قر سىرتقى ىستەر مينيسترلىگىندە حيميالىق قارۋعا تىيىم سالۋ ماسەلەلەرى تالقىلاندى
kerey.kz
ءۇ. ج. 4 مامىردا قازاقستان رەسپۋبليكاسى سىرتقى ىستەر ءمينيسترى ەرلان ىدىرىسوۆ حيميالىق قارۋعا تىيىم سالۋ جونىندەگى ۇيىمنىڭ (حقتسۇ) باس ديرەكتورى احمەت ۋزيۋمدجيۋمەن كەزدەستى-دەپ حابارلايدى ءسىم باسپا ءسوز قىزمەتى.
بۇل اتالعان حالىقارالىق ۇيىم باسشىسىنىڭ قازاقستانعا العاش رەت كەلۋى.
قر سىرتقى ىستەر ءمينيسترى ە. ىدىرىسوۆ قازاقستان حقتسۇ-مەن ىنتىماقتاستىققا زور كوڭىل بولەتىندىگىن اتاپ ءوتتى. «ءسىزدىڭ ساپارىڭىز مەملەكەتتىك جانە وڭىرلىك دەڭگەيلەردە حيميالىق قاۋىپسىزدىكتى قامتاماسىز ەتۋ شارالارىن جەتىلدىرۋگە باعىتتالعان ىقپالداستىققا قوسىمشا ەكپىن بەرەدى دەپ سەنەمىز»، – دەپ اتاپ ءوتتى قر سىرتقى ساياسي مەكەمە باسشىسى.
ە. ىدىرىسوۆ اتاپ وتكەندەي، قازاقستان رەسپۋبليكاسى جاپپاي قىرىپ جويۋ قارۋىن تاراتپاۋ قاعيداسىن تولىق ۇستانادى جانە حيميالىق قارۋعا تىيىم سالۋ كونۆەنتسياسىنا سايكەس ءوزىنىڭ مىندەتتەرىن تولىق اتقارۋدا، سونىمەن قاتار، بىرىككەن ۇلتتار ۇيىمى قاۋىپسىزدىك كەڭەسىنىڭ №1540 قارارىن ورىنداۋدا جۇيەلى شارالاردى ىسكە اسىرادى.
«قازاقستاننىڭ قارۋسىزداندىرۋ جانە تاراتپاۋ سالالارداعى ساياساتى ەلىمىزدىڭ سىرتقى ساياسي باعىتىمەن انىقتالادى، ونىڭ نەگىزىندە حالىقارالىق قاۋىپسىزدىكتى ۇستانۋ، مەملەكەتتەر اراسىنداعى ىنتىماقتاستىقتى دامىتۋ، جاھاندى ماسەلەلەر مەن جانجالداردى رەتتەۋدە حالىقارالىق ۇيىمدار بەدەلىن ارتتىرۋ جاتىر. جاپپاي قىرىپ جويۋ قارۋدى تاراتپاۋ قاعيداسىن ۇستانۋ قازاقستان رەسپۋبليكاسى سىرتقى ساياساتىنىڭ نەگىزگى باسىمدىقتارىنىڭ ءبىرى بولىپ تابىلادى»، – دەدى مينيستر.
ا. ۋزيۋمدجيۋ قازاقستاندى ۇيىم جۇمىسىنا بەلسەندى قاتىسۋى مەن قولداۋى ءۇشىن العىسىن ءبىلدىردى. ول «قازاقستان رەسپۋبليكاسى ۇيىمنىڭ حيميالىق قارۋعا تىيىم سالۋ قىزمەتىنە بەلسەندى قاتىسادى جانە حيميالىق قارۋعا تىيىم سالۋ كونۆەنتسيا مۇشە مەملەكەتتەر كونفەرەنتسياسىنىڭ جىل سايىنعى سەسسيالارى مەن شارالارىنا قاتىسادى»، – دەپ اتاپ ءوتتى.
ە. ىدىرىسوۆ قازاقستاننىڭ ۇلتتىق حيميالىق قاۋىپسىزدىك جونىندەگى ورتالىعىن قۇرۋدا مۇددەلىلىگىن ايتىپ، جانە ول بولاشاقتا وڭىرلىك دەڭگەيدەگى ورتالىققا اينالۋى مۇمكىندىگىن اتاپ ءوتتى.
تاراپتار، سونىمەن قاتار، ءۇ.ج. شىلدەدە قازاقستاندا حقتسۇ اياسىندا وتەتىن حيميالىق قاۋىپسىزدىك جونىندەگى كوماندا-شتابتىق وقۋلارىنا دايىندىق ماسەلەلەرىن تالقىلادى.
پىكىر قالدىرۋ