AQŞ prezidenti Donal'd Tramp Ukrainanı Reseymen 15 mamır küni Stambwlda kelissöz ötkizuge”dereu” kelisuge şaqırdı.

“Resey prezidenti Vladimir Putin Ukrainamen atıstı doğaru turalı kelisimge qol qoyuğa wmtılıp otırğan joq – onıñ ornına beysenbi küni Türkiyada osı qandı qasaptı toqtatuğa qatıstı kelissöz ötkizudi wsındı. Ukraina ol kezdesuge dereu keliskeni jön”, – dep jazdı Tramp Truth Social äleumettik jelisinde.

Tramptıñ jazbasınan Ukraina wsınğan jäne Europa odağınıñ jetekşi elderi qoldağan bastı şart – äueli maydan şebinde 30 künge atıstı toqtatudı talap etip otırmağanı añğarıladı.

“Kem degende, qanday da bir mämilege kelu mümkin be, sonı ayqındauğa boladı. Al eger mümkin bolmasa – Europa elderiniñ basşıları men AQŞ jağdaydı tolıq tüsinip, tiisti äreket jasay aladı”, – dedi Tramp.

Bwğan qosa ol “Ukrainanıñ Putinmen kelissöz jürgize alatınına kümändana bastağanın” aytqan. Onıñ sözinşe, Putin “Ekinşi düniejüzilik soğıstağı Jeñis merekesin toylaumen asa äbiger bolıp otır”.

“Aytpaqşı AQŞ qatıspağanda bwl soğıs eşqaşan jeñispen ayaqtalmas edi (tipti mañaylamaydı da!)” dep jazğan Tramp.

Ukraina prezidenti Vladimir Zelenskiy Tramptıñ jazbasınan keyin Telegram-parağına Ukraina “diplomatiya üşin qajetti jağday jasau” üşin erteñnen bastap “atıs tolıq äri wzaq merzimge toqtaydı” dep kütetinin ayttı.

Bwğan qosa ol Türkiyada Resey prezidenti Vladimir Putinmen betpe-bet jeke kelissöz ötkizuge dayın ekenin mälimdedi.

“Beysenbide Putindi jeke kezdesu üşin Türkiyada kütemin. Bwl jolı reseylikter kelmeuge sıltau izdemes dep ümittenemin”, – dedi Zelenskiy. Ol Tramptıñ mälimdemesine baylanıstı tikeley tüsinikteme bergen joq.

Keyinirek Zelenskiy beyneündeu jariyalap, beysenbide Türkiyada bolatının jäne sol jerde Putinmen jüzdesem dep ümittenetinin rastadı. Zelenskiy Türkiyada naqtı qay jerde bolatının aytqan joq – al Putin öz wsınısında naqtı Stambwlda dep aytqan. Zelenskiydiñ sözine qarağanda, Resey atıstı toqtatpasa da ol Türkiyağa baruğa nietti siyaqtı.

Putin Kievke tike kelissözdi jalğastırudı wsındı. Atıstı bir ayğa toqtatu ündeuine jauap bermedi

Ukrainağa Stambwlda kelissöz ötkizuge wsınıs jasağan Resey prezidenti Vladimir Putin oğan özi qatısatını jöninde eşteñe aytpağan.

Resey men Euroodaq ökilderi Tramp pen Zelenskiydiñ keyingi mälimdemelerine baylanıstı äzirge reakciya bildirgen joq.

Bwğan deyin jeksenbi küni Tramptıñ Ukraina jönindegi arnayı ökili Kit Kellog aldımen atıstı toqtatıp, sodan keyin kelissöz bastalu kerek ekenin jäne “basqa jol joq” ekenin jazğan.

Jeksenbi küni Resey men Türkiya prezidentteri telefonmen söyleskeni turalı habar tarağan. TRT Haber mälimeti boyınşa, Türkiya prezidenti Rejep Tayıp Erdoğan Ankaranıñ dialog üşin alañ wsınuğa äzir ekenin rastağan jäne “beybitşilikke qol jetkizu üşin mümkindik terezesi aşıq” dep mälimdegen. Türkiya prezidenti sonday-aq “jan-jaqtı atıstı toqtatu kelissözder üşin jağday jasaydı” dep atap ötken. Sonımen qatar, kelissözder aldında Erdoğan Franciya prezidenti Emmanuel' Makronmen telefonmen söylesken. “Soğıstı toqtatuğa qaray tarihi betbwrıs säti tudı – onı paydalanu kerek. Türkiya atıstı toqtatıp, twraqtı beybitşilik ornatu üşin kelissöz wyımdastırudı qosa alğanda kez kelgen üles qosuğa dayın”, – degen Erdoğan.

Resey sırtqı ister ministrligi Erdoğannıñ Putinniñ bastamasın tolıq qoldağanın habarladı, biraq atıstı toqtatu turalı ministrlik mälimdemesinde eşteñe aytılmağan.

Azat Europa / Azattıq radiosı