نەمىس باسىلىمى Bild اسكەري شولۋشىسى يۋليان ريوپكەنىڭ جازۋىنشا، شابۋىل كەزىندە 10-عا جۋىق ستراتەگيالىق بومبارديروۆششيك جويىلۋى مۇمكىن. اتاپ ايتقاندا، ورتەنىپ جاتقان تۋ-95 ۇشاقتارىنىڭ سپۋتنيكتىك سۋرەتتەرى جاريالانعان. ساراپشى بۇل شابۋىلدى رەسەيدىڭ ستراتەگيالىق يادرولىق الەۋەتىنە تونگەن ەلەۋلى قاتەر دەپ باعالايدى.

گەرمانيالىق اسكەري ساراپشى نيكو لانگە بولسا، رەسەيدىڭ ستراتەگيالىق ۇشاقتارىنىڭ سانى ازايعانى — ەۋروپا قاۋىپسىزدىگى ءۇشىن وڭ قادام ەكەنىن اتاپ ءوتتى.

يزرايلدىك اسكەري شولۋشى يگال لەۆين وپەراتسيانى «سالىستىرۋعا كەلمەيتىن دەڭگەيدەگى شابۋىل» دەپ سيپاتتادى. Telegram-داعى جازباسىندا: «ۋكرايندىقتار شابۋىل اۋقىمىن اسپانداتىپ جىبەردى»، — دەدى ول.

وپەراتسيانى سبۋ ۇيىمداستىرعان

DW باسىلىمىنىڭ سبۋ-داعى دەرەككوزىنە سۇيەنسەك، بۇل “ورمەك” اتتى ارنايى وپەراتسيانى ۋكراينا قاۋىپسىزدىك قىزمەتى (سبۋ) جۇزەگە اسىرعان. شابۋىل ناتيجەسىندە جالپى قۇنى 2 ملرد دوللارعا دەيىن جەتەتىن 41 ۇشاققا زاقىم كەلگەن. ولاردىڭ ىشىندە تۋ-95, ا-50 جانە تۋ-22م3 سياقتى ستراتەگيالىق ۇشاقتار بار.

ۋكراينالىق جۋرناليست ۆيتالي گلاگولا Telegram ارناسىندا شابۋىل ءساتىن تۇسىرگەن بەينەروليكتى جاريالاپ، بۇل سوعىس باستالعالى بەرى رەسەي اۆياتسياسىنا جاسالعان ەڭ قۋاتتى سوققى ەكەنىن مالىمدەدى.

FPV-دروندار جۇك كولىكتەردەن ۇشىرىلعان

ۋنيان اگەنتتىگىنىڭ جازۋىنشا، وپەراتسيانى پرەزيدەنت ۆلاديمير زەلەنسكي جەكە باقىلاۋىنا العان. دايىندىق جۇمىستارى 1,5 جىلعا سوزىلعان. بۇل ۋاقىت ىشىندە رەسەيگە ارنايى فۋرگوندار ارقىلى FPV-دروندار مەن ولاردى تاسىمالدايتىن كونتەينەرلەر جەتكىزىلگەن. ولار بازالار ماڭىنا قويىلىپ، بەلگىلەنگەن ۋاقىتتا قاشىقتان اشىلىپ، دروندار ۇشىرىلعان.

رف قورعانىس مينيسترلىگى: بىرنەشە ۇشاققا زاقىم كەلدى

رەسەي قورعانىس مينيسترلىگى مۋرمانسك، يركۋتسك، يۆانوۆو، ريازان جانە امۋر وبلىستارىنداعى اەرودرومدارعا FPV-دروندارمەن شابۋىل جاسالعانىن راستادى. مينيسترلىك مالىمەتىنشە، يۆانوۆو، ريازان جانە امۋر وبلىستارىنداعى شابۋىلدار تويتارىلعان، ال مۋرمانسك پەن يركۋتسك وبلىستارىندا اۆياتسيا تەحنيكاسى ورتەنگەن.

جاراقات العاندار جوق دەپ حابارلانعانىمەن، زاقىمدانعان ۇشاقتار سانى ناقتىلانبادى. كەيبىر ادامدار ۇستالعان.

Z-كانالدار: بۇل — “ورىستىڭ پيورل-حاربورى”

رەسەيلىك اسكەري Telegram ارنالارى بولعان وقيعانى اقش-تىڭ 1941 جىلعى پيورل-حاربورداعى شابۋىلىمەن سالىستىرىپ وتىر.

zhasalash.kz