ۋكراينانىڭ ارنايى قىزمەتى وپەراتسيانى جۇزەگە اسىرۋعا ءبىر جارىم جىل بويى دايىندالىپتى. وپەراتسيا بارىسىن ۋكراينا پرەزيدەنتى ۆلاديمير زەلەنسكيدىڭ ءوزى باقىلاعان، ال ونىڭ ورىندالۋىن سبۋ باسشىسى ۆاسيلي ماليۋك پەن ارنايى جاساقتاردىڭ ۇيلەستىرىلگەن ۇجىمى اتقارعان.

ۋكراينا تارابى الدىمەن FPV-درونداردى رەسەيگە كونتراباندالىق جولمەن جەتكىزەدى. ارتىنشا – اعاشتان جاسالعان شاعىن ۇيلەر جىبەرەدى. دروندار سول ۇيلەردىڭ شاتىرىنىڭ استىنا تىعىلعان. كەيىن بۇل ۇيلەر جۇك كولىكتەرگە تيەلىپ، رەسەيدىڭ ىشكى اۋماقتارىنا جەتكىزىلەدى. ءدال ءسات تۋعاندا، شاتىرى قاشىقتان اشىلىپ، دروندار كوككە كوتەرىلەدى دە، ستراتەگيالىق بومبالاۋشى اۋە تەحنيكاسىنا ءدال سوققى بەرگەن. مۇندا باستى قارۋ – ۇشۋ ەمەس، ويلاۋ قابىلەتىنىڭ شىرقاۋ شەگىن بايقاۋعا بولادى.

سوققى ءتورت بىردەي رەسەيلىك اسكەري اۋەجايدا ۇيىمداستىرىلعان. ولار – “بەلايا”، “دياگيلەۆو”، “ولەنيا”، جانە “يۆانوۆو”. اتالعان نىساندار – رەسەيدىڭ ستراتەگيالىق اۆياتسياسىنىڭ تىرەك نۇكتەلەرى ەكەنى بارشاعا ءمالىم. مۇندا يادرولىق نەمەسە قاشىقتان باسقارىلاتىن بومبالاردى تاسىمالدايتىن ۇشاقتار ورنالاسقان.

Clash Report دەرەكتەرىنە سۇيەنسەك، رەسەي اسكەري اۋەجايلارىنىڭ قاۋىپسىزدىگى – ابسوليۋتتىك ءنول دەڭگەيىننە تۇسكەن. بىرنەشە ميلليارد دوللار تۇراتىن اسكەري ۇشاقتار انگارسىز، قارۋلى كۇزەتسىز، اەرودرومدا قاڭتارىلىپ تۇرعان عوي. بۇل – كرەملدىڭ اسكەري باسقارۋ جۇيەسىندەگى ينستيتۋتسيونالدى دەگراداتسيانىڭ انىق كورىنىسى.

بۇل شابۋىلان ەكونوميكالىق تيىمدىلىك كوەففيتسيەنتى رەكوردتىق دەڭگەيگەن جەتكەنىن بايقايمىز. ءبىر درون – 600 دوللار. ءبىر تۋ-95مس – 100 ميلليون دوللار. ۋكراينا ءبىر سوققىدا ونجىلدىقتار بويى جينالعان كەڭەستىك-رەسەيلىك اۆياتسيا قورىنىڭ تالقانىن شىعاردى.

الەم ەلدەرى ەندى تۋ-95 پەن س-300 جۇيەلەرىنە ەمەس، FPV-درون مەن تسيفرلىق باسقارۋ الگوريتمدەرىنە ينۆەستيتسيا سالادى. سبۋ بۇل تۇرعىدا قورعانىس قۇرىلىمىنان ەمەس، جاڭا بۋىن اسكەري-يننوۆاتسيالىق لابوراتورياسىنان شىققانداي ارەكەت ەتتى.