اقش پرەزيدەنتى دونالد ترامپ ۋكراينانى رەسەيمەن 15 مامىر كۇنى ستامبۇلدا كەلىسسوز وتكىزۋگە”دەرەۋ” كەلىسۋگە شاقىردى.

“رەسەي پرەزيدەنتى ۆلاديمير پۋتين ۋكراينامەن اتىستى دوعارۋ تۋرالى كەلىسىمگە قول قويۋعا ۇمتىلىپ وتىرعان جوق – ونىڭ ورنىنا بەيسەنبى كۇنى تۇركيادا وسى قاندى قاساپتى توقتاتۋعا قاتىستى كەلىسسوز وتكىزۋدى ۇسىندى. ۋكراينا ول كەزدەسۋگە دەرەۋ كەلىسكەنى ءجون”، – دەپ جازدى ترامپ Truth Social الەۋمەتتىك جەلىسىندە.

ترامپتىڭ جازباسىنان ۋكراينا ۇسىنعان جانە ەۋروپا وداعىنىڭ جەتەكشى ەلدەرى قولداعان باستى شارت – اۋەلى مايدان شەبىندە 30 كۇنگە اتىستى توقتاتۋدى تالاپ ەتىپ وتىرماعانى اڭعارىلادى.

“كەم دەگەندە، قانداي دا ءبىر مامىلەگە كەلۋ مۇمكىن بە، سونى ايقىنداۋعا بولادى. ال ەگەر مۇمكىن بولماسا – ەۋروپا ەلدەرىنىڭ باسشىلارى مەن اقش جاعدايدى تولىق ءتۇسىنىپ، ءتيىستى ارەكەت جاساي الادى”، – دەدى ترامپ.

بۇعان قوسا ول “ۋكراينانىڭ پۋتينمەن كەلىسسوز جۇرگىزە الاتىنىنا كۇماندانا باستاعانىن” ايتقان. ونىڭ سوزىنشە، پۋتين “ەكىنشى دۇنيەجۇزىلىك سوعىستاعى جەڭىس مەرەكەسىن تويلاۋمەن اسا ابىگەر بولىپ وتىر”.

“ايتپاقشى اقش قاتىسپاعاندا بۇل سوعىس ەشقاشان جەڭىسپەن اياقتالماس ەدى ء(تىپتى ماڭايلامايدى دا!)” دەپ جازعان ترامپ.

ۋكراينا پرەزيدەنتى ۆلاديمير زەلەنسكي ترامپتىڭ جازباسىنان كەيىن Telegram-پاراعىنا ۋكراينا “ديپلوماتيا ءۇشىن قاجەتتى جاعداي جاساۋ” ءۇشىن ەرتەڭنەن باستاپ “اتىس تولىق ءارى ۇزاق مەرزىمگە توقتايدى” دەپ كۇتەتىنىن ايتتى.

بۇعان قوسا ول تۇركيادا رەسەي پرەزيدەنتى ۆلاديمير پۋتينمەن بەتپە-بەت جەكە كەلىسسوز وتكىزۋگە دايىن ەكەنىن مالىمدەدى.

“بەيسەنبىدە ءپۋتيندى جەكە كەزدەسۋ ءۇشىن تۇركيادا كۇتەمىن. بۇل جولى رەسەيلىكتەر كەلمەۋگە سىلتاۋ ىزدەمەس دەپ ۇمىتتەنەمىن”، – دەدى زەلەنسكي. ول ترامپتىڭ مالىمدەمەسىنە بايلانىستى تىكەلەي تۇسىنىكتەمە بەرگەن جوق.

كەيىنىرەك زەلەنسكي بەينەۇندەۋ جاريالاپ، بەيسەنبىدە تۇركيادا بولاتىنىن جانە سول جەردە پۋتينمەن جۇزدەسەم دەپ ۇمىتتەنەتىنىن راستادى. زەلەنسكي تۇركيادا ناقتى قاي جەردە بولاتىنىن ايتقان جوق – ال پۋتين ءوز ۇسىنىسىندا ناقتى ستامبۇلدا دەپ ايتقان. زەلەنسكيدىڭ سوزىنە قاراعاندا، رەسەي اتىستى توقتاتپاسا دا ول تۇركياعا بارۋعا نيەتتى سياقتى.

پۋتين كيەۆكە تىكە كەلىسسوزدى جالعاستىرۋدى ۇسىندى. اتىستى ءبىر ايعا توقتاتۋ ۇندەۋىنە جاۋاپ بەرمەدى

ۋكرايناعا ستامبۇلدا كەلىسسوز وتكىزۋگە ۇسىنىس جاساعان رەسەي پرەزيدەنتى ۆلاديمير پۋتين وعان ءوزى قاتىساتىنى جونىندە ەشتەڭە ايتپاعان.

رەسەي مەن ەۋرووداق وكىلدەرى ترامپ پەن زەلەنسكيدىڭ كەيىنگى مالىمدەمەلەرىنە بايلانىستى ازىرگە رەاكتسيا بىلدىرگەن جوق.

بۇعان دەيىن جەكسەنبى كۇنى ترامپتىڭ ۋكراينا جونىندەگى ارنايى وكىلى كيت كەللوگ الدىمەن اتىستى توقتاتىپ، سودان كەيىن كەلىسسوز باستالۋ كەرەك ەكەنىن جانە “باسقا جول جوق” ەكەنىن جازعان.

جەكسەنبى كۇنى رەسەي مەن تۇركيا پرەزيدەنتتەرى تەلەفونمەن سويلەسكەنى تۋرالى حابار تاراعان. TRT Haber مالىمەتى بويىنشا، تۇركيا پرەزيدەنتى رەجەپ تايىپ ەردوعان انكارانىڭ ديالوگ ءۇشىن الاڭ ۇسىنۋعا ءازىر ەكەنىن راستاعان جانە “بەيبىتشىلىككە قول جەتكىزۋ ءۇشىن مۇمكىندىك تەرەزەسى اشىق” دەپ مالىمدەگەن. تۇركيا پرەزيدەنتى سونداي-اق “جان-جاقتى اتىستى توقتاتۋ كەلىسسوزدەر ءۇشىن جاعداي جاسايدى” دەپ اتاپ وتكەن. سونىمەن قاتار، كەلىسسوزدەر الدىندا ەردوعان فرانتسيا پرەزيدەنتى ەممانۋەل ماكرونمەن تەلەفونمەن سويلەسكەن. “سوعىستى توقتاتۋعا قاراي تاريحي بەتبۇرىس ءساتى تۋدى – ونى پايدالانۋ كەرەك. تۇركيا اتىستى توقتاتىپ، تۇراقتى بەيبىتشىلىك ورناتۋ ءۇشىن كەلىسسوز ۇيىمداستىرۋدى قوسا العاندا كەز كەلگەن ۇلەس قوسۋعا دايىن”، – دەگەن ەردوعان.

رەسەي سىرتقى ىستەر مينيسترلىگى ەردوعاننىڭ ءپۋتيننىڭ باستاماسىن تولىق قولداعانىن حابارلادى، بىراق اتىستى توقتاتۋ تۋرالى مينيسترلىك مالىمدەمەسىندە ەشتەڭە ايتىلماعان.

ازات ەۋروپا / ازاتتىق راديوسى