تۇرىك اعايىنداردىڭ Bayraktar-ى تاڭقالدىرۋىن قويار ەمەس. ولار Bayraktar TB2T-AI سوققى جاساۋشى درونىن جاساندى ينتەللەكت جۇيەسىمەن جانە جاڭا تۋربودۆيگاتەلمەن جابدىقتاپ، ءۇشىنشى نۇسقاسىن سىناقتىق ءساتتى وتكىزدى. بۇل جاڭالىق تەك تۇركيا ءۇشىن عانا ەمەس، قازىرگى زامانعى اسكەري تاكتيكانىڭ دامۋىندا جاڭا ءداۋىردىڭ باستالعانىن اڭعارتادى. اسىرەسە، سوڭعى جىلدارى قارۋلى قاقتىعىستاردا ءدال وسىنداي ۇشقىشسىز اپپاراتتاردىڭ ءرولى ارتقانىن ءبارىمىز بايقاپ وتىرمىز.

كونسترۋكتورلار جاڭارتىلعان Bayraktar TB2T-AI بۇرىنعى نۇسقاسىنان الدەقايدا جىلدام، اۆتونومدى ءارى كۇشەيتىلگەن اسكەري مۇمكىندىكتەرگە يە ەكەنىن العا تارتتى. سىناق بارىسىندا درون 25 500 فۋت بيىكتىككە كوتەرىلىپ، تۋربودۆيگاتەلى ارقىلى 300 كم/ساع جىلدامدىقپەن ۇشقان. ونىڭ باستى ەرەكشەلىگى – 30 مىڭ فۋتتىق بيىكتىككە نەبارى 30 مينۋتتا كوتەرىلۋىندە بولىپ تۇر. بۇل كورسەتكىش ونى ءوز كلاسىنداعى ەڭ قۋاتتى اپپاراتتاردىڭ ءبىرى ەكەنىن سوقىرعا تاياق ۇستاتقانداي كورسەتىپ وتىر. اۋە كەڭىستىگىندەگى وسىنداي ارتىقشىلىقتارعا يە Bayraktar-دى قازىرگى اسكەري قاقتىعىستاردا تاپتىرماس قارۋ رەتىندە تانىلۋدا.

ۋكرايناداعى سوعىس وسى درونداردىڭ شىنايى ۇرىس جاعدايىندا قانشالىقتى ءتيىمدى ەكەنىن كورسەتتى. رەسەي ارمياسى اۋەدە ۇستەمدىككە يە بولعانىمەن، Bayraktar TB2 سوققى جاساۋشى دروندارى ولاردىڭ بروندالعان تەحنيكالارىن جويىپ، ارتيللەريالىق پوزيتسيالارىن جويقىن سوققىلاردىڭ استىنا العانىن بىلەمىز. ۋكراينا قارۋلى كۇشتەرى Bayraktar-دى اسىرەسە «اڭشى-درون» رەتىندە پايدالاندى – ولار اۋەدەن ۇزاق ۋاقىت بويى باقىلاپ، قاجەتتى ساتتە ءدال سوققى بەرىپ وتىرعان.

بۇل دروننىڭ باستى ەرەكشەلىكتەرىنىڭ ءبىرى – جاساندى ينتەللەكت تەحنولوگياسى. ول نىسانداردى وزدىگىنەن تانۋ، تاكتيكالىق جاعدايعا تالداۋ جاساپ، اۆتوماتتى رەجيمدە ۇشىپ-قونىپ جۇرە بەرەدى. جاڭا بۋىن Bayraktar-ى بۇل تەحنولوگيانى جەتىلدىرىپ، ەلەكتروندىق بوگەتتەرگە قارسى تۇرا الاتىن مۇمكىندىكتەرگە يە ەكەنىن دە ايتا كەتۋىمىز كەرەك. راديوەلەكتروندىق كۇرەس قۇرالدارى ونى وڭاي بۇعاتتاي المايدى. بۇل قازىرگى زامانعى سوعىستاعى ەڭ ۇلكەن باسىمدىقتاردىڭ ءبىرى.

ۇشقىشسىز اپپاراتتاردىڭ باستى ارتىقشىلىعى – ولار ۇرىستا ادام ءومىرىن قاۋىپكە تىكپەي، اسكەري تاپسىرمالاردى ورىنداۋعا وتە قابىلەتتى. ۋكرايناداعى سوعىس بارىسىندا Bayraktar-دىڭ اسسيمەتريالىق سوعىستاعى ءرولى ايقىن كورىندى. ۋكراينا كۇشتەرى ورىس اسكەرىنە تىكەلەي قارسىلاسۋدا ءالسىز بولعاندىقتان، دروندار ارقىلى «پارتيزاندىق اۆياتسيا» مودەلىن قۇرىپ، كوپتەگەن جەڭىستەرگە جەتكەنىن بىلەمىز. مۇنداي تاكتيكالىق ارتىقشىلىق قارسىلاستىڭ تەحنيكاسىن بارىنشا السىرەتۋگە مۇمكىندىك بەردى.

ال Bayraktar TB2T-AI جاڭا ۇلگىسى بۇل مۇمكىندىكتەردى ودان ءارى ارتتىرا تۇسەتىنىمەن ەرەكشەلەنۋدە. ونىڭ سوعىس الاڭىندا اۆتونومدى تۇردە ارەكەت ەتە الۋى، جوعارى جىلدامدىققا يە بولۋى، جانارمايدى ۇنەمدەۋى جانە ءارتۇرلى كليماتتىق جاعدايلاردا جۇمىس ىستەۋى ونى الەمدەگى ەڭ مىقتى درونداردىڭ قاتارىنا قوسىپ وتىر. ايتالىق، بۇل دروندار ەندى اۋەدەگى ۇرىستاردىڭ تاكتيكاسىن تۇبەگەيلى وزگەرتەتىنى انىق.

سونىمەن قاتار، Bayraktar-دىڭ سەنىمدىلىگى دە جوعارى. ەگەر قانداي دا ءبىر تەحنيكالىق اقاۋ ورىن السا نەمەسە درون بەلگىلەنگەن ايماقتا ارەكەت ەتە الماسا، ول اۆتوماتتى تۇردە ءوز بازاسىنا قايتا ورالادى. بۇل ونىڭ ۇرىس دالاسىنداعى ۇزاقمەرزىمدى تيىمدىلىگىن ايتارلىقتاي ارتتىرادى.

باتىس ساراپشىلارى Bayraktar TB2T-AI-ءدى جاڭا اسكەري رەۆوليۋتسيانىڭ باستاۋى دەپ باعالاپ وتىر. تۇركيا مەن ونىڭ وداقتاستارى بۇل دروندى قورعانىس سالاسىندا كەڭىنەن قولدانۋ ارقىلى وزدەرىنىڭ اسكەري كۇش-قۋاتىن ەسەلەۋدە. ال ۋكرايناداعى سوعىس Bayraktar-دىڭ ءداستۇرلى سوعىس كونتسەپتسيالارىن بۇزىپ، جاڭا تاكتيكالىق شەشىمدەردى تالاپ ەتەتىن زاماناۋي قارۋ ەكەنىن دالەلدەدى.

جاڭا تەحنولوگيالار داۋىرىندە ۇشقىشسىز اپپاراتتار اسكەري ستراتەگيانىڭ اجىراماس بولىگىنە اينالىپ بارادى. Bayraktar TB2T-AI – وسىنىڭ ايقىن دالەلى. ونىڭ ۇرىس دالاسىنداعى تيىمدىلىگى ۋاقىت وتە كەلە ارتا تۇسەتىنى ءسوزسىز. ەڭ باستىسى، بۇل دروندار اسكەري قاقتىعىستارداعى ءداستۇرلى ەرەجەلەردى تۇبەگەيلى وزگەرتىپ، جاڭا تاكتيكالىق مۇمكىندىكتەرگە جول اشىپ جاتىر.