ادەبي الەم

“كەنەسارى – كۇنىمجاندى” كورىڭىز! جاۋعا تۇرا شاباتىنداي، رۋحتانىپ شىعاسىز!..

kerey.kz

 |  May 11, 2015

الماتىلىق اعايىن، 14-ءى كۇنى اۋەزوۆ تەاترىنا كەلىڭىز! “كەنەسارى – كۇنىمجاندى” كورىڭىز! جاۋعا تۇرا شاباتىنداي، رۋحتانىپ شىعاسىز!..

كەنەسارى مەن قوڭىرقۇلجا كورىنەدى.

قوڭىرقۇلجا. كەنەسارى، ۇلى يمپەرياعا جالاڭ قىلىشپەن قالاي قارسى تۇرماقسىڭ؟!. ەلدى قۇر بوسقا دۇرلىكتىرىپ، قاندى قىرعىنعا باستاعاننان نە تابام دەيسىڭ؟!
كەنەسارى. قوڭىرقۇلجا، سەن سياقتى جانىڭدى جالداپ، كۇنىڭ ءۇشىن اق پاتشاعا ساتىلىپ جۇرگەنشە، ازاتتىق ءۇشىن كۇرەسىپ ولگەن ارتىق!
قوڭىرقۇلجا. اۋ، مەن اق پاتشاعا قىزمەت ەتسەم، اقمولانىڭ اعا سۇلتانىمىن.
كەنەسارى. اعا سۇلتان ەكەنمىن دەپ، اتا-بابامىزدان مۇرا بوپ قالعان اتاقونىسىمىزدى تارتىپ الىپ، قاسيەتتى جەرىمىزدى قاراشەكپەندىلەرگە تاراتىپ بەرىپ جاتسا دا قاراپ وتىرا بەرمەكپىسىڭ!
قوڭىرقۇلجا. تەك جۇرگەن، توق جۇرەدى، كەنەسارى. جوندەرىڭمەن جۇرمەي، وزدەرىڭ ەمەس پە، اق پاتشاعا قارسى شىعىپ جۇرگەن. ايتپەسە، ءدال وسى سەنىڭ جەكە باسىڭا ەشكىم دە سوقتىعىپ جاتقان جوق قوي! ىشكەنىڭ الدىڭدا، ىشپەگەنىڭ ارتىڭدا ەمەس پە، كەنەسارى!..
كەنەسارى. قاراقان باسىمدى ويلاپ، قارىننىڭ قامىن عانا كۇيتتەسەك، نە بولعانى! ەلىڭدى قاسقىرشا تالاپ، قاتىنىڭ مەن قىزىڭدى زورلاپ، ۇلىڭنىڭ تۇلىمىن قيىپ، قۇلاقكەستى قۇلىنا اينالدىرسا دا، تىرس ەتپەي وتىرا بەرۋ كەرەك پە؟! جو.. جوق… بۇعان سەن كونەرسىڭ، مەن كونە المايمىن، سەن توزەرسىڭ، مەن توزە المايمىن!..
قوڭىرقۇلجا. كەنەسارى، بايقا، بايقا، اق پاتشاعا قارسى شىعامىن دەپ، باسىڭنىڭ قايدا قالعانىن بىلمەي قالىپ ءجۇر مە؟! مەن پاتشاعا نە ءۇشىن، كىم ءۇشىن قىزمەت ەتىپ ءجۇرمىن؟!. وسىنىڭ ءبارى قارا حالىقتىڭ، قالىڭ ەلدىڭ قامى ەمەس پە؟ سەنىڭ جانىڭدى اۋىرتقان جاي، ءبىزدى كۇيزەلتپەيدى دەيمىسىڭ؟!.
كەنەسارى. جوق… قوڭىرقۇلجا… سوندا ايداعاننىڭ الدىنا ءتۇسىپ، ۇستاعاننىڭ جەتەگىندە كەتە بەر دەمەكپىسىڭ! جو.. جوق… نامىسىمدى تاپتاتا قويماسپىن!
قوڭىرقۇلجا ء(سال كىدىرىپ). كەنەسارى، ورمانداي ورىس عانا ەمەس، قوقان، بۇحارا، حيۋا حاندىقتارى دا باسىڭا بايگە تىگىپ، جەرىڭە كوز الارتىپ، الەكەدەي جالانىپ وتىر. قايدا بارساڭ دا الدىڭنان قۇرىلعان تور مەن قازىلعان كور شىعار!..
كەنەسارى. قورقىنىش پەن ۇرەيگە بوي الدىرىپ، ورىستىڭ تەپكىسى مەن قورلىعىنا كونە بەرسەك، جەر باسىپ ءتىرى جۇرگەنىمىزدەن نە پايدا؟!. جو.. جوق… ەلىمنىڭ تىزگىنى مەن شىلبىرىن جات قولىنا ۇستاتا المايمىن! ءبىز قۇل بولۋ ءۇشىن جارالعامىز جوق! سەن قۇل بولساڭ، مەن قۇل بولسام، ەرتەڭگى ۇرپاعىمىز كىم بولماق؟ قايتسەك تە ايقاسىپ ەركىندىككە جەتەمىز، بولماسا، وسى جولدا جانىمىزدى قۇرباندىققا شالامىز!..