тағы да сондай қаржыны АҚШ-тың Орталық қолбасшылығына бөлуді жоспарлаған.
АҚШ президенті Джо Байден конгресстен Украина, Израиль және Тайваньға көмек беруге және АҚШ-тың оңтүстік шекарасының қауіпсіздігін қамтамасыз етуге былтыр қазан айында қаржы сұраған. Алайда әлі күнге шешім қабылданбаған еді. Республикашылдар мен демократтар негізінен Мексикамен арадағы шекараны нығайту мәселесіне келісе алмаған. Республикашылдар АҚШ-тың көші-қон саясатын қатайтуды талап етіп, онысын Украинаға қосымша көмек туралы кез келген талқы кезінде алға тартқан болатын.
Украинаны қолдау бойынша жаңа бюджеттің келісілмеуіне байланысты АҚШ-тың кейінгі кездері Киевке беретін әскери көмегі біршама қысқарған.
АҚШ президенті конгрестен заң жобасын тезірек қабылдауды сұраған. Бұл жолы сенат келісіміне байланысты пікір айтқан Байден “Украинаны қолдау АҚШ-тың қауіпсіздік мүддесіне сай келетінін” тағы да мәлімдеді. Ол егер “Украина билігіне бақылау орнатуға ұмтылысын бүгін тоқтатпаса, Путиннің Украинамен ғана шектелмейтінін, ондай жағдайда АҚШ-тың шығыны өсе түсетінін” сөз еткен.
Бұған дейін өкілдер палатасының төрағасы Майк Джонсон сенаторлар әзірлеген заң жобасы палатадан өтпейтінін мәлімдеген. Бұл заңға АҚШ-тың бұрынғы президенті, биыл қарашадағы президент сайлауына Республикалық партия атынан түсуі мүмкін Дональд Трамп та қарсы болған.
Еуроодақтың барлық елі Украинаға 50 млрд еуро көмек беруге келісті
Еуропа одағының барлық 27 мүшесі бейсенбі Брюссельде өткен саммитте Украинаға 50 млрд еуро көлемінде қосымша көмек беруге келісті. Қаражат Еуроодақтың 2027 жылға дейін бекітілген ортақ бюджетінен бөлінеді.
Бұл жөнінде Еуропа кеңесінің төрағасы Шарль Мишель Х әлеуметтік желісінде хабарлады. Бұл қадам “Украинаны тұрақты, ұзақ әрі болжалды түрде қаржыландыруға мүмкіндік береді” деді ол. “Украинаны қолдау жөнінен лидерлік пен жауапкершілікті Еуроодақ өз мойнына алады” деді Мишель.
Еуроодақ басшылары Киевке көмек пакеті бойынша шешім қабылдауға былтырғы желтоқсаннан бері қарсы болып келе жатқан Венгрияны көндірді. Венгрия премьер-министрі Виктор Орбан Кремльге жақын саясаткер саналады.
Reuters агенттігінің жазуынша, саммит қарсаңында Еуроодақ ішінде Венгрияға қатты қысым болған. Орбанға Ресейдің Украинаға қарсы соғысы жағдайында екі жақтың бірін таңдау керек деген шарт қойылған делінеді.
Украина президенті Владимир Зеленский Еуропа басшыларының шешімі туралы айта келе Еуроодақтың бұл қаржылай көмегі елдің ұзақмерзімді экономикалық және қаржылық тұрақтылығын қамтамасыз етуге жәрдемдеседі деді. “Әскери көмек пен Ресейге санкциялық қысым тәрізді бұл да өте маңызды” деді ол.
Немістің dpa агенттігінің хабарлауынша, Еуроодақ басшылары Украинаға берілетін көмекті бөлісу бойынша жыл сайын пікірсайыс ұйымдастырып отыруға уағдаласқан. Қажет болған жағдайда Еуропа кеңесі екі жылдан соң қаржыландыруды қайта қарау туралы мәселе қоя алады.
Венгрия үкіметінің басшысы Орбан соңғы кездері шешім әр жыл сайын қайта қаралып отырған жағдайда 50 млрд доллар қаржы бөлу мәселесін қолдауға дайын екенін айтып келген.
- Украина басшылығы Ресей агрессиясын қайтару үшін қару-жараққа қатты мұқтаж екенін бірнеше айдан бері айтып келеді.
- АҚШ-та Украинаға 60 млрд доллар қаржылай көмек беру жоспарына Конгресстегі Республикалық партия қарсы болып келеді. Олар қаржы бөлу үшін алдымен иммиграцияны шектеу бойынша шара қолдану керек деген шарт қойып отыр.
Пікір қалдыру